ବେଜିଂ, ୨୨ା୬: ପାରା ପାଓ୍ବାରଲିଫ୍ଟିଙ୍ଗ ବିଶ୍ୱକପ୍ର ପ୍ରଥମ ଦିବସରେ ଭାରତ ୪ ପଦକ (୧ସ୍ବର୍ଣ୍ଣ, ୧ରୌପ୍ୟ ଓ ୨ ବ୍ରୋଞ୍ଜ୍) ହାସଲ କରିଛି। ଟୁର୍ନାମେଣ୍ଟରେ ୪୦ରୁ ଊର୍ଦ୍ଧ୍ୱ ଦେଶର ଟପ୍ ପାଓ୍ବାରଲିଫ୍ଟରମାନେ ଅଂଶଗ୍ରହଣ କରିଛନ୍ତି। ୨୦୨୬ ବିଶ୍ୱ ଚାମ୍ପିୟନଶିପ୍ ଓ ୨୦୨୮ ପାରାଲିମ୍ପିକ୍ ଗେମ୍ସ ପାଇଁ ଏହା ଏକ କ୍ୱାଲିଫିକେଶନ ଇଭେଣ୍ଟ।
ଗୁଲ୍ଫାମ ଅହମ୍ମଦ ପୁରୁଷ ଏଲିଟ ୫୯କେଜି କାଟେଗୋରିରେ ଏକ ବ୍ରୋଞ୍ଜ ପଦକ ଜିତି ଭାରତ ପାଇଁ ଖାତା ଖୋଲିଥିଲେ। ସେ ପ୍ରଥମ ପ୍ରୟାସରେ ୧୪୫କେଜି ଉତ୍ତୋଳନ କରିଥିଲେ। ଦ୍ୱିତୀୟ ପ୍ରୟାସରେ ତାଙ୍କର ଶ୍ରେଷ୍ଠ ଲିଫ୍ଟ ୧୫୧ କେଜି ରହିଥିଲା। ତାଙ୍କର ତୃତୀୟ ପ୍ରଚେଷ୍ଟା ୧୫୩ କେଜି ରହିଥିଲେ ମଧ୍ୟ ତ୍ରୁଟିଯୁକ୍ତ ଥିବାରୁ ହିସାବକୁ ନିଆଯାଇ ନ ଥିଲା। ତାଙ୍କ ଦ୍ୱିତୀୟ ପ୍ରଚେଷ୍ଟା ପଦକ ପାଇଁ ଯଥେଷ୍ଟ ଥିଲା।
ପୁରୁଷ ଏଲିଟ ୭୨କେଜି କାଟେଗୋରିରେ ରାମୁଭାଇ ବାମ୍ଭାବା ତାଙ୍କ ପ୍ରଥମ ପ୍ରଚେଷ୍ଟାରେ ସଫଳତାର ସହ ୧୫୧କେଜି ଲିଫ୍ଟ କରି ଭାରତ ପାଇଁ ଆଉ ଏକ ବ୍ରୋଞ୍ଜ ଆଣି ଦେଇଥିଲେ। ତାଙ୍କର ପରବର୍ତ୍ତୀ ଦୁଇ ପ୍ରଚେଷ୍ଟା ଯଦିଓ ୧୫୫କେଜି ଓ ୧୫୬ କେଜି ଥିଲା, ତାହା ବୈଧ ନ ଥିଲା। ଭେଟେରାନ ଜୋଭି ମାଥ୍ୟୁସ ମାଷ୍ଟର୍ସ କାଟେଗୋରିରେ ଭଲ ପ୍ରଦର୍ଶନ କରି ଟୋଟାଲ ଲିଫ୍ଟରେ ସ୍ବର୍ଣ୍ଣ ଏବଂ ବେଷ୍ଟ ଲିଫ୍ଟରେ ରୌପ୍ୟ ପଦକ ଲାଭ କରିଥିଲେ। ସେ ଓପନିଂ ଲିଫ୍ଟରେ ୧୪୦କେଜି ଉତ୍ତୋଳନ କରିବାରେ ଅସଫଳ ରହିଥିଲେ। ମାତ୍ର ସେ ଦୃଢ଼ ପ୍ରତ୍ୟାବର୍ତ୍ତନ ସହ ୧୪୫କେଜି ଓ ୧୫୦କେଜି ଉତ୍ତୋଳନ କରିଥିଲେ।
