ଭୁବନେଶ୍ୱର,୨୦ା୮: ଯାଜପୁର ଜିଲାର ଓଳାଶୁଣି ଗୁମ୍ଫା ପୀଠରେ ବିଜୁ ଜନତା ଦଳ (ବିଜେଡି)ର ପୂର୍ବତନ ପ୍ରମୁଖ ନେତାମାନଙ୍କର ଏକ ମେଳି ଅନୁଷ୍ଠିତ ହୋଇଯାଇଛି। ଏହି ମେଳିରେ ଅମର ଶତପଥୀ, ପ୍ରଭାତ ତ୍ରିପାଠୀ, ସୌମ୍ୟ ରଞ୍ଜନ ପଟ୍ଟନାୟକ, ପ୍ରସନ୍ନ ପାଟ୍ଟଶାଣୀ, ରବି ପାଣି ଓ ରାମଚନ୍ଦ୍ର ହାଁସଦା ଉପସ୍ଥିତ ଥିଲେ। ଏହି ଭେଟକୁ ନେଇ ରାଜନୈତିକ ମହଲରେ ତୀବ୍ର ଚର୍ଚ୍ଚା ଆରମ୍ଭ ହୋଇଛି।
ସୂଚନା ଅନୁଯାୟୀ, ଏହି ମେଳିର ମୁଖ୍ୟ ଉଦ୍ଦେଶ୍ୟ ସମ୍ପର୍କରେ କୌଣସି ସ୍ପଷ୍ଟ ସୂଚନା ମିଳିନାହିଁ। ତେବେ, ଏକ ନୂଆ ରାଜନୈତିକ ଫ୍ରଣ୍ଟ ଗଠନ ନେଇ ଆଲୋଚନା ହୋଇଥିବା ଚର୍ଚ୍ଚା ରହିଛି। ଉପସ୍ଥିତ ନେତାମାନେ ଏହାକୁ ବ୍ୟକ୍ତିଗତ ଭୋଜି ବୋଲି କହି ଏଡ଼ାଇ ଦେଇଥିବା ବେଳେ, ରାଜନୈତିକ କ୍ଷେତ୍ରରେ ଏହା ନୂଆ ରାଜନୈତିକ ଗତିବିଧିର ସଙ୍କେତ ହୋଇପାରେ ବୋଲି ଅନୁମାନ କରାଯାଉଛି।
ଏହି ଘଟଣା ସାମାଜିକ ଗଣମାଧ୍ୟମରେ ମଧ୍ୟ ‘ନୂଆ ଫ୍ରଣ୍ଟ ଚର୍ଚ୍ଚା’ ଆଲୋଚନାର ବିଷୟ ହୋଇଛି। ଆଗାମୀ ଦିନରେ ଏହି ମେଳିର ପ୍ରକୃତ ଉଦ୍ଦେଶ୍ୟ ସ୍ପଷ୍ଟ ହେବ ବୋଲି ଆଶା କରାଯାଉଛି।
