ଭଞ୍ଜନଗର,୩୦ା୮(ବାବୁଲା ପ୍ରଧାନ): ଗଞ୍ଜାମ ଜିଲା ଘୁମୁସର ଘରୋଇ ବସ୍ ମାଲିକ ସଂଘ ଭଞ୍ଜନଗରର ପୂର୍ବତନ ସମ୍ପାଦକ ତଥା ବର୍ତ୍ତମାନର ଉପସଭାପତି ସୁବାସ ଚନ୍ଦ୍ର ଦିହୁଡିଙ୍କର ରବିବାର ଅପରାହ୍ନରେ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲରେ ପରଲୋକ ଘଟିଛି। ସେ ଦୀର୍ଘଦିନ ଧରି ହୃଦ୍ରୋଗ, ଯକୃତ ଓ କର୍କଟଜନିତ ରୋଗରେ ପୀଡ଼ିତ ଥିଲେ। ସ୍ବର୍ଗତଃ ଦିହୁଡ଼ି ଭଞ୍ଜନଗର ଅଞ୍ଚଳର ଜଣେ ପୁରାତନ ଓ ପରିଚିତ ବସ୍ ମାଲିକ ଥିଲେ। ସେ ବସ୍ ମାଲିକ ସଂଘର ବିଭିନ୍ନ କାର୍ଯ୍ୟକ୍ରମ ସହ ଦୀର୍ଘଦିନ ଧରି ଜଡ଼ିତ ରହିଥିଲେ। ରାଜ୍ୟ ସଂଘ ପକ୍ଷରୁ କୌଣସି ଡାକରା ଆସିଲେ ସେ ସର୍ବଦା ସକ୍ରିୟ ଭାବେ ଯୋଗଦେଉଥିଲେ। ମେଳାପୀ, ବନ୍ଧୁବତ୍ସଳ ସ୍ବଭାବ ପାଇଁ ସେ ସମସ୍ତଙ୍କ ନିକଟରେ ପରିଚିତ ଥିଲେ। ତାଙ୍କ ବିୟୋଗରେ ଭଞ୍ଜନଗର ସମେତ ସମଗ୍ର ଗଞ୍ଜାମ ଜିଲାର ବସ୍ ମାଲିକ ମହଲରେ ଗଭୀର ଶୋକ ପ୍ରକାଶ ପାଇଛି। ତାଙ୍କ ପରଲୋକ ସଂଘ ପାଇଁ ଏକ ଅପୂରଣୀୟ କ୍ଷତି ବୋଲି ସଂଘ ପକ୍ଷରୁ କୁହାଯାଇଛି।
ଘୁମୁସର ଘରୋଇ ବସ୍ ମାଲିକ ସଂଘ ପକ୍ଷରୁ ପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ସ୍ବର୍ଗତଃ ଦିହୁଡିଙ୍କ ଅମର ଆତ୍ମାର ସଦ୍ଗତି କାମନା କରାଯିବା ସହ ଶୋକସନ୍ତପ୍ତ ପରିବାରକୁ ଏହି ଦୁଃଖଦ ସମୟରେ ଧୈର୍ଯ୍ୟ ଓ ସାହସ ପ୍ରଦାନ ପାଇଁ ପ୍ରାର୍ଥନା କରାଯାଇଥିବା ସଂଘର ବରିଷ୍ଠ କର୍ମକର୍ତ୍ତା ବିପ୍ର ଚରଣ ବାରିକ ସୂଚନା ଦେଇଛନ୍ତି।