କୋଲକାତା,୯।୮(ପି.ଟି.): ପୂର୍ବତନ ଭାରତୀୟ ଡିପେଣ୍ଡର ତଥା ଜଣାଶୁଣା କ୍ଲବ ମୋହନ ବାଗାନ ଅଧିନାୟକ ମାନିଟୋମ୍ବି ସିଂ ମାତ୍ର ୩୯ ବର୍ଷରେ ପରଲୋକ ଗମନ କରିଛନ୍ତି। ଉତ୍ତରପୂର୍ବାଞ୍ଚଳ ରାଜ୍ୟ ମଣପୁର ରାଜଧାନୀ ଇମ୍ପାଲ ନିକଟସ୍ତ ନିଜ ଗ୍ରାମରେ ସେ ମୃତ୍ୟୁ ବରଣ କରିଛନ୍ତି ବୋଲି ରବିବାର ମୋହନ ବାଗାନ ତରଫରୁ ସୂଚନା ଦିଆଯାଇଛି। ଦୀର୍ଘଦିନ ଧରି ସେ ଅସୁସ୍ଥ ରହିଆସୁଥିଲେ ଓ ରବିବାର ସକାଳେ ତାଙ୍କର ଦେହାନ୍ତ ହୋଇଥିଲା। ମୃତ୍ୟୁ ବେଳକୁ ତାଙ୍କ ପାଖରେ ସ୍ତ୍ରୀ ଓ ୮ ବର୍ଷର ପୁଅ ଉପସ୍ଥିତ ଥିଲେ। ମାନିଟୋମ୍ବିଙ୍କ ଦେହାନ୍ତରେ ମୋହନ ବାଗାନ ପରିବାର ଅତ୍ୟାନ୍ତ ଦୁଃଖିତ ଓ ମର୍ମାହତ ବୋଲି କ୍ଲବର ଟୁଇଟର ହ୍ୟାଣ୍ଡଲରେ ଉଲ୍ଲେଖ କରାଯାଇଛି। ତାଙ୍କ ଆତ୍ମାର ସଦ୍ଗତି ହେଉି ଓ ତାଙ୍କ ପରିବାରକୁ ସମବେଦନା ଜଣାଉଛୁ ବୋଲି କ୍ଲବ ତରଫରୁ ଟୁଇଟ୍ କରାଯାଇଛି।
୨୦୦୩ରେ କୋଚ୍ ଷ୍ଟିଫେନ୍ କନ୍ଷ୍ଟଣ୍ଟିନ୍ଙ୍କ ତତ୍ତ୍ୱାବଧାନରେ ହୋ ଚି ମିନ୍ ସିଟିରେ ଘରୋଇ ଭିଏତ୍ନାମକୁ ୩-୨ ଗୋଲରେ ହରାଇ ଏଲଜି କପ୍ ହାସଲ କରିଥିଲା ଓ ମାନିଟୋମ୍ବି ଭାରତୀୟ ଦଳର ପ୍ରମୁଖ ସଦସ୍ୟ ଥିଲେ। ୧୯୭୧ରେ ସିଙ୍ଗାପୁରରେ ୮ ନେଶନ ଟୁର୍ନାମେଣ୍ଟ ଜିତିବା ପରେ ଭାରତ ପାଇଁ ଏହା ଦ୍ୱିତୀୟ ଅନ୍ତର୍ଜାତୀୟ ସଫଳତା ଥିଲା। ସେ ମଧ୍ୟ ୨୦୦୨ ବୁସାନ ଏସିଆନ ଗେମ୍ସରେ ଭାରତ ତରଫରୁ ପ୍ରତିନିଧିତ୍ୱ କରିଥିଲେ। ସେହିପରି ମୋହନ ବାଗନ ତରଫରୁ ପ୍ରତିନିଧିତ୍ୱ କରି ସେ ପଦାର୍ପଣ ମ୍ୟାଚ୍ରେ ହିଁ ଗୋଲ ସ୍କୋର କରିଥିଲେ। ସେ କାଲକାଟା ଫୁଟବଲ ଲିଗ୍ ପ୍ରିମିୟର ଡିଭିଜନ୍ରେ ୨୦୦୩ରେ ଏହି ସଫଳତା ପାଇଥିଲେ। ୨୦୦୪ରେ ଅଲ ଏୟାରଲାଇନ୍ସ ଗୋଲ୍ଡ କପ୍ ମୋହନ ବାଗାନ ଚାମ୍ପିୟନ ହୋଇଥିଲା। କ୍ଲବର ଏହି ସଫଳତାରେ ତାଙ୍କର ବିଶେଷ ଭୂମିକା ରହିଥିଲା। ଆର୍ମି ବଏଜ୍ ଓ ସର୍ଭିସେସ୍ରେ ମାନିଟୋମ୍ବି ଫୁଟବଲ ଖେଳିବା ଆରମ୍ଭ କରିଥିଲେ। ଏହାପରେ ସେ ଏୟାର ଇଣ୍ଡିଆ ଓ ସାଲଗାଓକର ତରଫରୁ ଖେଳିଥିଲେ। ତେବେ ୨୦୦୩ରେ ସେ ମୋହନ ବାଗନ ପାଇଁ ଖେଳିବା ଆରମ୍ଭ କରିଥିଲେ। ଶେଷଥର ପାଇଁ ସେ ମଣିପୁର ଷ୍ଟେଟ୍ ଲିଗ୍ ୨୦୧୫- ୧୬ ସଂସ୍କରଣରେ ଖେଳିଥିଲେ ଓ ଏହାପରେ ସେ କୋଚିଂ କରିବାକୁ ମନୋ ବଳାଇଥିଲେ।
