ଉମରକୋଟ/ରାଇଘର, ୪।୧(ସନ୍ତୋଷ ଶତପଥୀ/କିରଣ ପଟ୍ଟନାୟକ): ନବରଙ୍ଗପୁର ଜିଲା ରାଇଘର ବନାଞ୍ଚଳରେ ଚାରାରୋପଣରେ ଦୁର୍ନୀତି ଅଭିଯୋଗରେ ଗୋନା ସେକ୍ସନ୍ ଫରେଷ୍ଟର କାମାକ୍ଷାପ୍ରସାଦ ସ୍ବାଇଁ, ଫରେଷ୍ଟଗାର୍ଡ ହରେକୃଷ୍ଣ ନାୟକଙ୍କୁ ନିଲମ୍ବିତ କରାଯାଇଛି। ଏ ନେଇ ଏସିଏଫ୍ଓ ସୁବାସ ଖୁଣ୍ଟିଆ ସୂଚନା ଦେଇଛନ୍ତି। ଘଟଣାର ତଦନ୍ତ କରିବାକୁ ଏକ ଟିମ ଗଠନ କରାଯଇଛି। ଏହି ଟିମ ଆଗାମୀ ଦିନରେ ସମସ୍ତ ବନିକରଣ ସ୍ଥାନକୁ ଯାଇ ପୁଙ୍ଖାନୁପୁଙ୍ଖ ତଦନ୍ତ କରିବ।
ଏହି ଦୁର୍ନୀତିରେ କେତେ ଟଙ୍କା ହେରଫେର ହୋଇଛି ତାହା ତଦନ୍ତ କରାଯିବ। ଏଥିରେ ଯେଉଁମାନେ ସମ୍ପୃକ୍ତ ଅଛନ୍ତି ସେମାନଙ୍କ ବିରୋଧରେ କାର୍ଯାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ମିଳିଛି।
ପ୍ରକାଶ ଯେ, ବ୍ଲକର ହଳଦୀ, ମୁଣ୍ଡିବେଡା, ନାକଟିସିମୋଡ ପଞ୍ଚାୟତରେ ଥିବା ଚାରୋଟି ବନିକରଣ କାୱାଡଙ୍ଗରି, ବାତାଝରି, ଡଙ୍ଗରିପାରା, ଚଢିଆପାରା ଚାରାରୋପଣ ନାମରେ ଦୁର୍ନୀତି ଏବଂ କାୱାଡଙ୍ଗରି ବନିକରଣରେ ଶ୍ରମିକମାନଙ୍କୁ ଚାରାରୋପଣ ବାବଦକୁ ବକେୟା ଟଙ୍କା ଦିଆଯାଇ ନାହିଁ। କୁମୁଲି ପଞ୍ଚାୟତର ପଟାଚୁଆଁ ନର୍ସରୀରୁ ବାଉଁଶ ଗଛ ବିକ୍ରି ହେବା ନେଇ ମଧ୍ୟ ଅଭିଯୋଗ ହୋଇଥିଲା। ଏଥିସହ ସରକାରୀ ନିୟମାନୁଯାୟୀ, ଚାରାରୋପଣ କରାଯାଉ ନ ଥିବା ନେଇ ମଧ୍ୟ ଅଭିଯୋଗ ଥିଲା।
