କଳାହାଣ୍ଡିରେ ବିଦେଶୀ ଖବରଦାତା ଲୁଇସ୍ ଲାଫ୍ରାନ୍ସ

ଭବାନୀପାଟଣା, ୧୫।୮ (ଉତ୍ତମ କୁମାର ଦାଶ): କଳାହାଣ୍ଡି ଜିଲାକୁ ସ୍ପେନର ବରିଷ୍ଠ ଖବରଦାତା, ଗବେଷକ ତଥା ବ୍ଲଗର ଲୁଇସ୍ ଲାଫ୍ରାନ୍ସ ପରିଦର୍ଶନରେ ଆସିଛନ୍ତି। ଏହି ଗସ୍ତ ସମୟରେ ସେ ଜିଲାର ବିଭିନ୍ନ ଲୋକନୃତ୍ୟ, ଲୋକସଂସ୍କୃତି, ଦେବୀପୀଠ ଓ ପ୍ରାକୃତିକ ସ୍ଥଳୀ ପରିଦର୍ଶନ କରି ସ୍ଥାନୀୟ କଳା, ସଂସ୍କୃତି ଓ ପରମ୍ପରା ସମ୍ପର୍କରେ ତଥ୍ୟ ସଂଗ୍ରହ କରୁଛନ୍ତି।

ପ୍ରଥମେ ସେ ଜିଲାର ଲୋକକଳା ଗ୍ରାମ ଭାବେ ପରିଚିତ ଜୁନାଗଡ଼ ବ୍ଲକର ଛୋରିଆଗଡ଼ରେ ପହଞ୍ଚି ଘୁମୁରା ନୃତ୍ୟ ପରିବେଷଣ ଦେଖିଥିଲେ। ଏହାସହ ଘୁମୁରା କଳାକାରମାନଙ୍କୁ ଭେଟି ଏହି ପାରମ୍ପରିକ ନୃତ୍ୟର ଇତିହାସ, ପରମ୍ପରା ଓ ଏହାର ବିଭିନ୍ନ ଦିଗ ସମ୍ପର୍କରେ ଆଲୋଚନା କରିଥିଲେ।

ପରେ ସେ କାଠ କାରିଗରୀ ପାଇଁ ପ୍ରସିଦ୍ଧ ଧର୍ମଗଡ଼ ବ୍ଲକର ଖଏରପଦର ଗ୍ରାମରେ ପହଞ୍ଚିଥିଲେ। ସେଠାରେ କାଠରେ ନିର୍ମିତ ବିଭିନ୍ନ ମୂର୍ତ୍ତି ଓ କାଠ ଶିଳ୍ପକଳା ଦେଖିବା ସହ କାରିଗରମାନଙ୍କ ସହ ଆଲୋଚନା କରିଥିଲେ। କାଠ କାରିଗରୀର ପାରମ୍ପରିକ ଶୈଳୀ, କାରିଗରମାନଙ୍କ ଜୀବନଯାପନ ଓ ଏହି ଶିଳ୍ପର ବିଭିନ୍ନ ଦିଗ ସମ୍ପର୍କରେ ସେ ତଥ୍ୟ ନେଇଥିଲେ।

ଅପରାହ୍ନରେ ଲୁଇସ୍ ଲାଫ୍ରାନ୍ସ କେସିଙ୍ଗା ବ୍ଲକ୍‌ର ଗୁର୍ଜିମୁଣ୍ଡାସ୍ଥିତ ମା’ ଯୋଗମାୟାଙ୍କ ପୀଠରେ ପହଞ୍ଚିଥିଲେ। ପୀଠ ନିକଟରେ ଥିବା ପ୍ରସିଦ୍ଧ ଦେବଗୁମ୍ଫା (ପ୍ରାକୃତିକ ଗୁମ୍ଫା)ରେ ଥିବା ବିଶାଳ ଶିବଲିଙ୍ଗ ଦର୍ଶନ କରିବା ସହ ବିରିପୁଡ଼ା ପାହାଡ଼ ଓ ଗୁମ୍ଫାର ଐତିହାସିକ ଓ ପ୍ରାକୃତିକ ବିଶେଷତା ସମ୍ପର୍କରେ ବୁଝିଥିଲେ।

ପରେ ସେ ଦେବୀ ଯୋଗମାୟା ଓ ପ୍ରଭୁ ପାତାଳେଶ୍ୱରଙ୍କ ଦର୍ଶନ କରିବା ସହ ମନ୍ଦିର ନିକଟରେ ଥିବା ଔଷଧୀୟ ବୃକ୍ଷ ଉଦ୍ୟାନ ପରିଭ୍ରମଣ କରିଥିଲେ। ଦେବୀ ଯୋଗମାୟା ଓ ପ୍ରଭୁ ପାତାଳେଶ୍ୱରଙ୍କ ଉତ୍ପତ୍ତି, ପୀଠର ଐତିହ୍ୟ ଏବଂ ପାରିପାର୍ଶ୍ୱିକ ପରିବେଶର ସଂରକ୍ଷଣ ଓ ପରିଚାଳନା ସମ୍ପର୍କରେ ସେ ମା’ ଯୋଗମାୟା ଦେବୀପୀଠ ଓ ଦେବଗୁମ୍ଫା ଚାରିଟେବଲ୍ ଟ୍ରଷ୍ଟର କର୍ମକର୍ତ୍ତାମାନଙ୍କଠାରୁ ବିଭିନ୍ନ ତଥ୍ୟ ସଂଗ୍ରହ କରିଥିଲେ।

ପ୍ରକୃତିର କୋଳରେ ଦେବାଦେବୀଙ୍କ ଅବସ୍ଥିତି ଏବଂ ପୀଠର ଶାନ୍ତ, ମନୋରମ ପରିବେଶ ତାଙ୍କୁ ବେଶ୍ ଅଭିଭୂତ କରିଥିଲା। ନିଜର ଭ୍ରମଣ କାହାଣୀରେ ଯୋଗମାୟା ପୀଠ ଓ ଦେବଗୁମ୍ଫା ସମ୍ପର୍କରେ ପ୍ରମୁଖ ଭାବେ ଉଲ୍ଲେଖ କରିବେ ବୋଲି ଲୁଇସ୍ ଲାଫ୍ରାନ୍ସ କହିଥିବା ତାଙ୍କ ଗାଇଡ୍ ମନୋଜ ଭୋଇ ସୂଚନା ଦେଇଛନ୍ତି।

ସ୍ପେନର କାଟାଲୋନିଆ ଅଞ୍ଚଳର ବାର୍ସିଲୋନା ନିବାସୀ ଲୁଇସ୍ ଲାଫ୍ରାନ୍ସ ସମ୍ପ୍ରତି ପଶ୍ଚିମ ଓଡ଼ିଶା ଗସ୍ତରେ ଅଛନ୍ତି। କଳାହାଣ୍ଡିର ଲୋକକଳା, ଲୋକସଂସ୍କୃତି, ପାରମ୍ପରିକ ଶିଳ୍ପ ଓ ପ୍ରାକୃତିକ ଐତିହ୍ୟ ପ୍ରତି ତାଙ୍କ ଆଗ୍ରହ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।

ସୂଚନାଯୋଗ୍ୟ, ପୂର୍ବରୁ ମଧ୍ୟ ବେଲଜିୟମ ଓ ସ୍ୱିଜରଲାଣ୍ଡର ଜେନେଭାରୁ ଏକାଧିକ ପର୍ଯ୍ୟଟକ ଯୋଗମାୟା ପୀଠ ପରିଦର୍ଶନରେ ଆସିଥିଲେ। ନିକଟରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ମଧ୍ୟ ଏହି ପୀଠ ପରିଦର୍ଶନ କରି ଏହାକୁ ପର୍ଯ୍ୟଟନସ୍ଥଳୀର ମାନ୍ୟତା ଦେବା ନେଇ ଘୋଷଣା କରିଥିଲେ।