ବୌଦ୍ଧ,୩୦।୩(ସ୍ବ.ପ୍ର.): ବୌଦ୍ଧ ସହରର ମହାନଦୀ ଘାଟରେ ମଙ୍ଗଳବାର ଡିନାମାଇଟ୍ ଫୁଟାଇ ମାଛ ମାରିବା ଜଣେ ଯୁବକଙ୍କ ପାଇଁ ବିଷମ ପରିସ୍ଥିତି ସୃଷ୍ଟି ହୋଇଛି। ଡିନାମାଇଟ୍ ହଠାତ୍ ଫୁଟି ଯିବାରୁ ଯୁବକଙ୍କ ହାତ ପାପୁଲି ଛିଣ୍ଡିଯାଇଛି। ଆହତ ଯୁବକ ହେଲେ ସୁରଥ ଭୋକ୍ତା (୪୦)। ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ମିଳିଥିବା ସୂଚନା ମୁତାବକ, ବୌଦ୍ଧ ଥାନା ଅନ୍ତର୍ଗତ ଲାଣ୍ଡିବନ୍ଧ ଗ୍ରାମର ସୁରଥ ଜଣେ ଗାଡି ଚାଳକ। ମଙ୍ଗଳବାର ସେ କାମକୁ ନ ଯାଇ କେତେଜଣ ସାଙ୍ଗଙ୍କ ସହ ମାଛ ମାରିବାକୁ ମହାନଦୀର ହନୁମାନ ଘାଟକୁ ଯାଇଥିଲେ। ମାଛ ମାରିବା ପାଇଁ ସେ ଏକ ଡିନାମାଇଟ୍ରେ ନିଆଁ ଲଗାଇ ପାଣିରେ ପକାଇଥିଲେ। କିନ୍ତୁ ଡିନାମାଇଟଟି ଫୁଟି ନ ଥିଲା। ଫଳରେ ସୁରଥ ପୁନର୍ବାର ଆଉ ଏକ ଡିନାମାଇଟ୍ରେ ନିଆଁ ଲଗାଇ ପାଣିରେ ପକାଇଥିଲେ। ଡିନାମାଇଟ ପାଣିରେ ଫୁଟିବା ପରେ ସେ ମାଛ ଧରିବାକୁ ପାଣିରେ ପଶିଥିଲେ। ମାଛ ଧରୁଥିବା ବେଳେ ପାଣିରେ ପକାଇଥିବା ପ୍ରଥମ ଡିନାମାଇଟ ଫୁଟି ଯିବାରୁ ସୁରଥଙ୍କ ଡାହାଣ ହାତ ପାପୁଲି ଛିଣ୍ଡିବା ସହ ମୁହଁ ଓ ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଥିଲା। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ବୌଦ୍ଧ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି। ଏହି ଘଟଣା ଘଟିବା ପରେ ସୁରଥଙ୍କ ଅନ୍ୟ ସାଙ୍ଗମାନେ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡିଛି। ବୌଦ୍ଧ ପୋଲିସ ପହଞ୍ଚତ୍ ତଦନ୍ତ ଆରମ୍ଭ କରିଛି। ପ୍ରକାଶଥାଉ କି , ଏକଦା ବୌଦ୍ଧ ସହର ଦେଇ ଯାଇଥିବା ମହାନଦୀର ଚିଙ୍ଗୁଡ଼ି ଓ ଅନ୍ୟ ମାଛର ବହୁ ଚାହିଦା ରହିଥିଲା। କିନ୍ତୁ ଏବେ ମହାନଦୀ ଶୁଖିଲା ପଡିଛି। ଯାହା ମାଛ ଅଛି ତାକୁ ଅଧିକାଂଶ ସମୟରେ ଡିନାମାଇଟ୍ କିମ୍ବା ରାସାୟନିକ ଦ୍ରବ୍ୟ ପକାଇ ଧରାଯାଉ ଥିବାରୁ ମାଛ ବଂଶ କ୍ରମଶଃ ହ୍ରାସ ପାଇବାରେ ଲାଗିଛି। ପ୍ରଶାସନର ଏଥିପ୍ରତି ନିଘା ନାହିଁ। ଯଦି କିଛି ଦୁର୍ଘଟଣା ଘଟୁଛି ପୋଲିସ କେସ କରି ଚୁପ ହୋଇ ବସୁଛି। ପ୍ରଶାସନ ପକ୍ଷରୁ ଏ ଦିଗରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଦାବି ହେଉଛି।
