ବ୍ରହ୍ମପୁର ଅଫିସ,୩୧ା୧୨: ନଷ୍ଟର ଶ୍ରେଷ୍ଠ ଉଦ୍ୟମକୁ ନେଇ ବ୍ରହ୍ମପୁର ଆଇଟିଆଇ ସର୍ବଦା ପ୍ରଶଂସାଭାଜନ ହୋଇଛି। ଏହି ମର୍ମରେ ଆଇଟିଆଇ ଛାତ୍ରୀଛାତ୍ର ଅବ୍ୟବହୃତ ସାମଗ୍ରୀକୁ ବ୍ୟବହାର କରି ବ୍ୟବହାର ଉପଯୋଗୀ ସାମଗ୍ରୀ ନିର୍ମାଣ କରିଛନ୍ତି। ଆଇଟିଆଇର ଫିଟର, ୱେଲଡର, ପେଣ୍ଟର ଓ ଇଲେକଟ୍ରିସିଆନ ଛାତ୍ରୀଛାତ୍ରମାନେ ପୁରୁଣା ସ୍କ୍ରାପ୍, ଭଙ୍ଗାକୋଠାରୁ ସଂଗ୍ରହ କରାଯାଇଥିବା ପୁରୁଣା ଲୁହାକୁ ବ୍ୟବହାର କରି ଫୁଲ ଗଛ ରଖିବା ନିମନ୍ତେ ଷ୍ଟାଣ୍ଡ ନିର୍ମାଣ କରିଛନ୍ତି। ଯାହା ଦେଖିବାକୁ ବେଶ୍ ଆକର୍ଷଣୀୟ ହୋଇଛି। ବର୍ତ୍ତମାନ ପ୍ରତି ଘରେ ଫୁଲ ଗଛ ରଖି ସୌନ୍ଦର୍ଯ୍ୟକରଣ ବୃଦ୍ଧି ମୁଖ୍ୟ ସ୍ରୋତ ପାଲଟିଛି। ଏପରିକି ଫୁଲ ରଖିବା ନିମନ୍ତେ ଷ୍ଟାଣ୍ଡର ବହୁଳ ଚାହିଦା ଦେଖିବାକୁ ମିଳିଛି। ଫଳରେ ଆଇଟିଆଇ ଛାତ୍ରୀଛାତ୍ରଙ୍କ ଦ୍ୱାରା ପ୍ରସ୍ତୁତ କରାଯାଇଥିବା ଏହି ଷ୍ଟାଣ୍ଡ ଫୁଲଗଛ ପ୍ରେମୀଙ୍କ ଆବଶ୍ୟକତାକୁ ପୂରଣ କରିବ ବୋଲି ଅଧ୍ୟକ୍ଷ ଡ.ରଜତ କୁମାର ପାଣିଗ୍ରାହୀ ସୂଚନା ଦେଇଛନ୍ତି।
