ବଣାଇ, ୨।୯ (ପ୍ରଦୀପ ତ୍ରିପାଠୀ): ଗତକାଲି ରାତିରୁ ବଣାଇ ଅଞ୍ଚଳରେ ଲଗାଣ ବର୍ଷାର ପ୍ରଭାବରେ ଅସ୍ତବ୍ୟସ୍ତ ହୋଇପଡିଛି ସାଧାରଣ ଜୀବନଯାତ୍ରା। ଲଗାଣ ବର୍ଷା ଯୋଗୁ ସରସରା ପଟଙ୍ଗା ନାଳରେ ବନ୍ୟାଜଳ ପ୍ରବାହିତ ହେବା ଫଳରେ ସରସରାରୁ ବଲାଙ୍ଗ ସମେତ ଉଲୁଣ୍ଡାପୋଷ, ଭାଲୁପାଣି, ତାଳଡିହି, ବରଘାଟ, ଜାମଜୋର ଗ୍ରାମ ବିଚ୍ଛିନ୍ନ ହୋଇଯାଇଛି। ନାଳ ଉପରେ ଥିବା ସ୍ବଳ୍ପ ଉଚ୍ଚ ବ୍ରିଜ ଉପରେ ପ୍ରାୟ ତିନି ଫୁଟ ଉଚ୍ଚତାରେ ବନ୍ୟାଜଳ ପ୍ରବାହିତ ହେଉଛି । ବଲାଙ୍ଗ ସଂଲଗ୍ନ ପାଞ୍ଚଟି ଗାଁକୁ ଯୋଗାଯୋଗ ବିଚ୍ଛିନ୍ନ ହୋଇପଡିଛି। ଏହି ରାସ୍ତା ଉଲୁଣ୍ଡାପୋଷ ଗ୍ରାମକୁ ମଧ୍ୟ ରହିଥିବାରୁ ଯୋଗାଯୋଗ ବିଚ୍ଛିନ୍ନ ହୋଇଛି । ବନ୍ୟାଜଳ ପାଇଁ ଅଟକି ରହିଛନ୍ତି ସ୍କୁଲ ପିଲା । ସମ୍ପୃକ୍ତ ନାଳରେ ପ୍ରବଳ ବର୍ଷା ବେଳେ ଜଙ୍ଗଲରୁ ବୋହି ଆସୁଥିବା ପାଣି ବନ୍ୟାର ରୂପ ନିଏ ଓ ବର୍ଷା କମିଲେ ସ୍ବାଭାବିକ ପରିସ୍ଥିତି ଫେରିଆସେ। ତେବେ ଆଗକୁ ପାଣିପାଗ ବିଭାଗର ସତର୍କ ସୂଚନା ଯୋଗୁ ଅଞ୍ଚଳବାସୀ ଆତଙ୍କିତ ଅବସ୍ଥାରେ ଅଛନ୍ତି ।
