ନୂଆଦିଲ୍ଲୀ,୨୦।୧୧: ଫ୍ଲିପକାର୍ଟ, ବ୍ଲିଙ୍କିଟ୍, ରିଲାଏନ୍ସ ରିଟେଲ, ଜୋମାଟୋ, ଟାଟା 1mg ସମେତ ୨୬ଟି ବଡ଼ ଇ-କମର୍ସ ପ୍ଲାଟଫର୍ମ ଦାବି କରିଛନ୍ତି ଯେ ସେମାନଙ୍କ ୱେବସାଇଟରେ ‘ଡାର୍କ ପାଟର୍ନ’ର ବ୍ୟବହାର ହେଉନାହିଁ। ଗୁରୁବାର ଖାଉଟି ବ୍ୟାପାର, ଖାଦ୍ୟ ଏବଂ ସାର୍ବଜନୀନ ବଣ୍ଟନ ମନ୍ତ୍ରଣାଳୟ ଏହି ସୂଚନା ଦେଇଛି।
କମ୍ପାନୀଗୁଡ଼ିକ ଆଭ୍ୟନ୍ତରୀଣ ସ୍ୱ-ଅଡିଟ୍ କିମ୍ବା ତୃତୀୟ ପକ୍ଷ ଖାଉଟି ସମୀକ୍ଷା ଆଧାରରେ ଏହି ଘୋଷଣା କରିଛନ୍ତି। ମନ୍ତ୍ରଣାଳୟ କହିଛି ଯେ ଏହି ପ୍ଲାଟଫର୍ମଗୁଡ଼ିକ ‘ଡାର୍କ ପାଟର୍ନ’ ଚିହ୍ନଟ କରିବା ଏବଂ ଦୂର କରିବା ପାଇଁ ଅଡିଟ୍ କରିଛନ୍ତି। ସମସ୍ତ ୨୬ଟି କମ୍ପାନୀ ଦୃଢ଼ ଭାବରେ କହିଛନ୍ତି ଯେ ସେମାନଙ୍କ ପ୍ଲାଟଫର୍ମରେ କୌଣସି ପ୍ରକାରର ଚତୁରତାପୂର୍ଣ୍ଣ ଡିଜାଇନ୍ ବ୍ୟବହାର କରାଯାଉନାହିଁ, ଯାହା ଖାଉଟିଙ୍କୁ ଭ୍ରମିତ କରେ।
‘ଡାର୍କ ପାଟର୍ନ’ ହେଉଛି ଏକ ୟୁଜର ଇଣ୍ଟରଫେସ୍ ଯାହାର ଉଦ୍ଦେଶ୍ୟ ହେଉଛି ଖାଉଟିଙ୍କୁ ବିଭ୍ରାନ୍ତ କରିବା କିମ୍ବା ଚାପ ପକାଇବା, ଯାହା ଫଳରେ ସେମାନେ ଅଜାଣତରେ ଏକ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତି (ଯେପରିକି- କୌଣସି ସେବା କିଣିବା, ସ୍ୱୟଂ-ନବୀକରଣକୁ ଗ୍ରହଣ କରିବା, କିମ୍ବା ଭୁଲ୍ ଉତ୍ପାଦ ବାଛିବା)।
ଉଦାହରଣସ୍ୱରୂପ, ‘ଫୋର୍ସଡ୍ ସବସ୍କ୍ରିପସନ୍’ ଯେଉଁଠାରେ ଫ୍ରି ଟ୍ରାଏଲ୍ ନାମରେ କାର୍ଡର ବିବରଣୀ ନିଆଯାଏ ଏବଂ ଟ୍ରାଏଲ୍ ସମାପ୍ତ ହେବା ପରେ ଗ୍ରାହକଙ୍କ ବିନା ଅନୁମତିରେ ସ୍ୱୟଂଚାଳିତ ଭାବେ ନବୀକରଣ ହୋଇଯାଏ।
ଏହି ତାଲିକାରେ Flipkart, ମିନ୍ତ୍ରା, ବିଗ୍ବାସ୍କେଟ୍, କ୍ଲିଅରଟ୍ରିପ୍, ମେକ୍ମାଇଟ୍ରିପ୍, ୱାଲମାର୍ଟ ଇଣ୍ଡିଆ, ରିଲାଏନ୍ସ ରିଟେଲ (Tira Beauty, JioMart, Reliance Jewels, Ajio, Reliance Digital), ଜେପ୍ଟୋ, ସ୍ୱିଗି, ଜୋମାଟୋ, ବ୍ଲିଙ୍କିଟ୍, ଟାଟା 1mg, ନେଟମେଡ୍ସ, ପେଜ୍ ଇଣ୍ଡଷ୍ଟ୍ରିଜ୍, ୱିଲିୟମ୍ ପେନ୍, ଫାର୍ମଇଜି, କୁରାଡେନ୍ ଇଣ୍ଡିଆ, ଡୁରୋଫ୍ଲେକ୍ସ, ହାମଲେସ୍, ମିଲ୍ବାସ୍କେଟ୍, ଇକ୍ସିଗୋ ଏବଂ ମିଶୋ ଭଳି ବଡ଼ ବଡ଼ ପ୍ଲାଟଫର୍ମ ସାମିଲ୍ ଅଛନ୍ତି।
