ଢେଙ୍କାନାଳ ଅଫିସ,୨୮।୪: ଢେଙ୍କାନାଳ ପୌରସଂସ୍ଥାରେ ବିକ୍ରି ମାହାସୁଲ ଆଦାୟରେ ଟେଣ୍ଡର ଫିକ୍ସିଂ ହୋଇଥିବା ପୂର୍ବତନ ନଗରପାଳ ସୁରେନ୍ଦ୍ର ମିଶ୍ର ଅଭିଯୋଗ କରିଛନ୍ତି। ଏହି ଦୁର୍ନୀତିର ଭିଜିଲାନ୍ସ ତଦନ୍ତ କରିବାକୁ ସେ ଦାବି କରିଛନ୍ତି।
ଅଭିଯୋଗରୁ ଜଣାପଡ଼ିଛି, ୨୦୧୭ରେ ପୌରାଞ୍ଚଳର ରାସ୍ତାକଡ଼ରେ ବସୁଥିବା ବ୍ୟବସାୟୀଙ୍କଠାରୁ ବିକ୍ରି ମାହାସୁଲ ଆଦାୟ ପାଇଁ ନିଲାମ ୧୧ ଲକ୍ଷ ୨୧ ହଜାର ଟଙ୍କା ପର୍ଯ୍ୟନ୍ତ ଯାଇଥିଲା। ତେବେ ୨୦୧୮ରୁ ୨୦୨୨ ପର୍ଯ୍ୟନ୍ତ ଏହି ନିଲାମ ହୋଇ ନ ଥିଲା। କେଉଁ କାରଣରୁ ନିଲାମ ଦିଆଗଲା ନାହିଁ ବୋଲି ପୂର୍ବତନ ନଗରପାଳ ମିଶ୍ର ପ୍ରଶ୍ନ କରିଛନ୍ତି। ନିର୍ବାଚନ ହୋଇ ନ ଥିବାରୁ ୪ବର୍ଷ ଧରି ପୌର ପରିଷଦ ଗଠନ ହୋଇ ନ ଥିଲା। ଜିଲାପାଳ ପୌରସଂସ୍ଥାର ପ୍ରଶାସନିକ ଅଧିକାରୀ ଭାବେ ଦାୟିତ୍ୱ ତୁଲାଉଥିଲେ। ଏହି ସମୟ ମଧ୍ୟରେ ପୌରାଞ୍ଚଳରେ ବିଭିନ୍ନ ବେନିୟମ କାର୍ଯ୍ୟ ହୋଇଛି। ଏଥିରେ ବହୁ କୋଟି ଟଙ୍କାର ଦୁର୍ନୀତି ହୋଇଥିବା ଅଭିଯୋଗ ହେଉଛି। ରାସ୍ତାକଡ଼ରେ ବସୁଥିବା ବ୍ୟବସାୟୀଙ୍କଠାରୁ ବିକ୍ରି ମାହାସୁଲ ଆଦାୟ ପାଇଁ ନିଲାମ ହୋଇ ନ ଥିବାବେଳେ ପୌର କର୍ମଚାରୀମାନେ ଟଙ୍କା ଆଦାୟ କରିଛନ୍ତି। ହେଲେ ଉକ୍ତ ଅର୍ଥ ପୌର ତହବିଲରେ ଦାଖଲ ହୋଇଛି କି ନାହିଁ, ତାହା ଏବେ ରହସ୍ୟ ଘେରରେ। ଅନ୍ୟପଟେ ଜାଲ ରସିଦ୍ରେ କେତେଜଣ କର୍ମଚାରୀ ଏହି ଟଙ୍କା ଆଦାୟ କରି ଆତ୍ମସାତ୍ କରିଥିବା ସେ ଅଭିଯୋଗରେ ଦର୍ଶାଇଛନ୍ତି।
ପୂର୍ବତନ ନଗରପାଳ ମିଶ୍ର ଆହୁରି ମଧ୍ୟ କହିଛନ୍ତି ଯେ, ୨୦୨୨ରେ ନୂତନ ପୌର ପରିଷଦ ଗଠନ ପରେ ଉଠା ଦୋକାନୀଙ୍କଠାରୁ ବିକ୍ରି ମାହାସୁଲ ନିଲାମ ପ୍ରକ୍ରିୟା ଆରମ୍ଭ ହୋଇଥିଲା। ତେବେ ମାତ୍ର ୯ ଲକ୍ଷ ୭୧ ହଜାର ଟଙ୍କା ନିଲାମ ଡାକିଥିବା ବ୍ୟକ୍ତିଙ୍କୁ ଟେଣ୍ଡର ଦିଆଯାଇଥିଲା। ଏହି ଟେଣ୍ଡର ପ୍ରକ୍ରିୟାରେ କେବଳ ଗୋଟିଏ ପରିବାରର ବାପପୁଅ ଭାଗ ନେଇଥିଲେ। ନିୟମ ଅନୁଯାୟୀ ପୂର୍ବବର୍ଷର ନିଲାମ ଟଙ୍କାଠାରୁ ନୂତନ ପ୍ରକ୍ରିୟାରେ କମ୍ ଟଙ୍କାରେ ନିଲାମ ଡକାଗଲେ ଏହାକୁ ଗ୍ରହଣ କରାଯାଇ ନ ଥାଏ। ପୁନର୍ବାର ଟେଣ୍ଡର ହୋଇଥାଏ। ପୂର୍ବ ନିଲାମ ଟଙ୍କାକୁ ନଜରରେ ରଖି ସର୍ବନିମ୍ନ ବିଡିଂ ପ୍ରାଇସ୍ ରଖାଯାଇଥାଏ। ଏହା ସତ୍ତ୍ୱେ ଯଦି ନିଲାମ ନିର୍ଦ୍ଧାରିତ ବିଡିଂ ପ୍ରାଇସ୍ଠାରୁ କମ୍ ହୁଏ, ତେବେ ଆଲୋଚନା କରି ଏକ ନିର୍ଦ୍ଧାରିତ ମୂଲ୍ୟରେ ଚୁକ୍ତିନାମା କରି ନିଲାମ ପ୍ରକ୍ରିୟା ସମ୍ପୂର୍ଣ୍ଣ କରାଯାଇଥାଏ। ହେଲେ ସମସ୍ତ ନିୟମ ଉଲ୍ଲଂଘନ କରାଯାଇ ଜଣେ ବ୍ୟକ୍ତିଙ୍କୁ ଅହେତୁକ ଅନୁକମ୍ପା ପ୍ରଦର୍ଶନ କରାଯାଇଛି। ୪ବର୍ଷ ପୂର୍ବର ନିର୍ଦ୍ଧାରିତ ଟଙ୍କାଠାରୁ ୧ ଲକ୍ଷ ୬୦ ହଜାର ଟଙ୍କା କମ୍ରେ ନିଲାମ ଦିଆଯାଇଥିବା ଘଟଣା ସାଧାରଣରେ ସନ୍ଦେହ ସୃଷ୍ଟି କରିଛି। ନିୟମ ଅନୁଯାୟୀ ପୌରାଧ୍ୟକ୍ଷାଙ୍କ ଅନୁମୋଦନ ପରେ ନିଲାମ ପ୍ରକ୍ରିୟା କାଉନ୍ସିଲରେ ପାରିତ ହେବା ଆବଶ୍ୟକ। ଏହି ଘଟଣା କାଉନ୍ସିଲରମାନେ କିଭଳି ଜାଣିପାରିଲେ ନାହିଁ, ତାହାକୁ ନେଇ ସନ୍ଦେହ ସୃଷ୍ଟି ହୋଇଛି। ତେଣୁ ଦୁର୍ନୀତିର ତଦନ୍ତ ଭିଜିଲାନ୍ସ ବିଭାଗ ଦ୍ୱାରା କରାଗଲେ ବହୁ ରହସ୍ୟ ଉନ୍ମୋଚନ ହେବ ବୋଲି ପୂର୍ବତନ ନଗରପାଳ କହିଛନ୍ତି।
ସୂଚନାଯୋଗ୍ୟ, ନିକଟରେ ପୌର ପରିଷଦ ବୈଠକରେ ଟେଣ୍ଡର ଫିକ୍ସିଂକୁ ନେଇ ତୁମ୍ବିତୋଫାନ ହୋଇଥିଲା। ଏହାକୁ ନେଇ ଶାସକ ଦଳର କାଉନ୍ସିଲରମାନେ ଆପତ୍ତି ଉଠାଇଥିଲେ। ଫଳରେ ଟେଣ୍ଡର ବାତିଲ କରାଯିବ ବୋଲି ପୌର ନିର୍ବାହୀ ଅଧିକାରୀ ତରୁଣ କୁମାର ମହାପାତ୍ର ସୂଚନା ଦେଇଥିଲେ।
