ନୂଆଦିଲ୍ଲୀ, ୨୨।୧୦: ଲକ୍ ଡାଉନ ଖୋଲିବା ପରେ ଭାରତର ସ୍ମାର୍ଟଫୋନ୍ ବଜାରରେ ପୁଣିଥରେ ସୁଧାର ଆସିଥିବା ଦେଖିବାକୁ ମିଳିଛି। ଚଳିତ ବର୍ଷର ୩ୟ ତ୍ରୈ-ମାସିକ କ୍ୱାର୍ଟର (ଜୁଲାଇରୁ ସେପ୍ଟେମ୍ବର)ରେ ସ୍ମାର୍ଟଫୋନ୍ ବିକ୍ରି ଭାରତରେ ସର୍ବକାଳୀନ ଉଚ୍ଚସ୍ତର ଅର୍ଥାତ୍ ୫ କୋଟି ୟୁନିଟ୍ ରହିଥିଲା। ଏହି ଅବଧି ମଧ୍ୟରେ ଚାଇନାର ସମସ୍ତ କମ୍ପାନୀ ସମୁଦାୟ ବଜାର ଅଂଶର ୭୬ ପ୍ରତିଶତ ଅଂଶଗ୍ରହଣ କରିଥିଲେ।
ତଥ୍ୟ ସଂଗ୍ରହକାରୀ କମ୍ପାନୀ କେନାଲିସ ରିପୋର୍ଟ ଅନୁଯାୟୀ, ଶ୍ରେଷ୍ଠ ୫ଟି ମୋବାଇଲ ଫୋନ୍ କମ୍ପାନୀ ଜିଓମି, ସାମସଙ୍ଗ୍, ଭିଭୋ, ରିଅଲ୍ ଏବଂ ଓପୋ ଗତବର୍ଷ ସମାନ ସମୟ ତୁଳନାରେ ବିକ୍ରିରେ ବୃଦ୍ଧି ଘଟିଛି। କେନାଲିସ୍ ପକ୍ଷରୁ ଏକ ବିବୃତ୍ତିରେ କୁହାଯାଇଛି, ୨୦୨୦ର ୩ୟ ତ୍ରୈ-ମାସିକ କ୍ୱାର୍ଟରରେ ଦେଶରେ ସ୍ମାର୍ଟଫୋନ୍ ବିକ୍ରି ୮ ପ୍ରତିଶତ ବୃଦ୍ଧି ପାଇ ୫ କୋଟି ୟୁନିଟ୍ରେ ପହଞ୍ଚିଛି। ଗତବର୍ଷ ସମାନ ଏହି ସମୟରେ ଏହା ୪.୬୨ କୋଟି ୟୁନିଟ୍ ଥିଲା। ଗୋଟିଏ ତ୍ରୈ-ମାସିକ କ୍ୱାର୍ଟରରେ ଦେଶରେ ସ୍ମାର୍ଟଫୋନ୍ ବିକ୍ରିର ଏହା ସର୍ବକାଳୀନ ଉଚ୍ଚସ୍ତର ଅଟେ। ବଜାର ଅଂଶର ୨୬.୧ ପ୍ରତିଶତ ସହ ଜିଓମି ଶୀର୍ଷରେ ରହିଛି। ଜିଓମି ଏହି ସମୟ ମଧ୍ୟରେ ୧.୩୧ କୋଟି ଫୋନ ବିକ୍ରି କରିଛି। ତାଲିକାର ଦ୍ୱିତୀୟ ସ୍ଥାନରେ ଥିବା ସାମସଙ୍ଗ ୧.୦୨ କୋଟି ଫୋନ୍ ବିକ୍ରି କରି ବଜାର ଅଂଶର ୨୦.୪ ପ୍ରତିଶତ ଅଂଶଗ୍ରହଣ କରିଛି। ଏହାପରେ ଭିଭୋ, ରିଅଲମି ଓ ଓପୋ ଯଥାକ୍ରମେ ୮୮ ଲକ୍ଷ, ୮୭ ଲକ୍ଷ ଓ ୬୧ ଲକ୍ଷ ସ୍ମାର୍ଟଫୋନ୍ ବିକ୍ରି କରିଛନ୍ତି। ତେବେ ଭାରତ ଓ ଚାଇନା ମଧ୍ୟରେ ସୀମା ବିବାଦ ଚରମ ସୀମାରେ ରହିଥିଲେ ମଧ୍ୟ ଦେଶର ଜନସାଧାରଣ ଚାଇନା ମୋବାଇଲ କ୍ରୟ ନେଇ କୌଣସି ପ୍ରଭାବ ଏପର୍ଯ୍ୟନ୍ତ ଦେଖିବାକୁ ମିଳିନାହିଁ।
