ଲକ୍ଷ୍ନୌ,୨୨ା୯ : ଲିଜେଣ୍ଡ୍ସ ଲିଗ୍ କ୍ରିକେଟ ଟି୨୦ ଟୁର୍ନାମେଣ୍ଟର ଦ୍ୱିତୀୟ ସଂସ୍କରଣରେ ପ୍ରଥମ ବିଜୟ ହାସଲ କରିଛି ଗୌତମ ଗମ୍ଭୀରଙ୍କ ଇଣ୍ଡିଆ କ୍ୟାପିଟାଲ୍ସ। ଇରଫାନ ପଠାନଙ୍କ ନେତୃତ୍ୱାଧୀନ ଭିଲଓ୍ବାରା କିଙ୍ଗ୍ସକୁ ୭୮ ରନରେ ପରାସ୍ତ କରି ଦଳ ପଏଣ୍ଟ ଟେବୁଲରେ ତୃତୀୟ ସ୍ଥାନକୁ ଉନ୍ନୀତ ହୋଇଛି। ଏହି ମ୍ୟାଚରେ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲେ ଇରଫାନ। ସୋଲୋମନ୍ ମିରଙ୍କ ଦ୍ରୁତ ୮୨ ରନ ଜରିଆରେ କ୍ୟାପିଟାଲ୍ସ ନିର୍ଦ୍ଧାରିତ ୨୦ ଓଭରରେ ୫ ଉଇକେଟ ବିନିମୟେରେ ୧୯୮ ରନ କରିଥିଲା। ଜବାବରେ ଭିଲଓ୍ବାରା କିଙ୍ଗ୍ସ ୧୯.୨ ଓଭରରେ ୧୨୦ ରନରେ ଅଲଆଉଟ ହୋଇଥିଲା।
ଇଣ୍ଡିଆ କ୍ୟାପିଟାଲ୍ସର ନିୟମିତ ଅଧିନାୟକ ଗୌତମ ଗମ୍ଭୀର ଏହି ମ୍ୟାଚରେ ପ୍ରତ୍ୟାବର୍ତ୍ତନ କରିଥିଲେ। ଦୁଇ ଓପନର ଗମ୍ଭୀର(୧୨) ଓ ମିର(୮୨) ପ୍ରଥମ ଉଇକେଟରେ ଯୋଡିଥିଲେ ୨୪ ରନ୍ । ୯ ବଲରୁ ଦୁଇ ଚୌକା ସହିତ ଗମ୍ଭୀର ପ୍ୟାଭିଲିୟନ ଫେରିବା ପରେ ଜିମ୍ବାଓ୍ବେର ଦୁଇ ଖେଳାଳି ମିର ଓ ହାମିଲଟନ ମାସାକାଜା ମଙ୍ଗ ସମ୍ଭାଳିଥିଲେ। ଉଭୟ ଖେଳାଳି ୫୨ ବଲରେ ୧୦୫ ରନ୍ ଯୋଗ କରିବା ସହିତ ଏକ ବୃହତ୍ ସ୍କୋରର ମୂଳଦୁଆ ପକାଇଥିଲେ। ମିର ୩୮ ବଲ ଖେଳି ୭ ଚୌକା ଓ ୬ ଛକା ସହିତ ୮୨ ରନ୍ କରିଥିଲେ। ୩୦ ବଲ ଖେଳି ୪୮ ରନ କରିଥିବା ମାସାକାଜାଙ୍କୁ ଆଉଟ କରି ୟୁସୁଫ ପଠାନ ଏହି ଯୋଡି ଭାଙ୍ଗିଥିଲେ। ଏହାର ୨ ଓଭର ମଧ୍ୟରେ ମିରଙ୍କୁ ଆଉଟ କରିଥିଲେ ୟୁସୁଫ। ୧୩ ଓଭର ସୁଦ୍ଧା ୧୬୦ ରନ୍ କରିଥିବା କ୍ୟାପିଟାଲ୍ପ ମିର ଆଉଟ ହେବା ପରେ ଅନ୍ତିମ ୭ ଓଭରରୁ ମାତ୍ର ୩୮ ରନ୍ କରିଥିଲା। ଭିଲଓ୍ବାରା କିଙ୍ଗସ୍ ପକ୍ଷରୁ ୟୁସୁଫ ପଠାନ ୨୮ ରନରେ ୩ଟି ଉଇକେଟ ନେଇଥିବା ବେଳେ ଟିନୋ ବେଷ୍ଟ ଓ ଟିମ୍ ବ୍ରେସନାନଙ୍କୁ ମିଳିଥିଲା ଗୋଟିଏ ଲେଖାଏ ସଫଳତା। ୧୯୯ ରନ ଲକ୍ଷ୍ୟର ପିଛା କରୁଥିବା ଭିଲଓ୍ବାରା କିଙ୍ଗ୍ସର ଆରମ୍ଭ ଦୟନୀୟ ରହିଥିଲା। ଟୁର୍ନାମେଣ୍ଟର ସର୍ବାଧିକ ଉଇକେଟ ହାସଲକାରୀ ବୋଲର ପଙ୍କଜ ସିଂଙ୍କ ଘାତକ ବୋଲିଂ କାରଣରୁ ଦଳ ୨୪ ରନରେ ଦୁଇ ଓପନରଙ୍କୁ ହରାଇଥିଲା। ଦଳ ଏହି ବିପର୍ଯ୍ୟୟରୁ ମୁକୁଳି ନ ପାରି ନିୟମିତ ବ୍ୟବଧାନରେ ଉଇକେଟ ହରାଇ ଚାଲିଥିଲା। ୬୧ ରନରେ ଦଳର ୫ ବ୍ୟାଟର ପ୍ୟାଭିଲିୟନ ଫେରିବା ପରେ ପରାଜୟ ନିଶ୍ଚିତ ହୋଇଯାଇଥିଲା। ରଜତ ଭାଟିଆ, ପ୍ରବୀଣ ତାମ୍ବେ ଓ ପଙ୍କଜ ସିଂ ଦୁଇଟି ଲେଖାଏ ଏବଂ ଆସଲେ ନର୍ସ, ପ୍ରବୀଣ ଗୁପ୍ତା ଓ ଲିଆମ ପ୍ଲଙ୍କେଟ ଗୋଟିଏ ଲେଖାଏ ଉଇକେଟ ନେଇଥିଲେ। ସୋଲୋମନ୍ ମିରଙ୍କୁ ପ୍ଲେୟର ଅଫ୍ ଦ ମ୍ୟାଚ ଘୋଷଣା କରାଯାଇଥିଲା।
