ଚଟୋଗ୍ରାମ,୪।୨: ଓ୍ବେଷ୍ଟଇଣ୍ଡିଜ୍ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ରେ ଘରୋଇ ବାଂଲାଦେଶ ଆଭରେଜ ପ୍ରଦର୍ଶନ କରିଛି। ସ୍ଥାନୀୟ ଜହୁର ଅହମ୍ମଦ ଚୌଧୁରୀ ଷ୍ଟାଡିୟମରେ ବୁଧବାରଠାରୁ ଆରମ୍ଭ ହୋଇଥିବା ଏହି ଟେଷ୍ଟ ମ୍ୟାଚ୍ରେ ବାଂଲାଦେଶ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଓପନର ଶଦମନ ଇସ୍ଲାମଙ୍କ ଅର୍ଦ୍ଧଶତକ ସହାୟତାରେ ବାଂଲାଦେଶ ପ୍ରଥମ ଦିବସ ଖେଳ ଶେଷ ସୁଦ୍ଧା ପ୍ରଥମ ଇନିଂସରେ ୯୦ ଓଭରରେ ୫ ଉଇକେଟ ହରାଇ ୨୪୨ ରନ ସଂଗ୍ରହ କରିଛି। ଷ୍ଟମ୍ପ ଅପସାରଣ ବେଳକୁ ଅଭିଜ୍ଞ ଅଲରାଉଣ୍ଡର ସାକିବ ଅଲ ହାସନ ୩୯ ଓ ଉଇକେଟକିପର ବ୍ୟାଟ୍ସମ୍ୟାନ ଲିଟନ ଦାସ ୩୪ ରନ କରି ଅପରାଜିତ ରହିଛନ୍ତି।
ଇନିଂସ ଆରମ୍ଭରୁ ବାଂଲାଦେଶ ଓପନର ତାମିମ ଇକ୍ବାଲଙ୍କୁ ସଅଳ ହରାଇଥିଲା। ତାମିମ ମାତ୍ର ୯ ରନ କରି କେମର ରୋଚଙ୍କ ଦ୍ୱାରା କ୍ଲିନ୍ ବୋଲ୍ଡ ହୋଇଥିଲେ। ଏହାପରେ ଦ୍ୱିତୀୟ ଉଇକେଟ ଯୋଡିରେ ଇସ୍ଲାମ ଓ ନାଜମୁଲ ହୋସେନ ସାଣ୍ଟୋ ୪୩ ରନ କରି ସ୍ଥିତି ସମ୍ଭାଳିବାକୁ ପ୍ରୟାସ କରିଥିଲେ। ସାଣ୍ଟୋ ୨୫ ରନ କରି ଦୁର୍ଭାଗ୍ୟଜନକ ଭାବେ ରନ୍ଆଉଟ ହେବା ପରେ ଅଧିନାୟକ ମୋମିନୁଲ ହକ୍ ୨୬ ରନ କରିଥିବା ବେଳେ ଜୋମେଲ ଓ୍ବାରିକାନଙ୍କ ବଲ୍ରେ ଶର୍ଟ ମିଡ୍ ଉଇକେଟରେ ଜନ୍ କ୍ୟାମ୍ପବେଲଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏହାପରେ ୧୫୪ଟି ବଲ୍ ଖେଳି ୬ ଚୌକା ସହ ୫୯ ରନର ଅର୍ଦ୍ଧଶତକୀୟ ପାଳି ଖେଳିଥିବା ଶଦମନ ଇସଲାମ ଓ୍ବାରିକାନଙ୍କ ଦ୍ୱାରା ଏଲ୍ବିଡବ୍ଲ୍ୟ ହୋଇ ପ୍ୟାଭିଲିୟନ ଫେରିଥିଲେ। ଶେଷରେ ମୁଶଫିକର ରହିମ ୩୮ ରନକରି ପ୍ରଥମ ସ୍ଲିପ୍ରେ ରାହକିମ କର୍ନଓ୍ବାଲଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ପଞ୍ଚମ ଉଇକେଟରେ ମୁସ୍ଫିକର ଓ ସାକିମ ୫୯ ରନର ଭାଗୀଦାରି ସ୍ଥାପନ କରିଥିଲେ। ସେହିପରି ଷଷ୍ଠ ଉଇକେଟରେ ସାକିବ ଓ ଲିଟନ ଅପରାଜିତ ୪୯ରନ ସଂଗ୍ରହ କରିଥିଲେ। ବୋଲିଂରେ ଓ୍ବେଷ୍ଟଇଣ୍ଡିଜ ତରଫରୁ ଜୋମେଲ ଓ୍ବାରିକାନ ୩ ଓ କେବର ରୋଜ ଗୋଟିଏ ଉଇକେଟ ଅକ୍ତିଆର କରିଥିଲେ। ଓ୍ବେଷ୍ଟଇଣ୍ଡିଜ ଦଳ ତରଫରୁ ୩ ଜଣ ଖେଳାଳି ଲେଗ୍ ସ୍ପିନର ଏନ୍କ୍ରୁମା ବୋନର ଓ ଅଲରାଉଣ୍ଡର କାଏଲ ମେୟର୍ସ, ଶାୟେନ ମୋସେଲେ ପଦାର୍ପଣ କରିଛନ୍ତି।
ସଂକ୍ଷିପ୍ତ ସ୍କୋର:
ବାଂଲାଦେଶ ପ୍ରଥମ ଇନିଂସ- ୯୦ ଓଭରରେ ୨୪୨/୫
(ଶଦମନ ଇସ୍ଲାମ- ୫୯, ମୁଶଫିକର ରହିମ- ୩୮, ସାକିବ ଅଲ ହାସନ- ୩୯*, ଲିଟନ ଦାସ- ୩୪*, ମୋମିନୁଲ ହକ- ୨୬, ନାଜମୁଲ ହାସନ ସାଣ୍ଟୋ- ୨୫, ଜୋମେଲ ଓ୍ବାରିକାନ- ୩/୫୮, କେମର ରୋଚ- ୧/୪୪)।
