ନୂଆଦିଲ୍ଲୀ,୨୧।୩ : ବିରୋଧୀଦଳର ନେତାଙ୍କ ବିରୋଧରେ ଏନଫୋର୍ସମେଣ୍ଟ ଡାଇରେକ୍ଟୋରେଟ (ଇଡି) ଏବଂ ସେଣ୍ଟ୍ରାଲ ଇନଭେଷ୍ଟିଗେଶନ ବ୍ୟୁରୋ (ସିବିଆଇ) ବ୍ୟବହାର କରାଯାଉଥିବା ବେଳେ ମେହୁଲ ଚୋକସିଙ୍କ ନାମ ଇଣ୍ଟରପୋଲର ରେଡ କର୍ଣ୍ଣର ନୋଟିସରୁ ହଟାଯିବା ଅତ୍ୟନ୍ତ ଦୁର୍ଭଗା ଜନକ ବୋଲି କଂଗ୍ରେସ ମଙ୍ଗଳବାର ଅଭିଯୋଗ କରଛି।
କଂଗ୍ରେସ ପକ୍ଷରୁ ରାହୁଲ ଗାନ୍ଧୀ କହିଛନ୍ତି ପ୍ରଥମେ ଲୁଟ କର ଏବଂ ପରେ ନିର୍ଦ୍ଦୋଷରେ ଖଲାସ ହୂଅ। ଏହା ଏବେ ଭାଜପା ସରକାରଙ୍କ ଆଦର୍ଶରେ ପରିଣତ ହୋଇଛି। ଏହା ସରକାରଙ୍କ ନୂଆ ମଡେଲ ପାଲଟିଛି। ସେ ଟୱିଟ କରି ଏହାକୁ ମୋଡାନି ମଡେଲ ବୋଲି କହିଛନ୍ତି। ଯେଉଁମାନେ ବ୍ୟାଙ୍କରୁ ଟଙ୍କା ନେଇ ପଳାଇଛନ୍ତି ସେମାନଙ୍କୁ ସରକାର ସୁରକ୍ଷା ଦେଉଛନ୍ତି।
କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଛନ୍ତି ଯେଉଁମାନେ ଏହିପରି ଲୋକଙ୍କୁ ସୁରକ୍ଷା ଦିଅନ୍ତି ସେମାନେ ନିଜ ମୁହଁରେ ଦେଶପ୍ରେମ କଥା କହିବା ଏକ ପରିହାସ ଭଳି ମନେ ହେଉଛି। ଆମେ ଏହା ଉପରେ ସରକାରଙ୍କଠାରୁ ସ୍ପଷ୍ଟୀକରଣ ମାଗୁଛୁ।
ଭାଜପା ସରକାର ଲୋକଙ୍କ ଧ୍ୟାନ ହଟାଇବା ପାଇଁ ଜଣେ ସର୍ବୋତ୍ତମ ବନ୍ଧୁ ଆଦାନୀଙ୍କ ଲାଗି ସଂସଦକୁ ଅଚଳ କରି ରଖିଛନ୍ତି। ସେହିଭଳି ପାଞ୍ଚ ବର୍ଷ ପୂର୍ବେ ପଳାୟନ କରିଥିବା ପୁରୁଣା ବନ୍ଧୁ ଚୋକସିଙ୍କୁ କିପରି ଭୁଲି ପାରିବେ ସରକାର? ହଜାର ହଜାର କୋଟି ଟଙ୍କା ଚୋକସି ଠକି ନେଇଛନ୍ତି। ଏଭଳି ସ୍ଥଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନା ଖାନେ ଦୁଙ୍ଗା ମନ୍ତବ୍ୟ ଏକ ପରିହାସରେ ପରିଣତ ହୋଇଛି ବୋଲି ସେ କହିଛନ୍ତି।
ସୂଚନାଯୋଗ୍ୟ, ଇଣ୍ଟରପୋଲ ମେହୁଲ ଚୋକସିଙ୍କ ନାମକୁ ରେଡ କର୍ଣ୍ଣର ନୋଟିସ ଡାଟାବେସରୁ ହଟାଇ ଦେଇଛି। ପଞ୍ଜାବ ନ୍ୟାଶନାଲ ବ୍ୟାଙ୍କରେ ୧୩ ହଜାର କୋଟି ଟଙ୍କା ଠକେଇ ସହ ଜଡିତ ମାମଲା ରହିଛି। ଫ୍ରାନ୍ସର ଲିୟନ ସହରର ଇଣ୍ଟରପୋଲ ମୁଖ୍ୟାଳୟରେ ଚୋକସି ଦାଖଲ କରିଥିବା ଆବେଦନ ଆଧାରରେ ଏହି ପଦକ୍ଷେପ ନିଆଯାଇଛି।
