ନୂଆଦିଲ୍ଲୀ, ୩୧।୮ : ଗର୍ଭାଶୟ କର୍କଟ ବିରୋଧରେ ଭାରତ ପ୍ରଥମ ସ୍ବଦେଶୀ ଟିକା ପାଇବାକୁ ଯାଉଛି। ଏହା ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ ଏବଂ ବାୟୋଟେକ୍ନୋଲୋଜି ବିଭାଗ ଦ୍ୱାରା ସେପ୍ଟେମ୍ବର ୧ରେ ଶୁଭାରମ୍ଭ ହେବ। ସରକାରୀ ସୂତ୍ର ଅନୁଯାୟୀ, ଭାରତର ପ୍ରଥମ ସ୍ବଦେଶୀ ଟିକା କ୍ୱାଡ୍ରିଭେଲେଣ୍ଟ ହ୍ୟୁମାନ ପାପିଲୋମାଭାଇରସ ଟିକା (କ୍ୟୁଏଚପିଭି)ର ଗୁରୁବାର ଶୁଭାରମ୍ଭ କରାଯିବ।
ଏହି ଟିକା ୯ ରୁ ୧୪ ବର୍ଷ ବୟସର ବାଳିକାମାନଙ୍କୁ ଦିଆଯାଇପାରେ। ପ୍ରଥମେ ଏହି ଟିକା କେବଳ ବାଳିକାମାନଙ୍କୁ ଦିଆଯିବ। କିନ୍ତୁ ପରେ ଏହା ବାଳକମାନଙ୍କୁ ମଧ୍ୟ ଦିଆଯିବ। ଦେଶରେ ଟିକା ପ୍ରସ୍ତୁତ କରାଯାଉଥିବାରୁ ଏହାର ମୂଲ୍ୟ ଏକ ବଡ଼ ପ୍ରତିବନ୍ଧକ ହେବ ନାହିଁ।
ଦେଶରେ ବର୍ତ୍ତମାନ ଦୁଇଟି ଏଚପିଭି ଟିକା ଅଛି, ଯାହା ବିଦେଶୀ କମ୍ପାନୀ ଦ୍ୱାରା ନିର୍ମିତ । ଏହି ଟିକାଗୁଡ଼ିକ ମଧ୍ୟରୁ ଗୋଟିଏ ହେଉଛି ଗାର୍ଡାସିଲ, ଯାହା ମର୍କ ଦ୍ୱାରା ନିର୍ମିତ ହୋଇଥିବାବେଳେ ଅନ୍ୟଟି ହେଉଛି ସର୍ଭାରିକ୍ସ, ଯାହା ଗ୍ଲାକ୍ସୋ ସ୍ମିଥକାଇନ ଦ୍ୱାରା ନିର୍ମିତ। ବଜାରରେ ଏଚପିଭି ଟିକା ମୂଲ୍ୟ ପ୍ରାୟ ୨ ହଜାର ରୁ ୩ ହଜାର ଟଙ୍କା ରହିଛି। ଆଶାକରା ଯାଉଛି ଯେ ସେରମ ଏହି ସେଗମେଣ୍ଟରେ ପ୍ରବେଶ କଲାବେଳେ ଟିକାର ଦାମ୍ ହ୍ରାସ ପାଇବ। ଏହି ଟିକାକୁ ସରକାରଙ୍କ ଜାତୀୟ ଟିକାକରଣ ଅଭିଯାନରେ ଅନ୍ତର୍ଭୁକ୍ତ କରି ମହିଳାଙ୍କ ଗର୍ଭାଶୟ କର୍କଟ ସମସ୍ୟାକୁ ହ୍ରାସ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ ବୋଲି କୁହାଯାଉଛି।
ଏଚପିଭି କେନ୍ଦ୍ରର ସଦ୍ୟତମ ଆକଳନ ଅନୁଯାୟୀ, ଭାରତରେ ପ୍ରତିବର୍ଷ ଏକ ଲକ୍ଷ ୨୩ ହଜାରରୁ ଅଧିକ ମହିଳା ଏହି କର୍କଟ ସମସ୍ୟାର ଶିକାର ହୁଅନ୍ତି ଏବଂ ଏଥିରୁ ୭୭ ହଜାରରୁ ଅଧିକ ମହିଳାଙ୍କର ମୃତ୍ୟୁ ଘଟିଥାଏ। ଉପଲବ୍ଧ ତଥ୍ୟ ଅନୁଯାୟୀ, ବର୍ତ୍ତମାନ ଦେଶରେ ପ୍ରାୟ ପାଞ୍ଚ ପ୍ରତିଶତ ମହିଳା ଏହି ସମସ୍ୟାରେ ପୀଡିତ ଅଛନ୍ତି। ପ୍ରାୟ ୮୩ ପ୍ରତିଶତ ଗର୍ଭାଶୟ କର୍କଟରେ ଏଚପିଭି ୧୬ କିମ୍ବା ୧୮ ସଂକ୍ରମଣ ଦ୍ୱାରା ହୋଇଥାଏ। ଏଚପିଭି ସଂକ୍ରମଣ ହେଉଛି ଗର୍ଭାଶୟ କର୍କଟର ମୁଖ୍ୟ କାରଣ। ସମଗ୍ର ବିଶ୍ୱରେ ପ୍ରାୟ ୭୦ ପ୍ରତିଶତ ଗର୍ଭାଶୟ କର୍କଟ ଏହା ଯୋଗୁ ହୋଇଥାଏ।
