ଭଞ୍ଜନଗର,୨୮।୪(ଡି.ଏନ.ଏ.): ଘୁମୁସର ଉତ୍ତର ବନଖଣ୍ଡର ମୁଜାଗଡ଼, ଗାଲେରି ଏବଂ ତାରସିଂ ରେଞ୍ଜରେ ଜଙ୍ଗଲ ପୋଡ଼ି ବଢ଼ିବାରେ ଲାଗିଛି। ଏଥିଲାଗି ବନ୍ୟପ୍ରାଣୀ ବିପଦରେ ପଡ଼ୁଥିବା ବେଳେ ମୂଲ୍ୟବାନ ଗଛ ମଧ୍ୟ ଧ୍ୱଂସ ପାଉଛି । ଏହାକୁ ନେଇ ପରିବେଶବିତ୍ ଚିନ୍ତା ପ୍ରକଟ କରିଛନ୍ତି। ଅନ୍ୟପକ୍ଷରେ ଭଞ୍ଜନଗର ଅଞ୍ଚଳରେ ଗତ କିଛିଦିନ ହେବ ତାପମାତ୍ରା ବୃଦ୍ଧି ଯୋଗୁ ଅଧିକାଂଶ ସ୍ଥାନରେ ବନ କର୍ମଚାରୀମାନେ ନିଆଁକୁ ଆୟତ୍ତ କରିବାରେ ସକ୍ଷମ ହୋଇପାରୁନାହାନ୍ତି । ଫଳରେ ନିଆଁ ଅଧିକ ଅଞ୍ଚଳକୁ ବ୍ୟାପି ଯାଉଛି। ଏଭଳି ସ୍ଥିତିରେ ଜଗନ୍ନାଥପ୍ରସାଦ ରେଞ୍ଜ ତିରିକୁମ୍ପା ଜଙ୍ଗଲରେ ବନ୍ୟପ୍ରାଣୀ ଶିକାର ଉଦ୍ଦେଶ୍ୟରେ ବୁଧବାର ରାତିରେ ଜଙ୍ଗଲରେ ନିଆଁ ଲଗାଉଥିଲେ। ରେଞ୍ଜର ଉମାକାନ୍ତ ଦାସ ଏହି ସୂଚନା ପାଇ ଅଭିଯୁକ୍ତଙ୍କୁ ଗିରଫ କରିବାକୁ ନିର୍ଦ୍ଦେଶ ଦେଇଥିଲେ। ବନପାଳ କଳାବଦନ ଦାସ, ପ୍ରଦ୍ୟୁମ୍ନ ବିଷୋୟୀ, ଇଶୁଆ ଗଣେଶ, ଲମ୍ବୋଦର ଗୌଡ଼ ପ୍ରମୁଖ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଅମର ବେହେରାଙ୍କୁ କାବୁ କରିଥିଲେ। ଗୁରୁବାର ତାଙ୍କୁ ଭଞ୍ଜନଗର କୋର୍ଟ ଚାଲାଣ କରାଯାଇଛି । ଏହାପୂର୍ବରୁ ଗତ ୨୪ ତାରିଖରେ କୁରୁତାଇ ଜଙ୍ଗଲ ନିକଟରେ ୩ ଯୁବକ କୁଟୁରା ମାଂସ ଧରି ଆସୁଥିବା ବେଳେ ହରିଡ଼ାପଦର ଗ୍ରାମର ୨ଜଣଙ୍କୁ ଗିରଫ କରାଯାଇଥିଲା। ଅନ୍ୟ ଅଭିଯୁକ୍ତ ଜଣକ ଫାଙ୍କା ଗୁଳିଚାଳନା କରି ଚମ୍ପଟ ମାରିଥିଲେ । ଏନେଇ ବନ ବିଭାଗ ପକ୍ଷରୁ ତାରସିଂ ଥାନାରେ ଅଭିଯୋଗ କରାଯାଇଥିବାି ରେଞ୍ଜର ଉମାକାନ୍ତ ଦାସ ସୂଚନା ଦେଇଛନ୍ତି ।
