ସୁନାବେଡ଼ା,୨।୪(ସ୍ବ. ପ୍ର.): ସୁନାବେଡ଼ା ହାଲ୍ ନିକଟବର୍ତ୍ତୀ ଅଞ୍ଚଳରେ ଅନେକ ଜଙ୍ଗଲ ରହିଛି। ଏହିସବୁ ଜଙ୍ଗଲରେ ବିଭିନ୍ନ ସମୟରେ ନିଆଁ ଲାଗିବା ଏବେ ପ୍ରଶାସନ ପାଇଁ ଚିନ୍ତାର ବିଷୟ ହୋଇଛି। ବୁଧବାର ହାଲ୍ର ଆର୍ ଜୋନ୍ରେ ଥିବା ଜଙ୍ଗଲରେ ନିଆଁ ଲାଗିଥିବା ବେଳେ ଗୁରୁବାର ଷ୍ଟେଟବ୍ୟାଙ୍କ ସମ୍ମୁଖରେ ଥିବା ଜଙ୍ଗଲରେ ନିଆଁ ଲାଗିଛି। ଖବର ପାଇ ହାଲ୍ର ଅଗ୍ନିଶମ ବିଭାଗ କର୍ମଚାରୀ ପହଞ୍ଚତ୍ ଦୀର୍ଘ ୪ ଘଣ୍ଟା ପରିଶ୍ରମ କରି ନିଆଁକୁ ଆୟତ୍ତ କରିଛନ୍ତି। ନିଆଁ ଲାଗିବା ଯୋଗୁ ଜଙ୍ଗଲରେ ଥିବା ବହୁ ଛୋଟ ବଡ଼ ଗଛ ଜଳିଯାଇଛି। ଜଙ୍ଗଲଟି ସହରର ମଧ୍ୟଭାଗରେ ଥିବାରୁ ଜଙ୍ଗଲ ପାର୍ଶ୍ୱ ରାସ୍ତା ଦେଇ ପ୍ରତ୍ୟହ ଲୋକେ ଯାତାୟାତ କରିଥାନ୍ତି। ନିଆଁ ଯୋଗୁ ବେଶ୍ କିଛି ସମୟ ଧରି ସହର ପରିବେଶ କୁହୁଡ଼ି ପରି ଧୂଆଁମୟ ହୋଇଯାଇଥିଲା। କେତେଜଣ ବ୍ୟକ୍ତି ସିଗାରେଟ କିମ୍ବା ବିଡ଼ି ଟାଣି ସାରିବା ପରେ ବଳକା ଅଂଶକୁ ଏଣେତେଣେ ଫିଙ୍ଗିବା ଦ୍ୱାରା ଜଙ୍ଗଲରେ ନିଆଁ ଲାଗୁଥିବା ଆଲୋଚନା ହେଉଛି। ହାଲ୍ ସୁରକ୍ଷା ବିଭାଗ ଏବଂ ବନ ବିଭାଗ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି।
