ପାରାଦୀପ,୨।୪(ସ୍ବ.ପ୍ର.): ପାରାଦୀପ ବନ୍ଦର ୨୦୨୦-୨୧ ଆର୍ଥତ୍କ ବର୍ଷରେ ୧୧୪.୫୫ ମିଲିୟନ ଟନ୍ ପଣ୍ୟ କାରବାର କରିଛି। ଲଗାତର ୪ର୍ଥ ଆର୍ଥିକ ବର୍ଷରେ ୧୦୦ ମିଲିୟନ ଟନ୍ରୁ ଊର୍ଦ୍ଧ୍ୱ ପଣ୍ୟ କାରବାର କରିବାର ରେକର୍ଡ ହାସଲ କରିଛି ବୋଲି ଗୁରୁବାର ଏକ ଖବରଦାତା ସମ୍ମିଳନୀରେ ବନ୍ଦର ଅଧ୍ୟକ୍ଷ ଭିନିତ୍ କୁମାର କହିଛନ୍ତି। ମଧୁବନସ୍ଥିତ ଅଫିସର୍ସ କ୍ଲବ ପରିସରରେ ଆୟୋଜିତ ସମ୍ମିଳନୀରୁ ମିଳିଥିବା ସୂଚନା ଅନୁସାରେ, ପାରାଦୀପ ବନ୍ଦର ୨୦୧୭-୧୮ ଆର୍ଥିକ ବର୍ଷରେ ୧୦୨.୦୧, ୨୦୧୮-୧୯ରେ ୧୦୯.୧୯, ୨୦୧୯-୨୦ରେ ୧୧୨.୬୯ ମିଲିୟନ ଟନ୍ ପଣ୍ୟ କାରବାର କରିଥିଲା। ଚଳିତବର୍ଷ ହୋଇଥିବା ପଣ୍ୟ କାରବାରରୁ ବନ୍ଦର ୭୨୨କୋଟି ଟଙ୍କା ଲାଭ କରିଛି। ଟିକସ ବାଦ୍ ୪୭୬କୋଟି ଟଙ୍କା ଲାଭ ହୋଇଛି। ବନ୍ଦରରେ ପ୍ରତିଦିନ ହାରାହାରି ୨୪ ହଜାର ମେଟ୍ରିକ ଟନ୍ ପଣ୍ୟ କାରବାର ହୋଇଛି। ତୈଳ କାରବାର ବ୍ୟତୀତ ବଲ୍କ କାର୍ଗୋ ମଧ୍ୟ ଅଧିକ ହୋଇଛି। ଯାହା ଦେଶର ବୃହତ ବନ୍ଦର କ୍ଷେତ୍ରରେ ୨ୟ ବୋଲି କୁହାଯାଇଛି। ଚଳିତବର୍ଷ ୨ଟି ବୃହତ ପ୍ରକଳ୍ପ ଶେଷ ହେବ। ସେଗୁଡିକ ହେଲା ନୂତନ କୋଲ ହ୍ୟାଣ୍ଡଲିଂ ପ୍ଲାଣ୍ଟ ଓ କେଆଇସିଟି ବର୍ଥ। କୋଲ ହ୍ୟାଣ୍ଡଲିଂ ପ୍ଲାଣ୍ଟ ପାଇଁ ୧୪୪୦ କୋଟି ଓ କେଆଇସିଟି ପାଇଁ ୬୫୦ କୋଟି ଟଙ୍କା ଖର୍ଚ୍ଚ ହୋଇଛି। ଏହାବାଦ ଓ୍ବେଷ୍ଟର୍ଣ୍ଣ ଡକ୍ ପାଇଁ ୩ ହଜାର କୋଟି ଟଙ୍କା ଖର୍ଚ୍ଚ ହୋଇଛି। ଯେଉଁଥିରେ ବୃହତ ପାନାମାକ୍ସ ଜାହାଜ ଲାଗି ପାରିବ। ରାଜ୍ୟ ସରକାରଙ୍କ ସହଭାଗିତାରେ ୩୦୦ ଏକର ଜାଗାରେ ୩ଟି ଶିଳ୍ପ ସ୍ଥାପନ ହେବାକୁ ଯାଉଛି। ମଲ୍ଟିମୋଡାଲ କରିଡର, କଣ୍ଟେନର ୟାର୍ଡ ଆଦି କରାଯାଉଛି। ଏସବୁ ପ୍ରକଳ୍ପ କାର୍ଯ୍ୟକାରୀ ହେଲେ ଲଜେଷ୍ଟିକ୍ ଖର୍ଚ୍ଚ କମିବା ସହ ପଣ୍ୟ କାରବାର ବୃଦ୍ଧି ପାଇବ। ଫଳରେ ପାରାଦୀପ ଦେଶର ୧ ନମ୍ବର ବନ୍ଦର ମାନ୍ୟତା ପାଇବ। ଏଥିସହ ବିଶ୍ବସ୍ତରୀୟ ବନ୍ଦର ହୋଇପାରିବ ବୋଲି ଅଧ୍ୟକ୍ଷ କୁମାର କହିଥିଲେ। ଅନ୍ୟମାନଙ୍କ ମଧ୍ୟରେ ଉପାଧ୍ୟକ୍ଷ ଏ.କେ. ବୋଷ, ଉପସଂରକ୍ଷକ ଅତୁଲ୍ୟ କୁମାର ମହାପାତ୍ର, ସିଏମ୍ଓ ଡା.ପ୍ରହଲ୍ଲାଦ ପଣ୍ଡା, ଟ୍ରାଫିକ ମ୍ୟାନେଜର ଏସ୍.କେ ମିଶ୍ର, ସିଏମ୍ଇ ଏସ୍.କେ. ଦାସଙ୍କ ସମେତ ଅନ୍ୟ ବିଭାଗୀୟ ମୁଖ୍ୟମାନେ ଉପସ୍ଥିତ ଥିଲେ।
