ନୂଆଦିଲ୍ଲୀ,୧୩ ।୯: ହାଇଦ୍ରାବାଦର ସିକନ୍ଦରାବାଦ ଅଞ୍ଚଳରେ ସୋମବାର ରାତିରେ ଏକ ଘରେ ଭୟଙ୍କର ଅଗ୍ନିକାଣ୍ଡ ହୋଇଛି । ଏଥିରେ ୬ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଥିଲା । ବିଲଡିଂର ଗ୍ରାଉଣ୍ଡ ଫ୍ଲୋରରେ ଇଲେକ୍ଟ୍ରିକ ସ୍କୁଟର ଶୋ’ରୁମ ଥିଲା । ଏହାର ୪ ମହଲା ଉପରେ ଏକ ହୋଟେଲ ରହିଛି । ତେବେ ଇଲେକ୍ଟ୍ରିକ ସ୍କୁଟର ଚାର୍ଜ କରାଯିବା ବେଳେ ବ୍ୟାଟେରି ଫାଟି ଅଗ୍ନିକାଣ୍ଡ ଘଟିଥିବା କୁହାଯାଉଛି । ଏବେ ଏହି ଘଟଣାରେ ମୃତକଙ୍କ ସଂଖ୍ୟା ୮ରେ ପହଞ୍ଚିଥିବା ଜଣାପଡିଛି । ଆହତଙ୍କୁ ତୁରନ୍ତ ହସ୍ପିଟାଲରେ ପହଞ୍ଚାଯାଇଛି । ଅନେକ ଗୁରୁତର ଥିବାରୁ ଆଗକୁ ମୃତ୍ୟୁ ସଂଖ୍ୟା ବଢିପାରେ ବୋଲି ଅନୁମାନ କରାଯାଉଛି । ତେବେ ଇଲେକ୍ଟ୍ରିକ ସ୍କୁଟର ଚାର୍ଜିଂ ପଏଣ୍ଟରେ ନିଆଁ ଲାଗି ବ୍ୟାଟେରି ଫାଟିବାରୁ ଏହି ଅଘଟଣ ହୋଇଥିବା କୁହାଯାଉଛି ।
ଏହି ଘଟଣାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଃଖ ପ୍ରକାଶ କରିବା ସହ ମୃତାହତଙ୍କ ପାଇଁ ସହାୟତା ରାଶି ଘୋଷଣା କରିଛନ୍ତି । ମୃତକଙ୍କ ପରିବାରକୁ ପ୍ରଧାନମନ୍ତ୍ରୀଙ୍କ ରିଲିଫ ପଣ୍ଡରୁ ୨ ଲକ୍ଷ ଟଙ୍କା ଓ ଆହତଙ୍କୁ ୫୦ ହଜାର ଟଙ୍କାର ସହାୟତା ରାଶି ଘୋଷଣା କରାଯାଇଛି ।
ତେବେ ବିଲଡିଂରେ ହଠାତ୍ ନିଆଁ ଲାଗିଯିବାରୁ କେତେଜଣ ଲୋକେ ଜୀବନ ବଞ୍ଚାଇବାକୁ ତଳକୁ ଡେଇଁ ପଡିବାରୁ ଆହତ ହୋଇଛନ୍ତି । ସ୍ଥିତି ସର୍ମ୍ପକରେ ଜାଣିବାକୁ ମନ୍ତ୍ରୀ ଟି ଶ୍ରୀନିବାସ ଯାଦ, ଗୃହମନ୍ତ୍ରୀ ମହମୁଦ ଅଲି ଓ ହାଇଦ୍ରାବାଦ ସିଟି ପୋଲିସ କମିଶନର ଆନନ୍ଦ ଘଟଣା ସ୍ଥଳରେ ପହଞ୍ଚିଛନ୍ତି । ନିଆଁ ଲିଭାଇବାକୁ ତୁରନ୍ତ ଦମକଳ ଗାଡି ସେଠାରେ ପହଞ୍ଚିଛି ।
