ପୁରୀ ଅଫିସ,୧୨।୫: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଅଧୀନରେ ଚାଲିଥିବା ବେଆଇନ ନିର୍ମାଣ ଓ ଖନନ କାର୍ଯ୍ୟ ବିରୋଧରେ ହୋଇଥିବା ମାମଲାର ଶୁଣାଣି କରି ପୁରୀ ଜିଲାପାଳ, ଓଡ଼ିଶା ବ୍ରିଜ୍ ଆଣ୍ଡ କନ୍ଷ୍ଟ୍ରକ୍ଶନ କମ୍ପାନୀ (ଓବିସିସି) ଏବଂ ଟାଟା ପ୍ରୋଜେକ୍ଟ ଲିମିଟେଡ୍ ବିରୋଧରେ ମାମଲା ରୁଜୁ ପାଇଁ ସିଂହଦ୍ୱାର ପୋଲିସକୁ ପୁରୀ ଏସ୍ଡିଜେଏମ୍ ନିର୍ଦ୍ଦେଶ ଦେଇଛନ୍ତି। ଉପରୋକ୍ତ ୩ ପକ୍ଷଙ୍କ ବିରୋଧରେ ଆବେଦନକାରୀ କରିଥିବା ଏତଲାକୁ ଗ୍ରହଣ କରିବା ସହ ତଦନ୍ତ ନିମନ୍ତେ ପୋଲିସକୁ କୋର୍ଟ କହିଛନ୍ତି। ସୂଚନାଯୋଗ୍ୟ, ଓକିଲ ସଂଘ ପକ୍ଷରୁ ପ୍ରଥମେ ଏକ ଫ୍ୟାକ୍ଟ ଫାଇଣ୍ଡିଂ ଟିମ୍ ଗଠନ କରାଯାଇ ନିର୍ମାଣ କାର୍ଯ୍ୟର ସମୀକ୍ଷା କରାଯାଇଥିଲା। ପରେ ନିର୍ମାଣ କାର୍ଯ୍ୟ ବେଆଇନ ଭାବେ କରାଯାଉଥିବା ଅଭିଯୋଗ କରି ପୁରୀ ଜିଲାପାଳ, ଓବିସିସିର ଅଧିକାରୀ ଏବଂ ଟାଟା ପ୍ରୋଜେକ୍ଟ ଲିମିଟେଡ୍ର ପ୍ରୋଜେକ୍ଟ ମ୍ୟାନେଜରଙ୍କ ବିରୋଧରେ ସିଂହଦ୍ୱାର ଥାନାରେ ଗତ ମାର୍ଚ୍ଚ ୧୬ତାରିଖରେ ଏତଲା ଦିଆଯାଇଥିଲା। ହେଲେ ପୋଲିସ ଏତଲାକୁ ଗ୍ରହଣ ନ କରିବାରୁ ଏସ୍ଡିଜେଏମ୍ କୋର୍ଟରେ ଏନେଇ ଏକ ମାମଲା ଦାୟର ହୋଇଥିଲା। ଆନ୍ସିଏଣ୍ଟ ମନୁମେଣ୍ଟସ ଆଣ୍ଡ ଆର୍କିଓଲୋଜିକାଲ ସାଇଟ୍ସ ରିମେନ୍ସ(ଆମସାର୍) ଆକ୍ଟ-୧୯୫୮ ଧାରା ୩୦(ଏ) ଓ ଆଇପିସି ଧାରା ୧୬୬(ଏ)ରେ ତଦନ୍ତ କରିବାକୁ ସିଂହଦ୍ୱାର ଥାନାକୁ ନିର୍ଦ୍ଦେଶ ଦିଆଯାଇଛି। ଆଇନଜୀବୀ ଶରତ ରାୟଗୁରୁ କହିଛନ୍ତି, ଆମ୍ସାର୍ ଆକ୍ଟକୁ ଉଲ୍ଲଂଘନ କରି ବେଆଇନ ନିର୍ମାଣ କାର୍ଯ୍ୟ ହେଉଥିବା ଅଭିଯୋଗ କରିଥିଲୁ। ଏତଲାକୁ ଗ୍ରହଣ କରା ନ ଯିବାରୁ ଗତ ଏପ୍ରିଲ ୧୩ରେ ଏସ୍ଡିଏଜେଏମ୍ଙ୍କ ନିକଟରେ ଏକ ଓ୍ବାନ୍ସିସି ମକଦ୍ଦମା (ନଂ.୧୦୨/୨୦୨୨) ଦାଖଲ କରିଥିଲୁ। ମାମଲାରେ ଉଲ୍ଲେଖ ରହିଥିଲା ଯେ, ଶ୍ରୀମନ୍ଦିର ଚାରିପାଖରେ ବେଆଇନ ନିର୍ମାଣ କାର୍ଯ୍ୟ ହେଉଥିବାବେଳେ ଏନେଇ ଏତଲା ଗ୍ରହଣ କରାଯାଉନାହିଁ। ଆମ୍ସାର୍ ଆକ୍ଟ-୧୯୫୮ ଅନୁଯାୟୀ, ୨ବର୍ଷ କାରାଦଣ୍ଡ ଓ ୧ ଲକ୍ଷ ଟଙ୍କାର ଜରିମାନାର ପ୍ରାବଧାନ ରହିଛି। ଆମସାର୍ ଆକ୍ଟ- ୩୦(ଏ) ଦଣ୍ଡ ବିଧାନ ଅନୁଯାୟୀ ଦଫା ଲଗାଯାଇ ମକଦ୍ଦମା କରାଯାଇଥିଲା। ଏହା ବ୍ୟତୀତ ଆମ୍ସାର୍ ଆକ୍ଟ (୧୯୫୮)ର ୩୦(ବି), ୩୦(ସି) ଓ ୧୬୬ ଓ ୩୪ ଆଇପିସି ଧାରା ଆଧାରରେ ଥାନାରେ ମାମଲା ରୁଜୁ ହୋଇଥିବା ଏସ୍ଡିଜେଏମ୍ କୋର୍ଟରେ ଉଲ୍ଲେଖ କରାଯାଇଥିଲା। ଏସଡିଜେଏମ୍ କୋର୍ଟରେ ମାମଲା ରୁଜୁ କରିଥିବା ଆବେଦନକାରୀ ତଥା ପୁରୀ ଜିଲା ଓକିଲ ସଂଘର ସମ୍ପାଦକ ବିଭୂତି ଶଙ୍କର ତ୍ରିପାଠୀ କହିଛନ୍ତି, ଏସ୍ଡିଜେଏମ୍ କୋର୍ଟଙ୍କ ରାୟ ସ୍ବାଗତଯୋଗ୍ୟ। କୋର୍ଟ ନିଷ୍ପତ୍ତି କ୍ରମେ ପୋଲିସ ଏତଲା ପଞ୍ଜୀକୃତ କରି କାର୍ଯ୍ୟାନୁଷ୍ଠାନ ନେବ ବୋଲି ଆଶା ରହିଛି।
