ଭୁବନେଶ୍ୱର,୨୦।୧୦: ଇମ୍ଫାର ପରିଚାଳନା ନିର୍ଦ୍ଦେଶକ ତଥା ଫିକି ଇଣ୍ଡିଆର ବରିଷ୍ଠ ଉପସଭାପତି (ସିନିୟର ଭାଇସ୍ ପ୍ରେସିଡେଣ୍ଟ) ଶୁଭ୍ରକାନ୍ତ ପଣ୍ଡାଙ୍କ ନେତୃତ୍ୱରେ ଦେଶର ପ୍ରମୁଖ କମ୍ପାନୀର ସିଇଓମାନଙ୍କର ଏକ ପ୍ରତିନିଧି ମଣ୍ଡଳୀ ନିକଟରେ ଆମେରିକା ଗସ୍ତ କରିଥିଲା। ଏହି ପରିପ୍ରେକ୍ଷୀରେ ୱାଶିଂଟନଠାରେ ଆମେରିକା ଗସ୍ତରେ ଥିବା କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କ ସହ ଏକ ସୌଜନ୍ୟମୂଳକ ସାକ୍ଷାତ ଓ ଆଲୋଚନା ହୋଇଥିଲା। ଏହି ପ୍ରତିନିଧି ଦଳ ଜର୍ଜ ୱାଶିଂଟନ ବିଶ୍ୱବିଦ୍ୟାଳୟର ପ୍ରଫେସର ଓ ଛାତ୍ର, ଓଆର୍ଏଫ୍ ଆମେରିକା ଏବଂ ଆଟଲାଣ୍ଟିକ୍ କାଉନସିଲ୍ ଭଳି ଥିଙ୍କ୍ ଟ୍ୟାଙ୍କ୍ ଏବଂ ଆନ୍ତର୍ଜତିକ ମୁଦ୍ରାପାଣ୍ଠି (ଆଇଏମ୍ଏଫ୍) ମୁଖ୍ୟ ଅର୍ଥନୀତିଜ୍ଞଙ୍କ ସହ ଆଲୋଚନା କରିଥିଲେ।
ଆମେରିକାରେ ଅବସ୍ଥାପିତ ଭାରତର ରାଷ୍ଟ୍ରଦୂତ ତରଣଜିତ ସିଂ ସାନ୍ଧୁ ଏହି ଅବସରରେ ଫିକି ପ୍ରତିନିଧି ଦଳ ସହ ଏକ ସାକ୍ଷାତ ଆଲୋଚନା କରିଥିଲେ। ଏହି ଅବସରରେ ସାନ୍ଧୁ ଏକ ସୁସ୍ଥ ଦ୍ବିପାକ୍ଷିକ ବାଣିଜି୍ୟକ ସମ୍ପର୍କ ଦ୍ୱାରା ଭାରତ-ଆମେରିକା ଦୁଇ ଦେଶ ମଧ୍ୟରେ ସମ୍ପର୍କ ସୁଦୃଢ଼ ହେବା ନେଇ ପରାମର୍ଶ ଦେଇଥିଲେ। ଏହି ଗସ୍ତ ଅବସରରେ କେନ୍ଦ୍ର ଅର୍ଥମନ୍ତ୍ରୀଙ୍କ ସହ ଏକ ଉଚ୍ଚସ୍ତରୀୟ ଆଲୋଚନା ହୋଇଥିଲା। ୟୁପିଆଇ, ଡିଜି ଲକର ଭଳି ଡିଜିଟାଲାଇଜେଶନ ପଦକ୍ଷେପ ଦ୍ୱାରା ହୋଇଥିବା ଭାରତର ସଫଳ ଅଭିବୃଦ୍ଧି କାହାଣୀକୁ ଇନ୍ଭେଷ୍ଟର ଓ ନୀତି ନିର୍ଦ୍ଧାରକମାନଙ୍କ ପାଖରେ ଉପସ୍ଥାପନ କରିଥିବା ଯୋଗୁ ପଣ୍ଡା କେନ୍ଦ୍ରମନ୍ତ୍ରୀଙ୍କୁ ପ୍ରଶଂସା କରିଥିଲେ। ଭାରତ ବିଶ୍ୱ ଯୋଗାଣ ଶୃଙ୍ଖଳାକୁ ଆକର୍ଷିତ କରିବାର ସୁଯୋଗ ମଧ୍ୟ ରହିଛି ଏବଂ ଫିକି ଏହି ଦିଗରେ କାର୍ଯ୍ୟ କରିବା ନେଇ ପଣ୍ଡା ସୂଚନା ଦେଇଥିଲେ।
