ଜଗତ୍ସିଂହପୁର ଅଫିସ,୩୧ା୧: ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଜଗତ୍ସିଂହପୁର ୪ନଂ. ଜୋନ ସଭ୍ୟ ପଦ ଅଣସଂରକ୍ଷିତ ରହିଛି। ଗତ ନିର୍ବାଚନରେ ଏହି ଜୋନଟି ଅନୁସୂଚିତ ଜନଜାତି ମହିଳାଙ୍କ ପାଇଁ ସଂରକ୍ଷିତ ଥିଲା। ଚଳିତ ଥର ଏହି ଆସନ ପାଇଁ ବିଜେଡି ଓ କଂଗ୍ରେସ ପ୍ରାର୍ଥୀ ପୂର୍ବରୁ ରାଜନୀତି ସହ ସମ୍ପୃକ୍ତ ଥିବା ବେଳେ ଭାଜପା ପକ୍ଷରୁ ନୂଆ ମୁହଁ ଦିଆଯାଇଛି। ପ୍ରାର୍ଥୀମାନେ ଜୋରଦାର ପ୍ରଚାର ଚଳାଇଥିବାବେଳେ ଜୋନରେ ତ୍ରିମୁଖୀ ଲଢେଇ ହେବ ବୋଲି ସାଧାରଣରେ ଆଲୋଚନା ହେଉଛି।
ଜଗତ୍ସିଂହପୁର ୪ ନଂ.ଜିଲା ପରିଷଦ ଜୋନ ଓଡ଼ିଶୋ, କାଦୁଆପଡ଼ା, ବଳରାମପୁର, ପିତେଇପୁର, ମୁଦୁପୁର ଓ ଅଳସୁଧାକୁ ନେଇ ଗଠିତ। ଜୋନରୁ ବିଜେଡି ପ୍ରାର୍ଥୀ ଭାବେ ବିବେକାନନ୍ଦ ବେହେରା, କଂଗ୍ରେସରୁ ନାରାୟଣ ନାୟକ, ଭାଜପାରୁ ଲିଙ୍ଗରାଜ ଲେଙ୍କା ଓ ବିଏସ୍ପିରୁ ପରିନା ବିବି ପ୍ରାର୍ଥୀ ହୋଇଛନ୍ତି। ତେବେ ବିଜେଡି, କଂଗ୍ରେସ ଓ ଭାଜପା ମଧ୍ୟରେ ଏଠାରେ ପ୍ରତିଦ୍ୱନ୍ଦ୍ୱିତା ହେଉଛି ବୋଲି ସ୍ଥାନୀୟ ବୁଦ୍ଧିଜୀବୀମାନେ କହିଛନ୍ତି।
ଗତ ନିର୍ବାଚନରେ ଏହି ଜୋନରୁ କଂଗ୍ରେସ ପ୍ରାର୍ଥୀ ଜାନକୀ ପ୍ରଧାନଙ୍କୁ ପରାସ୍ତ କରି ବିଜେଡିର ବିଳାସିନୀ ଦେବୀ ସଭ୍ୟ ହୋଇଥିଲେ। ଏଥର ମଧ୍ୟ ଅନୁରୂପ ଫଳ ବିଜେଡି ପ୍ରାର୍ଥୀ ବେହେରା ଆଶା କରିଛନ୍ତି। ଏ ସମ୍ପର୍କରେ ବେହେରା କହିଛନ୍ତି, ୨୦୧୨ରୁ ୧୭ ମଧ୍ୟରେ ତାଙ୍କ ସ୍ତ୍ରୀ ଏହି ଜୋନରୁ ଜିଲା ପରିଷଦ ସଭ୍ୟଭାବେ ନିର୍ବାଚିତ ହୋଇଥିଲେ। ସେ ପୂର୍ବରୁ ସଙ୍ଗଠନ ସହ ଜଡ଼ିତ ରହିଛନ୍ତି। ଏହା ତାଙ୍କ ସପକ୍ଷରେ ଅଧିକ ଭୋଟ ଜୁଟାଇବାରେ ସହାୟକ ହେବ ବୋଲି ସେ ଆଶା କରୁଛନ୍ତି। ଭାଜପା ପ୍ରାର୍ଥୀ ଲେଙ୍କା କହିଛନ୍ତି, ଲୋକେ ପରିବର୍ତ୍ତନ ଚାହୁଁଛନ୍ତି। କାରଣ ଅନେକ ଲୋକ ବିଜେଡି ପ୍ରାର୍ଥୀଙ୍କୁ ଭୋଟ ଦେଇ ପରବର୍ତ୍ତୀ ସମୟରେ ଅସହଯୋଗ ପାଇଛନ୍ତି। ପ୍ରତି ପଞ୍ଚାୟତରେ ବିଜେଡି ସମର୍ଥିତ ଏକାଧିକ ସରପଞ୍ଚ, ସମିତି ସଭ୍ୟ ପ୍ରାର୍ଥୀ ଥିବାରୁ କନ୍ଦଳ ଚାଲିଛି। ଅସନ୍ତୁଷ୍ଟ ପ୍ରାର୍ଥୀମାନେ ସ୍ବତଃ ଭାବେ ତାଙ୍କୁ ସ୍ବାଗତ କରୁଛନ୍ତି, ଯାହାକି ନିଆରା ପରିବେଶ ସୃଷ୍ଟି କରିଛି। କାଦୁଆପଡ଼ା, ମୁଦୁପୁର, ପିତେଇପୁର ପଞ୍ଚାୟତରେ ମଧ୍ୟ ଦଳ ଭଲ ପ୍ରଦର୍ଶନ କରିବ ବୋଲି ଲେଙ୍କା କହିଛନ୍ତି। କଂଗ୍ରେସ ପକ୍ଷରୁ କୁହାଯାଇଛି ପ୍ରାର୍ଥୀ ନାୟକ ଗତ ନିର୍ବାଚନରେ ବଳରାମପୁର ପଞ୍ଚାୟତ ସରପଞ୍ଚ ପ୍ରାର୍ଥୀ ଥିଲେ। ମାତ୍ର ୧୨୧ ଖଣ୍ଡ ଭୋଟ ବ୍ୟବଧାନରେ ହାରି ଯାଇଥିଲେ। ସେ ଜଣେ ସାମାଜିକକର୍ମୀ, ଶିକ୍ଷାବିତ୍ ସାଙ୍ଗକୁ ଭଲ ସଙ୍ଗଠକ ଭାବେ ଜଣାଶୁଣା। ତେଣୁ ତାଙ୍କ ସପକ୍ଷରେ ଜନମତ ଆସିବ। ଏ ସମ୍ପର୍କରେ ନାୟକ କହିଛନ୍ତି, ସେ ପିତେଇପୁର, ଅଳସୁଧା ଓ ମୁଦୁପୁର ପଞ୍ଚାୟତର ପ୍ରତି ଘରେ ପହଞ୍ଚତ୍ ଭୋଟ ଭିକ୍ଷା କରିଛନ୍ତି। ଏହି ସମୟରେ ଆଶାତୀତ ସମର୍ଥନ ମିଳିଛି ବୋଲି ସେ କହିଛନ୍ତି।
