ନୂଆପଡ଼ା ଅଫିସ,୬।୨: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଯେତେ ପାଖେଇ ଆସୁଛି ରାଜନୈତିକ ଉଷ୍ମତା ସେତେ ସରଗରମ ହେବାରେ ଲାଗିଛି ା ନୂଆପଡା ଜିଲାରେ ୧୪ଟି ଜିଲା ପରିଷଦ ଜୋନ ରହିଥିବାବେଳେ ୫୧ ଜଣ ପ୍ରାର୍ଥୀ ପ୍ରତିଦ୍ୱନ୍ଦିତା କରୁଛନ୍ତି। ୪ ଲକ୍ଷ ୩୪ ହଜାର ୭୩୨ ଭୋଟର ୫୧ ଜଣଙ୍କ ଭାଗ୍ୟ ପରୀକ୍ଷା କରିବେ। କୋମନା ବ୍ଲକର ୩ଟି ଜୋନରେ ତ୍ରିମୁଖୀ ଲଢେଇର ପ୍ରଚାର ଜୋର ଧରିଛି। ୧ ନମ୍ବର ଜୋନରେ ବିଜେଡିରୁ ମୁରଲିଧର ଭୋଇ, ଭାଜପାରୁ ଜ୍ଞାନେଶ୍ୱର ମାଝି ଓ କଂଗ୍ରେସରୁ ସୁନ୍ଦର ଚିନ୍ଦା ପ୍ରତିଦ୍ୱନ୍ଦିତା କରୁଛନ୍ତି।
ଭାଜପା, ବିଜେଡି ଓ କଂଗ୍ରେସ ଆସନ ହାତେଇବା ପାଇଁ ଘର ଘର ବୁଲି ପ୍ରଚାର ଭୋଟରଙ୍କୁ ଆକୃଷ୍ଟ କରୁଛନ୍ତି। ୨ ନମ୍ବର ଜୋନରେ ୨ଟି ନୂଆଁ ଚେହେରା ଥିବାବେଳେ ଜଣେ ପୁରୁଣା ଚେହେରା ରହିଛନ୍ତି। ନୂଆଁ ଚେହେରା ହେଲେ ମଧ୍ୟ କାଟେକା ଟକ୍କର ରହିଛି। ବିଜେଡିରୁ ଅବନୀରଞ୍ଜନ ଯୋଶୀ, ଭାଜପାରୁ ସୋନାଲି ପାଣିଗ୍ରାହୀ ଓ କଂଗ୍ରେସରୁ ମହମ୍ମଦ ଇସାଦ ପ୍ରତିଦ୍ୱନ୍ଦିତା କରୁଛନ୍ତି। ଅବନୀରଞ୍ଜନ ପାଇଁ ଖୋଦ ବିଧାୟକ ରାଜେନ୍ଦ୍ର ଢୋଲକିଆ ମଙ୍ଗ ଧରିଥିବା ବେଳେ ଭାଜପା ସୋନାଲି ପାଣିଗ୍ରାହୀ ପାଇଁ ରାଜ୍ୟ କାର୍ଯ୍ୟକାରିଣୀ ସଦସ୍ୟ ପ୍ରସନ୍ନ ପାଢୀ ମଙ୍ଗ ଧରିଛନ୍ତି ା କଂଗ୍ରେସ ହାତ ଯୋଡି ବୈତରଣି ପାର ହେବା ପାଇଁ ଉଦ୍ୟମ ଚଲାଇଛନ୍ତି। କାହା ମୁଣ୍ଡରେ ହାତି ସୁନା କଳସ ଢାଲିବ ଦେଖିବାକୁ ରହିଲା। ୩ ନମ୍ବର ଜୋନରେ ବିଜେଡିରୁ ଦୀପିକା କୌଶଲ୍ୟା, ଭାଜପାରୁ ଗିତାଞ୍ଜଳି ଦୁରିଆ ଓ କଂଗ୍ରେସରୁ ବବିତା ବାଗ ପ୍ରତିଦ୍ୱନ୍ଦିତା କରୁଥିବା ବେଳେ ୩ ଜଣ ନୂଆଁ ଚେହେରା ରହିଛନ୍ତି। କୋମନା ବ୍ଲକର ୩ ଟି ଜୋନରେ କ୍ରମାଗତ ବିଜେଡି ହାତରେ ସବୁ ଆସନ ରହିଥିବା ବେଳେ ଭାଜପା ଓ କଂଗ୍ରେସ ଆସନ ହାତେଇବା ପାଇଁ ଅଙ୍କକଷା ଚାଲିଛି।
