ଭୁବନେଶ୍ୱର,୨୨।୯(ବ୍ୟୁରୋ): ରାତିରେ ଝଗଡ଼ା, ସକାଳେ ମିଳିଲା ମୃତଦେହ। ଚନ୍ଦ୍ରଶେଖରପୁର ଥାନା ଅନ୍ତର୍ଗତ ଡମଣା ମୁଣ୍ଡା ବସ୍ତିରେ ଜଣେ ବ୍ୟକ୍ତିଙ୍କ ଏପରି ସନ୍ଦେହଜନକ ମୃତ୍ୟୁକୁ ନେଇ ଚର୍ଚ୍ଚା ଚାଲିଛି। ମଙ୍ଗଳବାର ମୃତଦେହକୁ ସ୍ତ୍ରୀ ସ୍ବର୍ଗରଥରେ ନେଇଯାଉଥିବାବେଳେ ସ୍ଥାନୀୟ ଲୋକଙ୍କଠାରୁ ଖବର ପାଇ ପୋଲିସ ତାହାକୁ ଜବତ କରିଛି। ମୃତକ ହେଲେ ମୟୂରଭଞ୍ଜ ଜିଲା କରଞ୍ଜିଆ ଥାନା ପଣସପାର ଗ୍ରାମର ଶ୍ୟାମା ମୁଣ୍ଡାରି (୫୦)। ଅତିରିକ୍ତ ଥାନା ଅଧିକାରୀ ଅଶ୍ୱିନୀ କୁମାର ଜେନା ଓ ଜୋନ୍-୬ ଏସିପି ପ୍ରକାଶ ଚନ୍ଦ୍ର ପାଲ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଥିବାବେଳେ ସାଇଣ୍ଟିଫିକ୍ ଟିମ୍ ଯାଞ୍ଚ ସହ ନମୁନା ସଂଗ୍ରହ କରିଛି। ମୃତଦେହକୁ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଯାଇଛି। ଅପରପକ୍ଷରେ ଶ୍ୟାମାଙ୍କୁ ତାଙ୍କ ସ୍ତ୍ରୀ ପିଟିପିଟି ହତ୍ୟା କରିଥିବା ମୃତକଙ୍କ ସାନ ଭାଇ ସଂଗ୍ରାମ ମୁଣ୍ଡାରୀ ଥାନାରେ ଅଭିଯୋଗ କରିଛନ୍ତି। ପୋଲିସ ଏକ ହତ୍ୟା ମାମଲା(ନଂ.୪୦୫/୨୧) ରୁଜୁ କରିବା ସହ ମୃତକଙ୍କ ସ୍ତ୍ରୀ ଝିଙ୍କି ମୁଣ୍ଡାରି(୬୦)ଙ୍କୁ ଥାନାରେ ଅଟକ ରଖି ପଚରାଉଚରା କରୁଛି। ଏନେଇ ଜୋନ୍ ଏସିପି ପ୍ରକାଶ ଚନ୍ଦ୍ର ପାଲ୍ କହିଛନ୍ତି, ମୃତଦେହରେ କୌଣସି କ୍ଷତ ଚିହ୍ନ ନାହିଁ। ଠେଲାପେଲାରେ ଶ୍ୟାମା ପଡିଯାଇଥିବା ଓ ହୃଦ୍ଘାତ କିମ୍ବା ନିଶା ସେବନ ଦ୍ୱାରା ତାଙ୍କର ମୃତ୍ୟୁ ହୋଇଥାଇପାରେ ବୋଲି ସନ୍ଦେହ କରାଯାଉଛି। ତେବେ ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ସେ କହିଛନ୍ତି।
ସ୍ଥାନୀୟ ଲୋକଙ୍କ ସୂଚନାନୁସାରେ, ପ୍ରଥମ ସ୍ବାମୀଙ୍କ ମୃତ୍ୟୁ ପରେ ଝିଙ୍କି ଗାଁରୁ ଭୁବନଶ୍ୱେର ଚାଲିଆସି ନିଜ ଦିଅର ଶ୍ୟାମାଙ୍କୁ ବିବାହ କରି ମୁଣ୍ଡା ବସ୍ତିରେ ରହୁଥିଲେ। ଉଭୟେ ଏଠାରେ ରହି ବିଏମ୍ସିର ଠିକା କର୍ମଚାରୀ ଭାବେ କାମ କରୁଥିଲେ। ଅନେକ ସମୟରେ ଉଭୟେ ନିଶାଦ୍ରବ୍ୟ ସେବନ କରି ମାରପିଟ୍ ଲାଗନ୍ତି। ରବିବାର ରାତିରେ ନିଶା ସେବନ କରି ଝିଙ୍କି ଓ ଶ୍ୟାମା ଝଗଡା ଲାଗିଥିଲେ। ଏହି ସମୟରେ ଶ୍ୟାମା ତଳେ ପଡିଯାଇଥିଲେ। ଶ୍ୟାମାଙ୍କୁ ବସ୍ତିର ୩ ଜଣ ଲୋକ ଖଟରେ ଶୋଇଦେଇ ଚାଲିଯାଇଥିଲେ। ସେହି ସମୟରେ ଶ୍ୟାମାଙ୍କର ମୃତ୍ୟୁ ହୋଇଥାଇପାରେ। ଝିଙ୍କି ଜାଣିବା ପରେ ଭୟରେ ପୋଲିସକୁ ନ ଜଣାଇ ମୟୂରଭଞ୍ଜରେ ରହୁଥିବା ତାଙ୍କ ଜ୍ୱାଇଁଙ୍କୁ ଖବର ଦେଇଥିଲେ। ସେ ଆସିବା ପରେ ଶବବୁହା ଗାଡ଼ି ସ୍ବର୍ଗରଥରେ ନେଇଯାଉଥିବାବେଳେ ସନ୍ଦେହ କରି ପୋଲିସକୁ ଖବର ଦେଇଥିଲେ।
