ଚଣ୍ଡିଗଡ,୨୫।୨:ଭାରତର ପୂର୍ବତନ ଭାରତୀୟ କ୍ରିକେଟର ଯୁବରାଜ ସିଂଙ୍କ ସମସ୍ୟା ବଢିବାରେ ଲାଗିଛି। ଦଳିତ ସମାଜ ବିରୋଧରେ ଅପମାନଜନକ ମନ୍ତବ୍ୟ ଦେଇଥିବାରୁ ହରିୟାଣା ପୋଲିସ ତାଙ୍କ ନାଁରେ ମାମଲା ରୁଜୁ କରିଛି। ଅପମାନଜନକ ମନ୍ତବ୍ୟ ମାମଲାରେ ଗିରଫ ଭୟରେ ଯୁବରାଜଙ୍କ ପକ୍ଷରୁ ପଞ୍ଜାବ ଏବଂ ହରିୟାଣା ହାଇକୋର୍ଟରେ ଏକ ପିଟିସନ ଦାଖଲ କରାଯାଇଛି। ଏହି ମାମଲାକୁ ଖାରଜ କରି ହାନସୀ ପୋଲିସର କାର୍ଯ୍ୟାନୁଷ୍ଠାନ ଉପରେ ରୋକ ଲଗାଇବାକୁ ପିଟିସନରେ କୁହାଯାଇଛି। ଗୁରୁବାର ଚଣ୍ଡିଗଡ଼ରେ ଏହି ମାମଲାର ଶୁଣାଣି ହେବ।
ଗତ ବର୍ଷ ଜୁନ ୧ରେ ଭାରତୀୟ ଦଳର ଓପନର୍ ରୋହିତ ଶର୍ମାଙ୍କ ସହ ଭିଡିଓ ଚାଟ୍ରେ ଯୁବରାଜ ସିଂ ୟୁଜବେନ୍ଦ୍ର ଚହଲଙ୍କ ପ୍ରତି ଅଶାଳୀନ ଶବ୍ଦ ବ୍ୟବହାର କରିଥିବା ଅଭିଯୋଗ ହୋଇଛି। ଏହି ଚାଟ୍ର ଭିଡିଓ ଭାଇରାଲ ହେବା ପରେ ଯୁବରାଜ ସିଂଙ୍କୁ ମଧ୍ୟ କ୍ଷମା ମାଗିବାକୁ ପଡିଥିଲା। ହରିୟାଣା ପୋଲିସ ହିସାରର ପୋଲିସ ଷ୍ଟେଶନ ହାନସିରେ ଆଇପିସିର ଧାରା ୧୫୩, ୧୫୩ଏ, ୨୯୫, ୫୦୫ ବ୍ୟତୀତ ଏସସି/ଏସଟି ଆକ୍ଟର ଧାରା ୩ (୧) (ଆର୍) ଏବଂ ୩ (୧) (ଏସ୍) ଅନୁଯାୟୀ ଏକ ମାମଲା ଦାଖଲ କରିଛି। । ଜାନୁଆରୀ ୧୧ରେ, ନ୍ୟାସନାଲ ଆଲାଏନ୍ସ ଏବଂ ଦଲିତ ମାନବ ଅଧିକାରର ସଂଯୋଜକ ରଜତ କଲସାନ ଏନେଇ କୋର୍ଟରେ ଏକ ପିଟିସନ ଦାଖଲ କରିଥିଲେ। ଯେଉଁଥିରେ ସେ ଯୁବରାଜଙ୍କ ବିରୋଧରେ ମାମଲା ଦାୟର କରିଥିଲେ। ୮ ମାସ ପରେ, ଯୁବରାଜଙ୍କ ବିରୋଧରେ ମାମଲା ପଞ୍ଜିକରଣ କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ। ଏହି ବିବାଦ ପରେ ଯୁବରାଜ ସିଂ କ୍ଷମା ମାଗିଛନ୍ତି। ଗତ ବର୍ଷ ସେ ନିଜ ଟୁଇଟରରେ କ୍ଷମା ମାଗି ଲେଖିଥିଲେ, ମୁଁ ଏହା ସ୍ପଷ୍ଟ କରିବାକୁ ଚାହୁଁଛି ଯେ ମୁଁ କୌଣସି ପ୍ରକାର ଭେଦଭାବରେ ବିଶ୍ୱାସ କରେ ନାହିଁ।
