ଶ୍ରୀନଗର, ୨ା୬: କଶ୍ମୀରରେ ଟାର୍ଗେଟ କିଲିଂ ଥମୁ ନ ଥିବାରୁ ଉପତ୍ୟକା ଛାଡ଼ିବାକୁ କଶ୍ମୀରୀ ପଣ୍ଡିତମାନେ ଚେତାବନୀ ଦେବା ପରେ ସ୍ଥାନୀୟ ପ୍ରଶାସନ ସେମାନଙ୍କ ଟ୍ରାଞ୍ଜିଟ୍ କ୍ୟାମ୍ପ୍ଗୁଡ଼ିକୁ ବୁଧବାର ସିଲ୍ କରିଛି। ସେମାନଙ୍କୁ ଶିବିର ବାହାରକୁ ଆସିବା ପାଇଁ ବାରଣ କରାଯାଇଛି। ଏଥିସହ କ୍ୟାମ୍ପ୍ ଆଖପାଖରେ ବ୍ୟାପକ ପୋଲିସ ମୁତୟନ ହୋଇଛନ୍ତି। ପ୍ରଧାନମନ୍ତ୍ରୀଙ୍କ ସ୍ବତନ୍ତ୍ର ପ୍ୟାକେଜ ଅଧୀନରେ ନିଯୁକ୍ତି ପାଇଥିବା ପ୍ରାୟ ୪ ହଜାର କଶ୍ମୀରୀ ପଣ୍ଡିତଙ୍କ ଜୀବନ ପ୍ରତି ବିପଦ ଥିବା ଦର୍ଶାଇ ୨୪ ଘଣ୍ଟା ମଧ୍ୟରେ ସେମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ଦାବି କରିଥିଲେ। ଏହା ନ ହେଲେ ସେମାନେ ଉପତ୍ୟକା ଛାଡ଼ି ପଳାୟନ କରିବେ ବୋଲି ମଙ୍ଗଳବାର ଚେତାବନୀ ଦେଇଥିଲେ।
ଜିଲାରେ ମଙ୍ଗଳବାର ଜମ୍ମୁର ଜଣେ ହିନ୍ଦୁ ଶିକ୍ଷୟିତ୍ରୀ ରାଜନୀ ବାଲାଙ୍କୁ ଗୁଳିକରି ହତ୍ୟା କରାଯାଇଥିଲା। ଗତମାସରେ ବୁଡଗାମ୍ରେ ମାଜିଷ୍ଟ୍ରେଟଙ୍କ ଅଫିସରେ ଆଉ ଜଣେ କଶ୍ମୀର ପଣ୍ଡିତ ରାହୁଲ ଭଟ୍ଟଙ୍କୁ ଆତଙ୍କବାଦୀ ଗୁଳି କରି ହତ୍ୟା କରିଥିଲେ। ବାରମ୍ବାର ଟାର୍ଗେଟ କିଲିଂ ଯୋଗୁ କଶ୍ମୀରୀ ପଣ୍ଡିତମାନେ ନିଜକୁ ଅସୁରକ୍ଷିତ ମନେକରି ସୁରକ୍ଷା ଦାବିରେ ଆନ୍ଦୋଳନକୁ ଓହ୍ଲାଇବା ସହ ସେହି ସ୍ଥାନ ଛାଡ଼ିବାକୁ ଧମକ ଦେଇଛନ୍ତି। ସରକାର କୌଣସି ବ୍ୟବସ୍ଥା ନ କରି ସେମାନଙ୍କୁ ସେଠାରେ ମରିବା ପାଇଁ ଛାଡ଼ି ଦେଇଥିବା ସେମାନେ ଅଭିଯୋଗ କରିଛନ୍ତି। ଫଳରେ ସ୍ଥାନୀୟ ପ୍ରଶାସନ ବିଭିନ୍ନ ସ୍ଥାନରେ ଥିବା କଶ୍ମୀରୀ ପଣ୍ଡିତଙ୍କ ଶିବିରକୁ ସିଲ୍ କରି ସେମାନଙ୍କୁ ବାହାରକୁ ନ ବାହାରିବାକୁ କହିଛି। କ୍ୟାମ୍ପ୍ର ପ୍ରମୁଖ ଗେଟ୍ ବନ୍ଦ କରିଦିଆଯାଇଛି।
ସେଠାରେ ପୋଲିସ ବ୍ୟାରିକେଡ୍ ନିର୍ମାଣ କରିବା ସହ ଯାତାୟାତ କରୁଥିବା ସମସ୍ତ ଯାନବାହନକୁ ଯାଞ୍ଚ କରୁଛି। ଚଳିତ ବର୍ଷ ଜାନୁୟାରୀରୁ ଅଦ୍ୟାବଧି କଶ୍ମୀର ଉପତ୍ୟକାରେ ୧୬ ଜଣ ଟାର୍ଗେଟ କିଲିଂର ଶିକାର ହେଲେଣି। ଟାର୍ଗେଟ କିଲିଂ ବଢ଼ୁଥିଲେ ହେଁ କେନ୍ଦ୍ର ସରକାର କଶ୍ମୀରୀ ପଣ୍ଡିତଙ୍କୁ ଉପଯୁକ୍ତ ସୁରକ୍ଷା ଦେଇପାରି ନ ଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ କହିଛନ୍ତି। କଶ୍ମୀରୀ ପଣ୍ଡିତଙ୍କୁ ହତ୍ୟା ୯୦ ଦଶକର ଘଟଣାକୁ ମନେପକାଉଛି। ସେମାନଙ୍କୁ ନିଜ ଘରେ ସୁରକ୍ଷିତ ରଖିବା ପାଇଁ କେନ୍ଦ୍ର ସରକାର ବ୍ୟାପକ ବ୍ୟବସ୍ଥା କରନ୍ତୁ ବୋଲି କେଜ୍ରିଓ୍ବାଲ ଦାବି କରିଛନ୍ତି।
