ଆନନ୍ଦପୁର, ୯।୫(ସ୍ବ.ପ୍ର.) କେନ୍ଦୁଝର ଜିଲା ଆନନ୍ଦପୁର ବ୍ଲକ ତରତରା ପଞ୍ଚାୟତର ମାଠିଆନେଣ୍ଡି ଗ୍ରାମର ବହୁ ଚାଷୀଙ୍କର ଏକର ଏକର ଚାଷ ଜମି ପଡିଆ ପଡୁଛି। ବୈତରଣୀ ନଦୀର ନାମପାର୍ଶ୍ୱ ଅଧପନ୍ତରିଆ କେନାଲ ନିର୍ମାଣ କାର୍ଯ୍ୟ ପାଇଁ ଏଭଳି ପରିସ୍ଥିତି ସୃଷ୍ଟି ହେଉଥିବା ଚାଷୀମାନେ ଅଭିଯୋଗ କରିଛନ୍ତି।
୨୦୧୮ ମସିହାରୁ ଏଭଳି ପରିସ୍ଥିତି ଲାଗିରହିଛି। ଚକ୍ରତୀର୍ଥ ନାଳ, ବାହାଆନାଳ ଓ ପାହାଡ଼ପାଣି ନାଳ ଜଳ ଆସି ପୂର୍ବରୁ ବିସ୍ତୃତ ଭାବେ ଚାଷ ଜମି ଗୁଡିକରେ ରହୁଥିଲା। ଯାହାକି ବ୍ୟବହାର ଉପଯୋଗୀ ହୋଇପାରୁଥିଲା ଓ ଚାଷ ପାଇଁ ସୁବିଧା ମଧ୍ୟ ହେଉଥିଲା। କିନ୍ତୁ କେନାଲ ନିର୍ମାଣ କାର୍ଯ୍ୟ ଆରମ୍ଭ ହେବା ଦିନଠାରୁ ଏହି ତିନିଗୋଟି ନାଳ ପାଣି ଅଧପନ୍ତରିଆ କେନାଲରେ ପଡୁଛି ଏବଂ କେନାଲ ବନ୍ଧର ଅପେକ୍ଷାକୃତ ନିଚ୍ଚା ଅଞ୍ଚଳରେ ଘାଇ ସୃଷ୍ଟି କରି ଚାଷ ଜମି ଗୁଡିକ ବହୁଳ ଭାବେ ପ୍ରଭାବିତ କରୁଛି। ଯାହାର ପ୍ରତିକାର ସ୍ବରୂପ ମାଠିଆନେଣ୍ଡି ଗ୍ରାମର ରାମଚନ୍ଦ୍ର ଆଏଚ ନାମକ ଚାଷୀ ୧।୯।୨୦୧୮ରେ ଆନନ୍ଦପୁର ବ୍ୟାରେଜ ଡିଭିଜନ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ। ହେଲେ ଅଦ୍ୟାବଧି କୌଣସି ସୁଫଳ ମିଳିପାରି ନାହିଁ। ମାଠିଆନେଣ୍ଡି ଗ୍ରାମର ୩୦ ଏକରରୁ ଉର୍ଦ୍ଧ ଚାଷ ଜମି ପଡିଆ ପଡୁଛି। କେଉଁଠି ଜଳ ଅଭାବରୁ ତ ଆଉ କେଉଁଠି ଜଳର ପ୍ରଖର ସ୍ରୋତ ପାଇଁ ଏଭଳି ପରିସ୍ଥିତି ସୃଷ୍ଟି ହୋଇଛି। ଏଭଳି ଘଟଣାକୁ ନେଇ ମେ’ ୫ ତାରିଖରେ ମାଠିଆନେଣ୍ଡି ଗ୍ରାମର ଚାଷୀ ମନୋରଞ୍ଜନ ଆଏଚ ଓ କେନାଲ ନିର୍ମାଣକାରୀ ଠିକା ସଂସ୍ଥା ମଧ୍ୟରେ ପାଟିତୁଣ୍ଡ ଭଳି ପରିସ୍ଥିତି ଚାଷୀମାନଙ୍କ ଅସନ୍ତୋଷକୁ ବୃଦ୍ଧି କରିଛି। ଘଟଣାକୁ ନେଇ କମ୍ପାନୀ କର୍ମଚାରୀଙ୍କ ଅଭିଯୋଗ ଆଧାରରେ (ନଂ.୧୦୮/୨୦୨୨) ଓ ଚାଷୀ ମନରୋଞ୍ଜନ ଆଏଚଙ୍କ ବାପା ଭରତ ଚନ୍ଦ୍ର ଆଏଚଙ୍କ ଅଭିଯୋଗ ଆଧାରରେ (ନଂ.୧୧୦/୨୦୨୨) ଦୁଇଟି ପୃଥକ ମାମଲା ଆନନ୍ଦପୁର ଥାନାରେ ରୁଜୁ ହୋଇଛି। କମ୍ପାନୀ କର୍ମଚାରୀଙ୍କ ଅଭିଯୋଗକ୍ରମେ ପୋଲିସ ଚାଷୀ ମନୋରଞ୍ଜନ ଆଏଚଙ୍କୁ ଗିରଫ କରି ବିଚାରବିଭାଗୀୟ ହାଜତକୁ ପଠାଇଛନ୍ତି। ଅନ୍ୟପକ୍ଷେ କମ୍ପାନୀ କର୍ମଚାରୀଙ୍କ ବିରୋଧରେ ହୋଇଥିବା ଅଭିଯୋଗକୁ ତଦନ୍ତ ଜାରି ରହିଛି। ଏବିଷୟରେ ଘଟଣାର ସତ୍ୟାସତ୍ୟ ଜାଣିବାକୁ ମାଠିଆନେଣ୍ଡି ଗ୍ରାମକୁ ଯାଇଥିବା କେତେକ ଗଣମାଧ୍ୟମ ପ୍ରତିନିଧିଙ୍କ ନିକଟରେ ଗ୍ରାମର ବହୁ ଚାଷୀ ସେମାନଙ୍କର ସମସ୍ୟା ସମ୍ପର୍କରେ ସୂଚନା ଦେଇଛନ୍ତି। ଏପରିକି ସ୍ଥାନୀୟ ପ୍ରଶାସନ ଚାଷୀମାନଙ୍କ ସମସ୍ୟା ଖୁବଶୀଘ୍ର ସୁଧାରିବାକୁ ପ୍ରୟାସ ନ କରିଲେ ସ୍ଥାନୀୟ ବହୁ ସଂଖ୍ୟାରେ ଚାଷୀ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛନ୍ତି।
