ସୁନ୍ଦରଗଡ଼,୧୦ା୭(ଜୟନାରାୟଣ ମେଣ୍ଡୁଳି): ଚଳିତ ବର୍ଷ ବିଳମ୍ବିତ ବର୍ଷା ଯୋଗୁଁ ସୁନ୍ଦରଗଡ଼ ଜିଲାରେ ଚାଷ କାର୍ଯ୍ୟ ପଛେଇ ଯାଇଛି। ବର୍ତ୍ତମାନ ଯେଉଁଠି ରୁଆ ବିହୁଡା ହେବା କଥା ଏବେ ସେଇଠି ଧାନ ବୁଣାବୁଣି ଓ ତଳିପକା କାର୍ଯ୍ୟ ଚାଲିଛି। ଏପରିକି ଜିଲାର ଅନେକ ସ୍ଥାନରେ ଜମିରେ ଲଙ୍ଗଳ ଧାର ପଡିନଥିବାରୁ ସେଗୁଡିକ ପଡ଼ିଆ ପଡିଛି। ଜିଲା କୃଷି ବିଭାଗ ସୂତ୍ରରୁ ମିଳିଥିବା ସୂଚନା ଅନୁସାରେ, ଜିଲାରେ ଥିବା ମୋଟ ୩ଲକ୍ଷ ୭୩ହଜାର ହେକ୍ଟର ଚାଷଜମି ମଧ୍ୟରୁ ଚଳିତ ବର୍ଷ ୨ଲକ୍ଷ୧୨ହଜାର ହେକ୍ଟର ଚାଷଜମିରେ ଧାନ ଚାଷ ଏବଂ ୧ ଲକ୍ଷ ୧୦୦ ହେକ୍ଟର ଚାଷଜମିରେ ଅଣଧାନ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିଲା। ହେଲେ ବିଳମ୍ବରେ ବର୍ଷା ହେବାରୁ ଚାଷ କାମ ଆଗେଇବା କଥା ଦୂରେ ଥାଉ ଆରମ୍ଭ ହୋଇନାହିଁ। ଚଳିତ ସପ୍ତାହରେ ବର୍ଷାପରେ ଜମିରେ ହଳ କାର୍ଯ୍ୟ ,ବୁଣାବୁଣି ଓ ତଳିପକା କାର୍ଯ୍ୟ ଆରମ୍ଭ ହୋଇଛି। ଜିଲାରେ ୧୬ ହଜାର ୩୨୦ହେକ୍ଟର ଜମିରେ ବୁଣାବୁଣି ଏବଂ ୪ହଜାର ହେକ୍ଟର ଜମିରେ ତଳିପକା କାର୍ଯ୍ୟ ହୋଇଛି ବୋଲି ଭାରପ୍ରାପ୍ତ ଜିଲା ମୁଖ୍ୟ କୃଷି ଅଧିକାରୀ ହରୀହର ନାୟକ କହିଛନ୍ତି। ବିଳମ୍ବରେ ବର୍ଷା ହେବା ଯୋଗୁ ଚାଷକାର୍ଯ୍ୟ ମଧ୍ୟ ବିଳମ୍ବରେ ହୋଇଛି। ଫଳରେ ଧାନଫସଲରେ ଅଧିକ ରୋଗପୋକ ଲାଗିବାର ସମ୍ଭାବନା ରହିଛି। ତେଣୁ କୃଷି ବିଭାଗ ପକ୍ଷରୁ ଚାଷୀଙ୍କୁ ସଚେତନ କରି ହରଡ, ବିରି, ଧଣିଚା, ଚିନାବାଦାମ ଚାଷ କରିବାକୁ ମଧ୍ୟ ପରାମର୍ଶ ଦିଆଯାଇଛି। ଗତବର୍ଷ ଜୁନ ମାସ ଶେଷ ସୁଦ୍ଧା ସ୍ବାଭାବିକ ୨୩୭.୪ ମିଲିମିଟରରୁ ୮୩.୫ମିମି ବର୍ଷା ହୋଇଥିବାବେଳେ ଚଳିତ ବର୍ଷ ଜୁନ ଶେଷ ସୁଦ୍ଧା ୨୧୮ମିଲିମିଟର ବର୍ଷା ହୋଇଛି। ହେଲେ ଏଥର ଜୁନ୨୦ପରେ ବର୍ଷା ହୋଇଥିଲା। ପ୍ରବଳ ବର୍ଷା ଯୋଗୁଁ ଚାଷୀ ହଳ କରି ସଙ୍ଗେ ସଙ୍ଗେ ଧାନ ବୁଣାବୁଣି ଓ ତଳିପକାଇବା ପାଇଁ ଜମି ପାଗ ଅନୁକୂଳ ନ ଥିଲା। ବର୍ତ୍ତମାନ ସୁଦ୍ଧା ୩୦ ପ୍ରତିଶତ ଜମିରେ ବୁଣାବୁଣି କାର୍ଯ୍ୟ ସରିଥିବାବେଳେ ମାତ୍ର ୪ପ୍ରତିଶତ ଜମିରେ ଧାନ ତଳି ପକା ହୋଇଛି। ଏଥର ବୁଣାବୁଣି ଅପେକ୍ଷା ଧାନତଳିରୁଆ ଅଧିକ କରିବାକୁ ଚାଷୀମାନେ ଆଗ୍ରହୀ ହେଉଛନ୍ତି। ବର୍ତ୍ତମାନ ବର୍ଷାହେବାପରେ ଜମିରେ ହଳ ଧରାଧରି ଓ ଧାନତଳିପକା କାର୍ଯ୍ୟ ତ୍ୱରାନ୍ବିତ ବେଗରେ ଆରମ୍ଭ ହୋଇଥିଲେ ମଧ୍ୟ ଜିଲାରେ ଅଧିକାଂଶ ଜମି ପଡିଆ ପଡିଛି।
ଚଳିତ ବର୍ଷ ବର୍ଷା ବିଳମ୍ବରେ ହେବା ଓ ବର୍ଷା ପରିମାଣ କମ ହେବାରୁ ଆମର ସଦର ବ୍ଲକରେ ଚାଷ କାର୍ଯ୍ୟ ପଛେଇ ଯାଇଛି। ୧୧ଏକର ଜମିରେ ଧାନରୁଆ ଓ ୩ ଏକର ଜମିରେ ଧାନବୁଣାକରି ଧାନ ଚାଷ କରିବୁ। ଆଗକୁ ବର୍ଷା ପରିମାଣ କମିଗଲେ ଧାନରୁଆ କାର୍ଯ୍ୟ ବିଗିଡ଼ିଯିବ। ଏଥିସହ ଧାନ ରୁଆ କାର୍ଯ୍ୟ ପାଇଁ ଶ୍ରମିକ ସମସ୍ୟା ଦେଖାଦେଇଛି।
-ଦେବେନ୍ଦ୍ର ପଟେଲ, ଚାଷୀ, କୁଡାବଗା, ସୁନ୍ଦରଗଡ ସଦର ବ୍ଲକ
ବର୍ଷା ଅଭାବ ଯୋଗୁ ବୁଣାବୁଣି ଓ ଧାନ ତଳିପକା କାର୍ଯ୍ୟ ବାଧାପ୍ରାପ୍ତ ହୋଇଛି। ଧାନ ବିଲରେ ପାଣି ନାହିଁ। ଏଣୁ ବେଉଷଣ ଓ ରୁଆ କାର୍ଯ୍ୟ କେମିତି କରିବୁ। ସରକାର ଓ ପ୍ରଶାସନ ଚାଷ ପାଇଁ ପାଣି ସୁବିଧା କଲେ ଚାଷୀମାନେ ଉପକୃତ ହୋଇପାରିବୁ।
-ବନମାଳୀ ବାରସତିଆ,ଚାଷୀ-ସଉନାମୁରା,ବାଲିଶଙ୍କରା ବ୍ଲକ
ଚଳିତ ବର୍ଷ ଆମ ଅଞ୍ଚଳରେ ବର୍ଷାର ପରିମାଣ କମ ହୋଇଛି। ଫଳରେ ଧାନ ବୁଣା ଏବଂ ରୁଆ କାର୍ଯ୍ୟରେ ବିଳମ୍ବ ହେଉଛି। ଆମେମାନେ ବହୁତ ଚିନ୍ତାରେ ପଡିଯାଇଛୁ। ଆଗକୁ ବର୍ଷା ନ ହେଲେ ଅଳ୍ପ ଅଳ୍ପ ବୁଣା ଯାଇଥିବା ଧାନ ଗଜା ମରୁଡି ହୋଇଯିବ। ପ୍ରଧାନମନ୍ତ୍ରୀ ଫସଲ ବୀମାରେ ଯଦି କିଛି ସରକାରୀ ସାହାଯ୍ୟ ମିଳିପାରନ୍ତା ତା ହେଲେ ମଧ୍ୟ କିଛି ଆଶ୍ବସ୍ତି ମିଳିବ।
-ସୁରେଶ ପଟେଲ, ଗିରିଙ୍ଗକେଲା,ଲେଫ୍ରିପଡା ବ୍ଲକ
ଚଳିତବର୍ଷ ଜୁନ ୨୩ରେ ପ୍ରଥମ ବର୍ଷା ହୋଇଥିଲା। ପ୍ରଚୁର ବର୍ଷା ଯୋଗୁ ହଳ କରି ହେଲାନାହିଁ। ଗତ ସପ୍ତାହରୁ ହଳ ଜମି ପ୍ରସ୍ତୁତ କଲାବେଳେ ପୁଣି ବର୍ଷା ହେଲା। ପ୍ରକୃତି ଦାଉରେ ବର୍ତ୍ତମାନ ସୁଦ୍ଧା ବୁଣା ହୋଇନି କି ହଳ ହୋଇପାରିନାହିଁ।
– ଯୁବ ଚାଷୀ.. ବ୍ରହ୍ମାନନ୍ଦ ପାଣିଗ୍ରାହୀ, ବଡ଼ଗଁା।
