ଖୋର୍ଦ୍ଧା ଅଫିସ, ୭ା୫: ଦକ୍ଷିଣ ଆଣ୍ଡାମାନ ସାଗରରେ ସୃଷ୍ଟ ଲଘୁଚାପ କ୍ଷେତ୍ର କ୍ରମେ ଦକ୍ଷିଣ-ପୂର୍ବ ବଙ୍ଗୋପସାଗରମୁହଁା ହେଉଛି। ଏହା ଅବପାତରେ ପରିଣତ ହେବା ସହ ସାଇକ୍ଲୋନିକ୍ ଷ୍ଟର୍ମ (ଘୂର୍ଣ୍ଣିବାତ୍ୟା)ରେ ପରିଣତ ହୋଇପାରେ। ତେବେ ବାତ୍ୟାର ପ୍ରକୋପ କିପରି ରହିବ, କେଉଁଠି ସ୍ଥଳଭାଗ ଛୁଇଁବ ତାହା ସ୍ପଷ୍ଟ ହୋଇନାହିଁ। ଏହାର ପ୍ରଭାବରେ ଉପକୂଳବର୍ତ୍ତୀ ଅଞ୍ଚଳରେ ପ୍ରବଳ ବର୍ଷା ହେବା ସମ୍ଭାବନା ରହିଛି। ସମ୍ଭାବ୍ୟ ବାତ୍ୟାକୁ ନେଇ ଖୋର୍ଦ୍ଧା ଅଞ୍ଚଳର ଚାଷୀଙ୍କ ମଧ୍ୟରେ ଛନକା ପସିଛି। ଫସଲ ନଷ୍ଟ ଆଶଙ୍କାରେ ତରତର ହୋଇ ଚାଷୀ ଅମଳ କରିବାରେ ବ୍ୟସ୍ତ ରହିଛନ୍ତି। ଅନ୍ୟପଟେ ଠିକ୍ ସମୟରେ ଫସଲ ଅମଳ ନ ହେଲେ କେଉଁଠୁ ଅର୍ଥ ଆଣି ଋଣ ଶୁଝିବେ, ସେନେଇ ଚିନ୍ତାରେ ଚାଷୀ।
ବିଳମ୍ବରେ ମୌସୁମୀ ପ୍ରବେଶ, ଅଦିନିଆ ବର୍ଷା ଏବଂ ବାତ୍ୟା ଯୋଗୁ ଚାଷୀ କ୍ଷତି ସହୁଛନ୍ତି। ଖରିଫ ଋତୁରେ ଚାଷୀ ପ୍ରତିକୂଳ ପରିସ୍ଥିତି, ବାତ୍ୟା ପ୍ରଭାବରେ କ୍ଷତି ସହିଥିବା ବେଳେ ଏବେ ସୃଷ୍ଟ ଲଘୁଚାପ ଯୋଗୁ ଚାଷୀ କ୍ଷତିଗ୍ରସ୍ତ ହେବା ଆଶଙ୍କା ରହିଛି। ଚାଷୀ ବହୁକଷ୍ଟରେ ମୁଗ, ବିରି, ଧାନ ଫସଲ ଚାଷ କରିଛି। ବାତ୍ୟା ହେଲେ ଏହା ନଷ୍ଟ ହୋଇଯିବା ଚାଷୀଙ୍କୁ ଭୟ ଘାରିଛି। ବାତ୍ୟା ଭୟରେ ମୁଗ ପାକଳ ହୋଇ ନ ଥିଲେ ମଧ୍ୟ ଚିଲିକା ଉପକୂଳବର୍ତ୍ତୀ ଚାଷୀମାନେ କଞ୍ଚା ମୁଗକୁ ଅମଳ କରିବାରେ ଲାଗିପଡିଛନ୍ତି। ଧାନ ଅମଳ ସମୟ ଗଡ଼ିଆସୁଥିବା ବେଳେ ଆଉ ଦିନ କେଇଟାରେ ଅମଳ କରିଥା’ନ୍ତେ। ଏବେ ବାତ୍ୟା ଆଶଙ୍କାରେ କେତେକ ଅଞ୍ଚଳରେ ଚାଷୀ କଞ୍ଚାଧାନକୁ ମଧ୍ୟ କାଟି ନେଉଥିବା ଦେଖିବାକୁ ମିଳିଛି। ଟାଙ୍ଗିଆପଡ଼ାର ଚାଷୀ ଗୋପାଳ ଦଳେଇ କୁହନ୍ତି, ପ୍ରତିବର୍ଷ ଫସଲ ଅମଳ ସମୟରେ ପ୍ରକୃତି ଦାଉ ସାଧୁଛି। ଧାନ ଓ ମୁଗ ଅମଳ ସମୟରେ ବାତ୍ୟା ଡରାଉଛି। ଫସଲ ପାକଳ ହୋଇ ନ ଥିଲେ ମଧ୍ୟ କଞ୍ଚା ଅବସ୍ଥାରେ ତୋଳିବାକୁ ବାଧ୍ୟହେଉଛୁ ବୋଲି ସେ କହିଛନ୍ତି। ସେହିଭଳି ନୂଆଗାଁ, ମହୁଲ, ମଧୁପୁର, ହଳଦିଆ, ଜରିପୁଟ ଅଞ୍ଚଳର ଚାଷୀଙ୍କ କହିବାନୁଯାୟୀ, ଯଦି ପ୍ରବଳ ବର୍ଷା ହୁଏ, ତେବେ ବିଲରେ ପାଣି ମାଡ଼ି ଫସଲ ନଷ୍ଟ ହେବା ଆଶଙ୍କା ରହିଛି। ତେଣୁ ଆଗୁଆ ଫସଲ ଅମଳ କରୁଛୁ ବୋଲି କହିଛନ୍ତି। ଏ ନେଇ ଜିଲାପାଳ ସଂଗ୍ରାମ କେଶରୀ ମହାପାତ୍ର କୁହନ୍ତି, ଚିଲିକାକୁ ମତ୍ସ୍ୟଜୀବୀମାନେ ନ ଯିବାକୁ ପରାମର୍ଶ ଦିଆଯାଇଛି। ଚିଲିକା ଭିତରକୁ ଯାଇଥିବା ମତ୍ସ୍ୟଜୀବୀଙ୍କୁ ଶୀଘ୍ର ଫେରିଆସିବାକୁ କୁହାଯାଇଛି। ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି କରାଯାଇଛି। ଚିଲିକା ଉପକୂଳବର୍ତ୍ତୀ ଅଞ୍ଚଳକୁ ଅଧିକ ଗୁରୁତ୍ୱ ଦିଆଯାଇଛି। ଆବଶ୍ୟକ ପଡ଼ିଲେ ଉପକୂଳବର୍ତ୍ତୀ ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରାଯିବ। ସମସ୍ତ ବିଭାଗୀୟ ଅଧିକାରୀଙ୍କୁ ପ୍ରସ୍ତୁତ ରହିବାକୁ ପରାମର୍ଶ ଦିଆଯାଇଛି ବୋଲି ସେ କହିଛନ୍ତି।
