ବରଗଡ଼,୧୯।୬(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଧାନ ସଂଗ୍ରହ ପ୍ରକ୍ରିୟାକୁ ଦେଢ଼ମାସ ପୂରି ନାହିଁ। ଅଥଚ ଏବେଠାରୁ ଧାନ କିଣାବିକାରେ ଅଚଳାବସ୍ଥା ସ୍ଥିତି ଉପୁଜିଛି। ଜିଲାର ବିଭିନ୍ନ ମଣ୍ଡିରେ ବହୁ ପରିମାଣରେ ଧାନ ବିକ୍ରି ଅପେକ୍ଷାରେ ପଡ଼ି ରହିଛି। ଅନୁରୂପଭାବେ ବିକ୍ରି ପାଇଁ ଅନେକ ଚାଷୀ ସେମାନଙ୍କ ଧାନ ଘରେ, ଖଳାରେ ରଖିଛନ୍ତି। କିନ୍ତୁ ମଣ୍ଡିରେ ଧାନ ଉଠାଯାଉ ନ ଥିବାବେଳେ ଚାଷୀ ବିକ୍ରିଯୋଗ୍ୟ ଧାନ ମଣ୍ଡିକୁ ଆଣୁଥିବାବେଳେ ତାକୁ ମଧ୍ୟ ଏଣ୍ଟ୍ରି କରାଯାଉ ନ ଥିବା ଅଭିଯୋଗ ହୋଇଛି। ଅନ୍ୟପକ୍ଷରେ ବର୍ଷା ମାଡ଼ି ଆସିଥିବାରୁ ଚାଷୀଙ୍କ ଚିନ୍ତା ବଢ଼ିଯାଇଛି। ଏହାକୁ ନେଇ ବୁଧବାର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଓଡ଼ିଶା ରାଜ୍ୟ କୃଷକ ସଂଗଠନ, ଅତାବିରା ଶାଖା ସମେତ ଜିଲାର ବିଭିନ୍ନ ଚାଷୀ ସଂଗଠନ ଧାରଣାରେ ବସିଥିଲେ। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ଏବଂ ମୁଖ୍ୟ ଜିଲା ଯୋଗାଣ ଅଧିକାରୀ ବିଭୁ ପ୍ରସନ୍ନ ଆଚାର୍ଯ୍ୟ ଧାରଣାସ୍ଥଳକୁ ଯାଇ ଚାଷୀଙ୍କ ସହିତ ଆଲୋଚନା କରିଥିଲେ। ମଣ୍ଡିରେ ଧାନ ଏଣ୍ଟ୍ରି ସହିତ ଧାନ ଉଠାଣ ନ ହେବା ପର୍ଯ୍ୟନ୍ତ ଧାରଣାରୁ ଉଠିବେ ନାହିଁ ବୋଲି ଚାଷୀମାନେ ଅତିରିକ୍ତ ଜିଲାପାଳ ଏବଂ ଜିଲା ମୁଖ୍ୟ ଯୋଗାଣ ଅଧିକାରୀଙ୍କୁ ରୋକଠୋକ୍ ଶୁଣାଇ ଦେଇଥିଲେ। ତେବେ ବିଭିନ୍ନ ମଣ୍ଡିରେ ଧାନ ଏଣ୍ଟ୍ରି ସହିତ ଉଠାଣ ପ୍ରକ୍ରିୟା ପୁଣି ଆରମ୍ଭ କରାଯାଇଥିବା ଜାଣିବା ପରେ ଚାଷୀମାନେ ଧାରଣାରୁ ଉଠିଥିଲେ।
ସୂଚନା ଅନୁଯାୟୀ, ଗତ ମେ’ ୧୪ ତାରିଖରୁ ଜିଲାରେ ରବିଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଛି। ତେବେ ମେ’ ମାସ ଶେଷ ସପ୍ତାହରେ ଅଦିନିଆ ବର୍ଷା ହେବା ଯୋଗୁ ଧାନ କିଣାବିକା ବାଧାପ୍ରାପ୍ତ ହୋଇଥିଲା। ଏହାପରେ ଧାନ ଉଠାଣ ପ୍ରକ୍ରିୟା ମଧ୍ୟ ଶିଥିଳ ହୋଇ ପଡ଼ିଥିଲା। ମଣ୍ଡିଗୁଡ଼ିକୁ ଯେଉଁ ପରିମାଣରେ ଧାନ ଆସୁଥିଲା, ସେହି ଅନୁପାତରେ ଧାନ ଉଠାଣ ହେଉ ନ ଥିବାରୁ ପରିସ୍ଥିତି ଦିନକୁ ଦିନ ଜଟିଳ ହୋଇ ପଡ଼ିଥିଲା। ଅନ୍ୟପଟେ ମଣ୍ଡିକୁ ନ ଆସି ବେପାରୀ ମାଧ୍ୟମରେ ସିଧାସଳଖ ବିଭିନ୍ନ ରାଇସ୍ ମିଲ୍କୁ ଧାନ ଯାଉଥିବା ଏବଂ ତାକୁ ପରବର୍ତ୍ତୀ ସମୟରେ ଫଲ୍ସଏଣ୍ଟ୍ରି କରାଯାଉଥିବା ଚାଷୀମାନେ ଅଭିଯୋଗ କରିଥିଲେ। ଏଭଳିଭାବେ ଛତିଶଗଡ଼ର ବହୁ ପରିମାଣର ଧାନ ବିଭିନ୍ନ ରାଇସ୍ ମିଲ୍ରେ ପୂରି ରହିଥିବା ଚାଷୀମାନେ ଅଭିଯୋଗ କରିଛନ୍ତି।
ଅପରପକ୍ଷେ ଜିଲାର ଚାଷୀମାନଙ୍କ ବହୁ ପରିମାଣରେ ଧାନ ମଣ୍ଡି ଏବଂ ଖଳାରେ ବିକ୍ରି ଅପେକ୍ଷାରେ ପଡ଼ି ରହିଛି। କିନ୍ତୁ ବିଭିନ୍ନ ଆଳ ଦେଖାଇ ଖଳାରେ ପଡ଼ିଥିବା ଧାନକୁ ମଣ୍ଡିରେ ଏଣ୍ଟ୍ରି କରି ଦିଆଯାଉ ନ ଥିବାବେଳେ ମଣ୍ଡିରେ ପଡ଼ିଥିବା ଧାନକୁ ଉଠାଯାଉ ନ ଥିବା ଅଭିଯୋଗ ହୋଇଛି। କେତେବେଳେ କଟନୀଛଟନୀ ତ ଆଉକେବେ ମିଲର୍ସଙ୍କ ଆଲଟ୍ମେଣ୍ଟ୍ ପୂରି ଯାଇଥିବା ଏବଂ ଧାନକିଣା ପାଇଁ ଟ୍ୟାଗ୍ ନ ଥିବା ବିଭାଗୀୟ କର୍ମଚାରୀମାନେ ସଫେଇ ଦେଉଛନ୍ତି ବୋଲି ଚାଷୀମାନେ କହିଛନ୍ତି। ତେବେ ବୁଧବାର ଅତାବିରା ନିୟନ୍ତ୍ରିତ ବଜାର କମିଟି(ଆର୍ଏମ୍ସି) ଅଧୀନ ଅତାବିରା, ମନାପଡ଼ା, ଲରମ୍ଭା, ପାହାଡ଼ଶ୍ରୀଗିଡ଼ା ସମେତ ଅନ୍ୟ ଆର୍ଏମ୍ସିର ବିଭିନ୍ନ ମଣ୍ଡିରେ ସେଭଳି ପରିସ୍ଥିତି ଉପୁଜିଥିଲା। ଫଳରେ ଚାଷୀ ଅସନ୍ତୋଷ ଦେଖାଯାଇଥିଲା ଏବଂ ଚାଷୀମାନେ ଜିଲାପାଳଙ୍କ କାର୍ଯ୍ୟାଳୟକୁ ପହଞ୍ଚି ଧାରଣାରେ ବସିଥିଲେ। ଚାଷୀନେତା ଟିକେଲାଲ ମିଶ୍ର, ରମେଶ ମହାପାତ୍ରଙ୍କ ନେତୃତ୍ୱରେ ଅନେକ ଚାଷୀ ଧାରଣାରେ ସାମିଲ ଥିଲେ।
