ରସୁଲପୁର,୩୧ା୩(ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳରେ ପଶ୍ଚିମା ଝଡ ପ୍ରଭାବରେ ୨ଦିନ ହେଲା କାଳବୈଶାଖୀ ତାଣ୍ଡବ ଦେଖିବାକୁ ମିଳିଛି। ଏହାର ପ୍ରଭାବରେ ପ୍ରାୟତଃ ୧୫୦ କି.ମି. ବେଗରେ ପବନ ବହିବା ସହ ବିଜୁଳି ଘଡଘଡି ସାଙ୍ଗକୁ ପ୍ରବଳ ବର୍ଷା ହୋଇଛି। ଏଥିଯୋଗୁ ଚାଷୀମାନଙ୍କ ବିଶେଷ କ୍ଷତି ହୋଇଛି। ବାଦାମ, ପୋଟଳ, ଝୁଡଙ୍ଗ, କଲରା, କାକୁଡି ଭଳି ଲତା ଜାତୀୟ ପନିପରିବା କିଆରୀରେ ବର୍ଷାପାଣି ଲହଡି ମାରୁଛି। ପବନ ଯୋଗୁ ବଡ ଗଛ ଭାଙ୍ଗି ରାସ୍ତା ଉପରେ ପଡିଛି। ଗଛ ଡାଳ ପଡି ଘର ଭାଙ୍ଗି ଯାଇଛି, ଏକ ଟାଟା ଏସି ଗାଡି ଗଛ ଡାଳ ତଳେ ଚାପି ହୋଇ ରହିଯାଇଛି। ହେଲେ କୌଣସି ମୃତାହତର ସୂଚନା ମିଳି ନାହିଁ। ଏଭଳି ସ୍ଥିତିରେ ଏହି ବ୍ଲକର ଓଡିଶୋ, କଲଣ, ଟିକରପଡା, ପହଁଗା, ଲକ୍ଷ୍ମୀନଗର ଭଳି ଏକାଧିକ ପଞ୍ଚାୟତରେ କ୍ଷୟକ୍ଷତି ଘଟିଛି।
ଓଡିଶୋ ପଞ୍ଚାୟତର ଶାନ୍ତିଲତା ବେହେରାଙ୍କ ଘର ଉପରେ ଗଛ ଡାଳ ପଡିବାରୁ ଚାଳ ଭାଙ୍ଗି ଯାଇଛି। କାନ୍ଥରେ ଫାଟ ସୃଷ୍ଟି ହୋଇଛି। ଏଭଳି ସ୍ଥିତିରେ ସେ ପଡୋଶୀ ଘରେ ଆଶ୍ରୟ ନେଇଛନ୍ତି। ଘର ଉପରେ ପଡିଥିବା ଗଛ ଡାଳ କାଟିବାରେ ଅଗ୍ନିଶମ ବିଭାଗ ପକ୍ଷରୁ ସହାୟତା ମିଳି ପାରିନାହିଁ। ନିଜସ୍ବ ଖର୍ଚ୍ଚରେ ମଜୁରୀ ଲଗାଇ ମହିଳା ଜଣକ ଗଛକୁ ଘର ଉପରୁ ହଟାଇ ଦେଇଛନ୍ତି। ତେବେ କାନ୍ଥର ଅବସ୍ଥା ବିପଦପୂର୍ଣ୍ଣ ଥିବାରୁ କ୍ଷତିଗ୍ରସ୍ତ ପରିବାର ଲୋକେ ନିଜ ଘରକୁ ଫେରି ନାହାଁନ୍ତି। କ୍ଷତିଗ୍ରସ୍ତ ପରିବାରକୁ ତହସିଲ ପ୍ରଶାସନ ପକ୍ଷରୁ ଆର୍ଥିକ ସହାୟତା ପ୍ରଦାନ କରିବାକୁ ସରପଞ୍ଚ ଜିତେନ୍ଦ୍ର ସାହୁ ଦାବି କରିଛନ୍ତି। ଓଡିଶୋ ପଞ୍ଚାୟତର ଚାଷୀ ବାଇଧର ନାୟକ, କରୁଣାକର ସାମଲ, ନାରାୟଣ ନାୟକ ପ୍ରମୁଖଙ୍କ ବାଦାମ ଚାଷରେ ବ୍ୟାପକ କ୍ଷତି ଘଟିଛି। ଶତାଧିକ ଚାଷୀଙ୍କ ପନିପରିବା ଚାଷ ପ୍ରଭାବିତ ହୋଇଛି। ଲକ୍ଷ୍ମୀନଗର ପଞ୍ଚାୟତର ମୁଖ୍ୟ ଗମନାଗମନ ରାସ୍ତାରେ ଗଛଡାଳ ଭାଙ୍ଗି ପଡି ରାସ୍ତା ଅବରୋଧ ହୋଇଥିଲା। ଏକ ବରଗଛ ଡାଳ ଗୋଟିଏ ମାଲବୋଝଇ ଗାଡି ଉପରେ ପଡିଯିବାରୁ ଉକ୍ତ ଗାଡିଟି ରାସ୍ତା ଉପରେ ଫସି ରହିଥିଲା। ସ୍ଥାନୀୟ ଜନସାଧାରଣ ଡାଳକୁ ହାଣି ରାସ୍ତା ସଫା କରିଛନ୍ତି। ଅଦିନିଆ ଝଡ ତୋଫାନ ଯୋଗୁ ବିଭିନ୍ନ ସ୍ଥାନରେ କ୍ଷୟକ୍ଷତି ଘଟୁଛି। ଏହାକୁ ପୁରୁଖାମାନେ ମାଳିକା ବର୍ଣ୍ଣିତ ଖଣ୍ଡ ପ୍ରଳୟ ବୋଲି କହୁଛନ୍ତି।
