ବରଗଡ଼,୨୮ା୫ (ପ୍ରେମାନନ୍ଦ ଖମାରୀ)- ବରଗଡ଼ ଜିଲାରେ ଚାଷ ଏବଂ ଚାଷୀଙ୍କ ସମସ୍ୟା ନେଇ ଅସନ୍ତୋଷ ବଢି ଚାଲିଥିବାବେଳେ ଆନ୍ଦୋଳନ ମଧ୍ୟ ତେଜି ଉଠିଛି। ବୁଧବାର ବରଗଡ଼ ଜିଲାପାଳ ଅଫିସରେ ଏହା ପ୍ରତିଫଳିତ ହୋଇଥିଲା। ରେଶମ, ସିଂହେନପାଳି, ପଧାନପାଲି, ସାଲ୍ହେପାଲି, ଅରେଇଗୁଡ଼ି, ଗୁଦରାମୁଣ୍ଡା, ଇଛାପଦାରର ଟୋକନଧାରୀ ଶତାଧିକ ଚାଷୀ ଧାନ କିଣାବିକା ସମସ୍ୟା ନେଇ ଜିଲାପାଳଙ୍କ ଅଫିସ ଆଗରେ ଧାରଣା ଦେବା ସହିତ ବିକ୍ଷୋଭ ପ୍ରଦର୍ଶନ କରିଥିଲେ। ଏହା ସହିତ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ସ୍ମାରକପତ୍ର ପ୍ରଦାନ କରିଥିଲେ।
ସ୍ମାରକପତ୍ରରେ ଚାଷୀମାନେ ଅଭିଯୋଗ କରିଛନ୍ତି, ରେଶମ ଏବଂ ଅରେଇଗୁଡ଼ି ପଞ୍ଚାୟତ ଅଧୀନରେ ଥିବା ମାର୍କେଟୟାଡ଼ ଗୁଡ଼ିକରେ ହଜାର ହଜାର ବସ୍ତା ଧାନ ପଡ଼ିଥିଲେ ମଧ୍ୟ ଧାନ ଉଠୁନାହିଁ। ବୁଧବାର ସୁଦ୍ଧା ୩୧୫ କୁଇଣ୍ଟାଲ ଧାନ କେବଳ ରେଶମ ମଣ୍ଡିରୁ ୮ଜଣ ଚାଷୀଙ୍କ ଧାନ କିଣାଯାଇଛି। ସେଥିପାଇଁ ଏହାର ତୁରନ୍ତ ସମାଧାନ ପାଇଁ ଚାଷୀ ଯେଉଁ ଦିନ ମଣ୍ଡିକୁ ଧାନ ଆଣିବେ, ସେହି ଦିନ ଧାନର ଉଠାଇବାକୁ ଦାବି କରିଛନ୍ତି। ସରକାରଙ୍କ ଘୋଷଣା ମୁତାବକ ପ୍ରତ୍ୟେକ ମଣ୍ଡିରୁ ପ୍ରତିଦିନ ଶୀଘ୍ର ଏକ ହଜାର କୁଇଣ୍ଟାଲରୁ ଊର୍ଦ୍ଧ୍ୱ ଧାନ କିଣା ଯାଉ ନ ହେଲେ ଏହି ଅଞ୍ଚଳରେ ଚାଷୀମାନେ ଧାନ ବିକ୍ରିରୁ ନିର୍ଦ୍ଧାରିତ ସମୟ ମଧ୍ୟରେ ଧାନ ବିକ୍ରି କରି ପାରିବେ ନାହଁ ବୋଲି ଚାଷୀନେତାମାନେ କହିଛନ୍ତି। ଚାଷୀମାନେ ପ୍ରଥମେ ଗାନ୍ଧୀଛକରେ ସମବେତ ହୋଇ ବିଭିନ୍ନ ସ୍ଲୋଗାନ ଦେଇ ରାଲିରେ ଜିଲାପାଳ ଅଫିସ ଅଭିମୁଖେ ଯାଇଥିଲେ। ଚାଷୀମାନେ ସେଠାକୁ ପହଞ୍ଚିବା ପୂର୍ବରୁ ପୋଲିସ ଜିଲାପାଳ ଅଫିସ ମୁଖ୍ୟ ଫାଟକ ବନ୍ଦ କରି ଦେଇଥିଲା।ସେଠାରେ ଆନ୍ଦୋଳନରତ ଚାଷୀମାନେ ଧାରଣାରେ ବସି ପ୍ରତିବାଦ ସଭା କରିଥିଲେ। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ସେଠାକୁ ଆସି ଧାରଣାରତ ଚାଷୀଙ୍କ ସହିତ ଆଲୋଚନା କରିଥିଲେ। ଚାଷୀମାନେ ନିଜ ଜିଦରେ ଅଟଳ ରହିବାରୁ ଯୋଗାଣ ଅଧିକାରୀ ଆସି ଦାବି ଗୁଡିକ ପୂରଣ ପାଇଁ ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ପ୍ରତିଶ୍ରୁତିର ଖୀଲାପ ହେଲେ କୌଣସି ମୁହୂର୍ତ୍ତରେ ରାଜରାସ୍ତାକୁ ଓହ୍ଲାଇବା ପାଇଁ ଚାଷୀମାନେ ଚେତାବନୀ ଦେଇଛନ୍ତି। ଚାଷୀନେତା ସୁଦାମ ପାତ୍ର, ନରେନ୍ଦ୍ର ଭୋଇ, ନିର୍ମଳ ପଧାନ, ସୁବ୍ରତ ପଧାନ, ମହେଶ ପଧାନ, ଜିତେନ ପୋଡ଼, ରଘୁନାଥ ପରଡିଆ, ସମ୍ପଦ ସାହୁ, ଦେବେନ୍ଦ୍ର ପଧାନ, ସମ୍ପର୍ଣ୍ଣ ମାଝୀ, ଲଳିତ ସାହୁ, ଅମୁଲ୍ୟ ସାହୁ, ସୁଦାମ ଭୋଇ, ଗୌରାଙ୍ଗ ବେହେରା, ସମୁଦ୍ର ଭୋଇ, କୀର୍ତ୍ତି ବଗର୍ତି, କରୁଣା ସେଟ ଏବଂ ସଂଯୁକ୍ତ କୃଷକ ସଂଗଠନ ଉପଦେଷ୍ଟା ରମେଶ ମହାପାତ୍ର ଓ ସୁରେଶ ନିକେଣ୍ଟି ପ୍ରମୁଖ ଏଥିରେ ସକ୍ରିୟ ଅଂଶଗ୍ରହଣ କରିଥିଲେ।
ସେହିପରି ଧାନ ବିକ୍ରି ସମସ୍ୟା ଏବଂ ଅଦିନିଆଁ ବର୍ଷାକୁ ନେଇ ଚାଷୀ ସଂଗଠନ ଜୟ କିସାନ ଆନ୍ଦୋଳନର ଏକ ପ୍ରତିନିଧି ମଣ୍ଡଳୀ ମଧ୍ୟ ବୁଧବାର ଜିଲାପାଳ ଗୋୟଲଙ୍କ ସହିତ ଆଲୋଚନା କରିଥିଲେ। ଯୁଦ୍ଧକାଳୀନ ଭିତ୍ତିରେ ଜିଲାର ସମସ୍ତ ମଣ୍ଡିରୁ ଧାନ ସଂଗ୍ରହ କରାଯାଉ ବୋଲି ଦାବି ହୋଇଛି। ମିଲର୍ସମାନଙ୍କ ଉପରେ ନିର୍ଭର ନକରି ପେକ୍ସ ନିଜେ ସମସ୍ତ ଧାନକୁ କିଣି ଗଚ୍ଛିତ କରୁ । ଅନ୍ୟଥା ବହୁ ଚାଷୀ ଧାନ ବିକ୍ରିରୁ ବଞ୍ଚିତ ହେବା ଆଶଙ୍କା ରହିଛି ବୋଲି ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଥିଲା।
ଜିଲାରେ ବର୍ତ୍ତମାନ ପର୍ଯ୍ୟନ୍ତ ୩୯ଲକ୍ଷ ୯୫ହଜାର ୧୦୦ କୁଇଣ୍ଟାଲ ଧାନ ପ୍ରଥମ ପର୍ଯ୍ୟାୟରେ କିଣିବା ପାଇଁ ଲକ୍ଷ୍ୟ ଧାର୍ଯ୍ୟ ଥିବା ବେଳେ ବୁଧବାର ସୁଦ୍ଧା ୧୬ଲକ୍ଷ ୮୭ହଜାର କୁଇଣ୍ଟାଲ ଧାନ ବିକ୍ରି ହେଉଛି। କିନ୍ତୁ ସତଲମା ରେଶମ, ପଧାନପାଲି ଏବଂ ସଲେପାଲି ମଣ୍ଡିରେ ୫ପ୍ରତିଶତ ଧାନ କାହିଁକି ବିକ୍ରି ହୋଇନାହିଁ ବୋଲି ଜିଲାପାଳଙ୍କୁ ଚାଷୀ ପ୍ରତିନିଧିମାନେ ପ୍ରଶ୍ନ କରିଥିଲେ। ଏହି ଆଲୋଚନାରେ ପଶ୍ଚିମ ଓଡିଶା କୃଷକ ସଂଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ ଯୋଗଦେଇ ମଣ୍ଡିଗୁଡ଼ିକରେ ପଡିଥିବା ସମସ୍ତ ଧାନକୁ ଯୁଦ୍ଧକାଳୀନ ଭିତ୍ତିରେ କିଣିବା ପାଇଁ ଜିଲାପାଳଙ୍କୁ କହିଥିଲେ। ରାଜ୍ୟ ସରକାର ଧାନମାନରେ କୋହଳ କରି ସମସ୍ତ ଧାନ କିଣିବାର ବ୍ୟବସ୍ଥା କରନ୍ତୁ ନ ହେଲେ ଭୟଙ୍କର ପରିସ୍ଥିତି ସୃଷ୍ଟି ହେବ ବୋଲି ସେ ଚେତାବନୀ ଦେଇଥିଲେ। ଜୟ କିସାନ ଆନ୍ଦୋଳନର ସଭାପତି ସୁଶୀଲ କୁମାର ସାହୁ, ସାଧାରଣ ସମ୍ଫାଦକ ହର ବଣିଆଁ, ବରିଷ୍ଠ ଚାଷୀନେତା ଶିବ ପ୍ରସାଦ ପ୍ରଧାନ, ମହେଶ୍ବର ପ୍ରଧାନ, ଚଞ୍ଚଳ ପ୍ରଧାନ, ଅରୁଣ ପ୍ରଧାନ, ଭଞ୍ଜନ ବାରିକ, ସିଲିଂ ସାହୁ, ତପୋବନ୍ତ ନାୟକ, ମିନିଷ୍ଟର ବାରିକ, ବିଜୟ ପ୍ରଧାନ, ବିରଞ୍ଚି ମହାକୁଡଙ୍କ ସମେତ ବିଭିନ୍ନ ମଣ୍ଡିର ପ୍ରତିନିଧି ଯୋଗ ଦେଇଥିଲେ।
