ବରଗଡ଼ ଅଫିସ,୩୧।୫: ବରଗଡ଼ ଜିଲାରେ ରବିଋତୁ ଧାନ ସଂଗ୍ରହ ପ୍ରକ୍ରିୟାରେ ଅବ୍ୟବସ୍ଥା ଲାଗି ରହିଛି। ବିକ୍ରି ପାଇଁ ଚାଷୀମାନେ ଟୋକନ୍ ସହିତ ଧାନ ଆଣୁଥିଲେ ସୁଦ୍ଧା ତାହା ଉଠୁ ନ ଥିବା ଅଭିଯୋଗ ହୋଇଛି। ଅନ୍ୟପଟେ ମିଲର୍ସମାନେ ଧାନର ବିନା ଗୁଣମାନ ପରୀକ୍ଷାରେ କଟନୀଛଟନୀ କରୁଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ନେଇ ମଙ୍ଗଳବାର ବରଗଡ଼ ଜିଲା ବରପାଲି ବ୍ଳକ ସତଲମା ଅଞ୍ଚଳର ଚାଷୀମାନେ ଜିଲାପାଳ ଅଫିସରେ ଧାରଣା ଦେବା ସହିତ ବିକ୍ଷୋଭ ପ୍ରଦର୍ଶନ କରିଛନ୍ତି। ଗତ ୧୨ତାରିଖରୁ ଉକ୍ତ ଧାନକ୍ରୟ କେନ୍ଦ୍ରରେ ଧାନ ଉଠାଇବାକୁ ୮ ମିଲର୍ସଙ୍କୁ ୨୩ହଜାର ୮୦୦ କୁଇଣ୍ଟାଲ ଧାନ ଆଲଟମେଣ୍ଟ ହୋଇଛି। କିନ୍ତୁ ଏପର୍ଯ୍ୟନ୍ତ ୪୪୮୯ କୁଇଣ୍ଟାଲ ଧାନକୁ ଉଠାଯାଇଛି। ବାକି ଧାନକୁ ଉଠାଯାଉ ନଥିବା ବେଳେ ମିଲର୍ସମାନେ କଟନୀଛଟନୀ କରୁଥିବା ଚାଷୀମାନେ ଅଭିଯୋଗ କରିଛନ୍ତି। ମଣ୍ଡିରେ ପଡିଥିବା ଧାନ ଉଠାଣ ନ ହେବା ପର୍ଯ୍ୟନ୍ତ ଚାଷୀମାନେ ଧାରଣାରୁ ଉଠିବେ ନାହିଁ ବୋଲି ଚେତାବନୀ ଦେଇଛନ୍ତି।
