ଲୋଇସିଂହା,୨୮ା୨(ସୁଶାନ୍ତ ବାରିକ): ଲୋୟର ସୁକତେଲ ପ୍ରକଳ୍ପରୁ ଜଳସେଚନ ଓ ବିଭିନ୍ନ ଦାବି ନେଇ ବଲାଙ୍ଗୀର ଲୋଇସିଂହା ଥାନା ରୁଗୁଡ଼ିଖାଲଠାରେ ଚାଷୀମାନେ ବୁଧବାର ରାଜରାସ୍ତାକୁ ଓହ୍ଲାଇଛନ୍ତି। କୃଷକ ସଙ୍ଘର୍ଷ ସମିତି ସଭାପତି ରତ୍ନାକର ମିଶ୍ରଙ୍କ ନେତୃତ୍ୱରେ ଆଗଲପୁର ବ୍ଲକର ୫ଟି ପଞ୍ଚାୟତ ନଅଗାଁ (ଖ), ବେନ୍ଦ୍ରା, ବଡ଼ଟିକା, ନୁନିଆପାଲି ଓ ଝରଣୀପାଲି ଶତାଧିକ ଚାଷୀ ବଲାଙ୍ଗୀର ବରଗଡ଼ ୨୬ନଂ ଜାତୀୟ ରାଜପଥ ଅବରୋଧ କରି ବିକ୍ଷୋଭ ପ୍ରଦର୍ଶନ କରୁଛନ୍ତି। ଉପରୋକ୍ତ ସମସ୍ୟା ନେଇ ଜିଲା ପ୍ରଶାସନ ଓ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ ସୁଦ୍ଧା ସୁଫଳ ପାଇପରିନାହାନ୍ତି। ଏହାକୁ ନେଇ ଚାଷୀ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଚାଷ ଓ ଚାଷୀଙ୍କୁ ଅଣଦେଖା ପ୍ରତିବାଦରେ ଚାଷୀ ନେତା କ୍ଷମାନିଧି ଦଳପତି, କୃଷ୍ଣଚନ୍ଦ୍ର ନାୟକ, ଶ୍ୟାମସୁନ୍ଦର ବିଶ୍ୱାଳ ସମେତ ବହୁ ଚାଷୀ ନେତା କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ତୀବ୍ର ସମାଲୋଚନା କରିଛନ୍ତି। ଏଥିରେ ଜିଲା କୃଷକ ମହା ସଂଘ ସଦସ୍ୟ ଯତି ପଧାନ ଯୋଗ ଦେଇ ଚାଷୀ ମାରଣ ସରକାର ବୋଲି କହିଛନ୍ତି। ଆନ୍ଦୋଳନ ଯୋଗୁ ରାଜପଥର ଉଭୟ ପଟରେ ଶହ ଶହ ଯାନବାହନ ଅଟକି ରହିଛି। ଜିଲାପାଳ ଆସି ଆଲୋଚନା ନ କରିବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଆନ୍ଦୋଳନକାରୀମାନେ କହିଛନ୍ତି।
