ବଡ଼ଗାଁ,୨୭।୮(ଅଶୋକ ଷଡ଼ଙ୍ଗୀ): ସୁନ୍ଦରଗଡ଼ ଜିଲା ବଡ଼ଗାଁ ବ୍ଲକରେ ଚଳିତ ବର୍ଷ ଖରିଫ ଧାନ ବିକ୍ରି ପାଇଁ ଚାଷୀଙ୍କ ନାମ ପଞ୍ଜିକରଣ ପ୍ରକ୍ରିୟାକୁ ନେଇ ଚାଷୀମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ବଡ଼ଗାଁ ବ୍ଲକର ବଡ଼ଗାଁ, ସାହାଜବାହାଲ, ଜରଙ୍ଗଲୋଇ, ଦାଣ୍ଡଜମରା, ବରଙ୍ଗାକଛାର ଓ ଏକମା ଗ୍ରାମରେ ସମବାୟ ସମିତି ରହିଛି। ଏହି ସମବାୟ ସମିତି ଅଧୀନ ବିଭିନ୍ନ ଗ୍ରାମର ପ୍ରାୟ ୫୦ପ୍ରତିଶତ ଚାଷୀ ଏ ଯାଏ ଧାନ ବିକ୍ରି ପାଇଁ ନାମ ପଞ୍ଜିକରଣ କରିଥିଲାବେଳେ ୫୦ ପ୍ରତିଶତ ଚାଷୀ ଏବେ ମଧ୍ୟ ନାମ ପଞ୍ଜିକରଣ କରିପାରିନାହାନ୍ତି। ବହୁ ସଂଖ୍ୟକ ଚାଷୀ ଧନ ବିକ୍ରି ପାଇଁ ନାମ ପଞ୍ଜିକରଣ କରିପାରୁନଥିବାରୁ ପଞ୍ଜିକରଣ ସମୟସୀମାକୁ ବୃଦ୍ଧି କରିବାକୁ ଚାଷୀ ମହଲରେ ଦାବି ହେଉଛି।
ସୂଚନାଯୋଗ୍ୟ ଯେ ଚଳିତ ବର୍ଷ ଧାନ ବିକ୍ରି ପାଇଁ ପଞ୍ଜିକରଣ ଶେଷ ତାରିଖ ଆସନ୍ତା ୩୧ ତାରିଖ ପର୍ଯ୍ୟନ୍ତ ଅଛି। ଆଉ ମାତ୍ର ୪ ଦିନ ମଧ୍ୟରେ ବାକି ରହିଥିବା ବହୁ ସଂଖ୍ୟକ ଚାଷୀଙ୍କ ନାମ ପଞ୍ଜିକରଣ କରିବା ସମ୍ଭବ ନୁହେଁ ବୋଲି ସମବାୟ ସମିତି କର୍ମଚାରୀଙ୍କ ଠାରୁ ସୂଚନା ମିଳିଛି । ଏ ସଂପର୍କରେ ସାହାଜବାହାଲ ସମବାୟ ସମିତିର ଏମଡି ନରେନ୍ଦ୍ର ସାହୁଙ୍କୁ ପଚାରିବାରୁ ସେ ୩୧ ତାରିଖ ମଧ୍ୟରେ ବାକି ରହିଥିବା ଚାଷୀଙ୍କ ନାମ ପଞ୍ଜିକରଣ କରିବା ସମ୍ଭବ ହେବନାହିଁ ବୋଲି କହିଛନ୍ତି।
ପାମରା ଗ୍ରାମର ଚାଷୀ କାର୍ତ୍ତିକ ବେହେରା, ଦଶରଥ ବାରିକ, ଦିଲ୍ଲୀପ ରାଉତ୍, ମୂରଲୀଧର ବାରିକ, ସାହାଜବାହାଲ ଗ୍ରାମର ସୁରେନ୍ଦ୍ର ସାହୁ, ବସନ୍ତ ସାହୁ, ଗୋପାଳ ପୃଷେଟଙ୍କ ସହିତ ବହୁ ସଂଖ୍ୟକ ଚାଷୀ ପଞ୍ଜିକରଣ ଅବଧି ବୃଦ୍ଧି କରିବାକୁ ଦାବି କରିଛନ୍ତି । ସେହିପରି ବଡ଼ଗାଁ ସମବାୟ ସମିତିର ଏମଡି ଭେଷଜ ବରିହାଙ୍କ ଠାରୁ ମିଳିଥିବା ସୂଚନା ଅନୁଯାୟୀ , ଚଳିତ ବର୍ଷ ଧାନ ବିକ୍ରି ପାଇଁ ୨୭୦୦ ଚାଷୀ ଫର୍ମ ନେଇଛନ୍ତି। ସେଥିମଧ୍ୟରୁ ବଡ଼ଗାଁର ୭୫୫ ଜଣ ଙ୍କ ରେଜିଷ୍ଟ୍ରେସନ ହୋଇଥିଲାବେଳେ ଜରଙ୍ଗଲୋଇ ସମବାୟ ସମିତି ରେ ୨୦୦ ଓ ଦାଣ୍ଡଜମରା ସମବାୟ ସମିତିରେ ୧୪୧ ଜଣ ଚାଷୀଙ୍କ ନାମ ପଞ୍ଜିକରଣ ହୋଇଛି । ତେବେ ଅନେକ ସମୟରେ ସର୍ଭର ଡାଉନ୍ ରହୁଥିବା, ବିଜୁଳି ଚାଲିଯାଉଥିବାରୁ କାର୍ଯ୍ୟରେ ବିଳମ୍ବ ହେଉଛି । ଚାଷୀଙ୍କ ସ୍ବାର୍ଥକୁ ଦୃଷ୍ଟିରେ ରଖି ପଞ୍ଜିକରଣ ସମୟସୀମା ବୃଦ୍ଧି କରିବାକୁ ଦାବି ହେଉଛି।