ଦିଗପହଣ୍ଡି,୨୯।୯(ଅଶେଷ ନାଥ ମିଶ୍ର):ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବି.ତୁରୁବୁଡ଼ି ଗ୍ରାମ ଶ୍ରୀ ରଘୁନାଥ ମହାପ୍ରଭୁ ପ୍ରାଥମିକ ସେବା ସମବାୟ ସମିତି କାର୍ଯ୍ୟାଳୟ ସମ୍ମୁଖରେ ସୋମବାର ଭୋରରୁ ୟୁରିଆ ସାର ତୁରନ୍ତ ପ୍ରଦାନ ନିମନ୍ତେ ବି. ତୁରୁବୁଡ଼ି,ଝରିପଦର, ନରେନ୍ଦ୍ରପୁର,କାଣ୍ଡସର, ଦସିପୁର,ବିରିବାଡ଼ିଆ,ନୂଆଗାଁ ପ୍ରଭୃତି ଅନ୍ୟାନ୍ୟ ଗ୍ରାମର ୫ ଶହରୁ ଉଦ୍ଧର୍ବ ଚାଷୀ ହୋ-ହଲ୍ଲା କରିଥିଲେ। ସମବାୟ ସମିତି ସମ୍ପାଦିକା ଆର. ରୋଜାଲିନ ରେଡ୍ଡୀ, ନୋଡାଲ ଅଧିକାରୀ ତଥା ମହିଳା କୃଷି କର୍ମଚାରୀ ପୂର୍ଣ୍ଣଲତା ଅଧିକାରୀ ଉପସ୍ଥିତ ଚାଷୀଙ୍କ ସହ ଆଲୋଚନା କରିବା ପରେ ପୋଲିସ ଉପସ୍ଥିତିରେ ଚାଷୀଙ୍କୁ ସାର ବଣ୍ଟନ କରିଥିଲେ। ବିକ୍ରି ପାଇଁ ମହଜୁଦ ଥିବା ୪୫୦ ସାର ପ୍ୟାକେଟ ମଧ୍ୟରୁ କେବଳ ସମିତିରୁ କୃଷି ଋଣ ନେଇଥିବା ଚାଷୀଙ୍କୁ ପ୍ରଥମ ପର୍ଯ୍ୟାୟରେ ସାର ବିକ୍ରି କରାଯାଇଥିଲା। ଏନେଇ ସମବାୟ ସମ୍ପାଦିକାଙ୍କୁ ପଚାରିବାରୁ ସେ ଦାୟିତ୍ୱ ନେବା ପୂର୍ବରୁ ଚାଷୀଙ୍କୁ ୫ଟି ଟ୍ରକରେ ଆସିଥିବା ପ୍ରାୟ ୧୧୨୫ ବସ୍ତା ୟୁରିଆ ସାର ବିକ୍ରୀ କରାଯାଇଥିଲା। ସେ ଦାୟିତ୍ୱ ନେବା ପରେ ପ୍ରଥମ ପର୍ଯ୍ୟାୟରେ ଗତ ୩ ତାରିଖରେ ୨ ଟି ଟ୍ରକରେ ଆସିଥିବା ୪୫୦ ବସ୍ତା ସାର ଦିଗପହଣ୍ଡି ତହସିଲଦାର ସନ୍ତୋଷ କୁମାର ସାହୁ,କୃଷି ବିଭାଗ ଅଧିକାରୀ ଏବଂ ପୋଲିସ ଉପସ୍ଥିତିରେ ବିକ୍ରୀ କରାଯାଇଥିଲା।ପଞ୍ଚାୟତର ଅନ୍ୟ ପ୍ରାଥମିକ ସେବା ସମବାୟ ସମିତିରେ ପଞ୍ଜୀକୃତ ହୋଇଥିବା ଚାଷୀମାନେ ସାର ପାଇଁ ଏଠାକୁ ଆସୁଥିବାରୁ କିଛି ସମସ୍ୟା ଉପୁଜିଛି। ଇଣ୍ଡେଣ୍ଟ ଅନୁଯାୟୀ, ଏଠାକାର ଚାଷୀଙ୍କୁ ସମୁଦାୟ ୧ ଲକ୍ଷ ୭୦ ଟନ ୟୁରିଆ ସାର ଯୋଗାଇ ଦିଆଗଲେ ସମସ୍ୟା ରହିବ ନାହିଁ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
