ନୂଆଦିଲ୍ଲୀ,୧୪ା୧(ପି.ଟି.): ଲୋହଡ଼ି ପର୍ବରେ ଆନ୍ଦୋଳନରତ ଚାଷୀମାନେ କେନ୍ଦ୍ରର କୃଷି ଆଇନ କପି ଜାଳିଛନ୍ତି। କେବଳ ସିଙ୍ଘୁ ସୀମାରେ ବିବାଦୀୟ ୩ କୃଷି ଆଇନର ୧ ଲକ୍ଷ କପି ପୋଡ଼ାଯାଇଥିବା ସାମ୍ମୁଖ୍ୟ କିଷାନ ମୋର୍ଚ୍ଚାର ପରମଜିତ୍ ସିଂ ସୂଚନା ଦେଇଛନ୍ତି। ଦିଲ୍ଲୀ-ହରିୟାଣା ସୀମାର ସବୁ ସ୍ଥାନରେ ଅନୁରୂପ ଦୃଶ୍ୟ ଦେଖିବାକୁ ମିଳିଛି।
ପଞ୍ଜାବ ଓ ହରିୟାଣାରେ ରବି ଫସଲ ଅମଳ ପାଇଁ ମକର ସଂକ୍ରାନ୍ତିର ଦିନକ ପୂର୍ବରୁ ଲୋହଡ଼ି ଉତ୍ସବ ପାଳନ କରାଯାଇଥାଏ। ଏହି ପର୍ବରେ ଲୋକେ ପାରମ୍ପରିକ ଭାବେ ନିଆଁ ଜାଳି ଧାନ, ଚଣା ଓ ପପ୍କର୍ନ ଭଳି ଖାଦ୍ୟ ସାମଗ୍ରୀ ଫିଙ୍ଗିଥାନ୍ତି। ସବୁଠି ନାଚଗୀତର ଆସର ଜମିଥାଏ। କିନ୍ତୁ ଏଥର କିଛି ଭିନ୍ନ ଦୃଶ୍ୟ ଦେଖିବାକୁ ମିଳିଛି। କୃଷି ଆଇନ ପ୍ରତ୍ୟାହାର ଦାବିରେ ପ୍ରାୟ ୫୦ ଦିନ ଧରି ଆନ୍ଦୋଳନ ଚଳାଇଥିବା ଚାଷୀମାନେ ଉକ୍ତ ଆଇନର କପି ଜାଳିଛନ୍ତି। ହରିୟାଣାର କର୍ନାଲ ନିବାସୀ ୬୫ ବର୍ଷୀୟ ଚାଷୀ ଗୁର୍ପ୍ରୀତ ସିଂ ସାଣ୍ଢୁ କହିଛନ୍ତି, କେନ୍ଦ୍ର ସରକାର ଆମର ସମସ୍ତ ଦାବି ମାନିବା ପରେ ଆମେ ସବୁ ଉତ୍ସବ ପାଳନ କରିବୁ। ଆଉ ଜଣେ ଚାଷୀ ରାଜବୀର ସିଂ କହିଛନ୍ତି, ଆଜି ଆମେ କପି ଜାଳିଛୁ। ଏଭଳି ସ୍ଥିତି ସୃଷ୍ଟି କରିବୁ ଯେ, ଆସନ୍ତାକାଲି କେନ୍ଦ୍ର ସରକାର ଏହାକୁ ଜାଳିବେ। ଯୋଗେନ୍ଦ୍ର ଯାଦବ ଓ ଗୁର୍ନାମ ସିଂ ଚଦୁନିଙ୍କ ଭଳି କୃଷକ ନେତାମାନେ ମଧ୍ୟ କିଷାନ ଆନ୍ଦୋଳନ ଅଫିସ ପରିସରରେ କୃଷି ଆଇନ କପିଗୁଡ଼ିକୁ ନିଆଁକୁ ଫିଙ୍ଗି ପୋଡ଼ିଦେଇଛନ୍ତି।
