ରସୁଲପୁର,୧।୧୨(ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳର ପରିବା ଚାଷୀଙ୍କୁ ଘାରିଲାଣି ସମ୍ଭାବ୍ୟ ବାତ୍ୟା ‘ଜଓ୍ବାଦ’ର ଭୟ। ଲଘୁଚାପ ପ୍ରଭାବରେ ହେବାକୁ ଥିବା ବାତ୍ୟା ଯୋଗୁ ଶୀତଦିନିଆ ପରିବା ଚାଷ ବିଶେଷ କ୍ଷତିଗ୍ରସ୍ତ ହେବା ଆଶଙ୍କା କରାଯାଉଛି। ଅନ୍ୟପକ୍ଷରେ ବର୍ଷାକୁ ମୁକାବିଲା ପାଇଁ ଚାଷୀଙ୍କୁ କୃଷି ଓ ଉଦ୍ୟାନ କୃଷି ବିଭାଗ ପକ୍ଷରୁ ସୂଚନା ଦିଆଗଲାଣି। ଏହି ସୂଚନା ପାଇବା ପରେ ଚାଷୀକୁଳ ମନରେ ଛନକା ପଶିଛି। ପରିବା କ୍ଷେତରୁ ବର୍ଷାପାଣି ନିଷ୍କାସନ ପାଇଁ ଚାଷୀ ବ୍ୟବସ୍ଥା କରୁଛନ୍ତି। ଏହାଛଡ଼ା ଅନ୍ୟ କିଛି ବିକଳ୍ପ ଉପାୟ ଚାଷୀଙ୍କ ପାଖରେ ନାହିଁ ବୋଲି ଅଗ୍ରଣୀ ପରିବା ଚାଷୀ ଶିଶିର ରାଉତ ମତ ରଖିଛନ୍ତି।
ଏହି ବ୍ଲକ ଅଞ୍ଚଳରେ ଅନ୍ୟୁନ ୨ ହଜାର ହେକ୍ଟରରୁ ଊର୍ଦ୍ଧ୍ୱ ଜମିରେ ପରିବା ଚାଷ ହୋଇଛି। ଶୀତଦିନିଆ ପରିବା ଚାଷ ଭାବେ କୋବି, କାକୁଡି, କଲରା, ଜହ୍ନି, ବିନ୍ସ, ବାଇଗଣ ଆଦି ଫସଲ କରାଯାଇଛି। ରବି ଋତୁରେ ଲତା ଜାତୀୟ ପରିବା ଚାଷ ମାଟି ଉପରେ ମାଡ଼ିଥାଏ। ତେଣୁ ଏହି ଋତୁର ଫସଲଗୁଡ଼ିକ ବର୍ଷାମାଡ଼ ସହିବାର କ୍ଷମତା ଅଧିକ ନ ଥାଏ। ଡିସେମ୍ବରରେ ବର୍ଷା ହେଲେ ଶୀତଦିନିଆ ଫସଲକୁ କ୍ଷତି ପହଞ୍ଚାଇବା ସୁନିଶ୍ଚିତ ବୋଲି କୁହାଯାଉଛି। କୋବି ଫସଲ ମୂଳଶଢ଼ା ଓ ପତ୍ରଝଡ଼ା ରୋଗରେ ଆକ୍ରାନ୍ତ ହେବ। କାକୁଡି, କଲରା, ଜହ୍ନି, ବିନ୍ସ ଆଦି ଫସଲ ପଚିଯିବ। ଦୁଇ ଦିନରୁ ଅଧିକ ସମୟ ବର୍ଷା ହେଲେ ପରିବା କ୍ଷେତରେ ଅଜଣା ରୋଗପୋକ ସଂଖ୍ୟା ବୃଦ୍ଧି ଘଟିବ। ସରକାରଙ୍କ ପକ୍ଷରୁ ଦିଆଯାଉଥିବା ସତର୍କତା ସୂଚନା କେବଳ ଧାନଚାଷ ପାଇଁ ଉଦ୍ଦିଷ୍ଟ ବୋଲି ଚାଷୀଙ୍କ ମହଲରେ ଆଲୋଚନା ହେଉଛି। ହେଲେ ଏହି ବ୍ଲକରେ ସ୍ବଳ୍ପ ପରିମାଣର କ୍ଷେତରେ ଧାନଚାଷ କରାଯାଉଛି। କୃଷି କ୍ଷେତ୍ରର ଉର୍ବରତାକୁ ଦୃଷ୍ଟିକୁ ରଖି ଚାଷୀ ଧାନଚାଷ ବଦଳରେ ଅନ୍ୟ ଅର୍ଥକରୀ ଫସଲ କରୁଛନ୍ତି। ଏ ସବୁ ବୀମା ପରିସରଭୂକ୍ତ ହୋଇ ନ ଥିବାରୁ ଚାଷୀଙ୍କୁ କ୍ଷତିପୂରଣ ମିଳିବା ସମ୍ଭାବନା ନାହିଁ। ଏହାଛଡ଼ା ବାଦାମ ଚାଷ ଆରମ୍ଭ ହୋଇ ସାରିଛି। ଗଛ ଉଠି ନ ଥିବା ବାଦାମ କ୍ଷେତର ମଞ୍ଜିଗୁଡିକ ପଚିଯିବ। ପୋଟଳ କ୍ଷେତରେ ପୋତା ଯାଇଥିବା ଚେର ମାଟିତଳେ ପଚିଯିବ। ବର୍ଷା ଯୋଗୁ ଚାଷ ହେବାକୁ ବାକି ଥିବା ବାଦାମ ଚାଷ, ବିରି, କୋଳଥ ଭଳି ଡାଲି ଜାତୀୟ ଫସଲ ପଛେଇ ଯିବ। ଅଦିନିଆ ବର୍ଷାରେ ଛତୁଚାଷୀ ମଧ୍ୟ ପ୍ରଭାବିତ ହେବେ। ଧିଙ୍ଗିରୀ ଛତୁଚାଷ ଅପେକ୍ଷା ପାଳଛତୁ ଚାଷୀ ବିଶେଷ ପ୍ରଭାବିତ ହେବେ। ବର୍ଷା ସହ ପବନ ହେଲେ ଛତୁ ପଚି ଯିବା ସହ ଛତୁ ପାଇଁ ପ୍ରସ୍ତୁତ ଶଯ୍ୟା ଗୁଡିକ ଭାଙ୍ଗିଯିବ ବୋଲି ଛତୁ ଚାଷୀ ତପନ ଦଳେଇ ମତ ରଖିଛନ୍ତି। ପାନବରଜ ଚାଷୀ ବି ଭୟଭୀତ ହୋଇପଡ଼ିଛନ୍ତି। ବର୍ଷା ସହ ପବନ ବହିଲେ ପାନବରଜ ଭାଡ଼ି ଭାଙ୍ଗିଯିବ। ପାନ ଲତା ଛିଡିବା ସହ ଚାଷରେ ବିଶେଷ କ୍ଷତି ପହଞ୍ଚାଇବ ବୋଲି ଚାଷୀମାନେ କହିଛନ୍ତି।
