ଲେଫ୍ରିପଡ଼ା,୧୨।୯(ଡି.ଏନ୍.ଏ.): ସୁନ୍ଦରଗଡ଼ ଜିଲା ଲେଫ୍ରିପଡା ବ୍ଲକ ଅଞ୍ଚଳରେ ହତାଶରେ ଧାନ ଚାଷୀ ରହିଥିବା ଦେଖିବାକୁ ମିଳିଛି। ଚାଷୀଙ୍କ ଅଭିଯୋଗ ଅନୁଯାୟୀ ଚଳିତ ଖରିଫ ଚାଷ ଆରମ୍ଭରେ ଖରଡ଼ି ଧାନ ବୁଣା ସାଙ୍ଗକୁ ରୁଆ ପାଇଁ ତଳି ପକାଇଥିଲେ। କିନ୍ତୁ ଜୁଲାଇ ଏବଂ ଅଗଷ୍ଟରେ ନିୟଣ୍ଟିଆ ବର୍ଷା ଯୋଗୁ ଚାଷ ପ୍ରଭାବିତ ହୋଇଛି। ଧାନରୁଆ ଏବଂ ବିହୁଡା କାର୍ଯ୍ୟ ଜୁଲାଇ ଏବଂ ଅଗଷ୍ଟରେ କରାଯାଉଥିବାବେଳେ ପାଣି ଅଭାବରୁ ଚାଷୀ ଚାଷ କାର୍ଯ୍ୟ କରି ପାରିନାହିଁ। ଅଗଷ୍ଟ ଶେଷ ଆଡ଼କୁ କିଛି ବର୍ଷା ହେବାରୁ ଚାଷୀଙ୍କ ମନରେ ଆଶା ଭରସା ସୃଷ୍ଟି ହୋଇଥିଲା। ପରବର୍ତ୍ତୀ ସମୟରେ ଚାଷୀମାନେ ବୁଣା ଧାନରେ ବିହୁଡା ଏବଂ ଘାସ ଦମନ ସକାଶେ ବିଭିନ୍ନ ପ୍ରକାର ଔଷଧ ସିଞ୍ଚନ କରିଥିଲେ। ଠିକ ସେହିପରି ଭାବେ ରୁଆ ଧାନରେ ମଧ୍ୟ ବିଳମ୍ବରେ ତଳି ରୋପଣ କରିଥିଲେ। କିନ୍ତୁ ବିଡମ୍ବନାର ବିଷୟ ବର୍ଷା ଅଭାବରୁ ବିଲରେ ଘାସ ବଡ଼ବଡ଼ ହୋଇଯିବାରୁ ବୁଣା ଧାନରେ ଘାସମରା ସିଞ୍ଚନ ଦ୍ୱାରା ମଧ୍ୟ ଘାସ ନିୟନ୍ତ୍ରଣ ହୋଇପାରୁ ନାହିଁ ବୋଲି କହିଛନ୍ତି। ରୁଆ ଧାନରେ ମଧ୍ୟ ସେହିପରି ପାଣି ଅଭାବରୁ ଘାସ ହୋଇ ପ୍ରଭାବିତ ହୋଇଛି। ଘାସ ନିୟନ୍ତ୍ରଣ ଦିଗରେ ମୂଲିଆ ଏକ ମାତ୍ର ବିକଳ୍ପ ହେଉଥିବାବେଳେ ମୂଲିଆ ଦ୍ୱାରା ଘାସ ନିୟନ୍ତ୍ରଣ ଆୟ ଅପେକ୍ଷା ବ୍ୟୟ ଦ୍ବିଗୁଣିତ ହେବାକୁ ନେଇ ହତାଶରେ ପଡ଼ିଥିବା ଚାଷୀମାନେ ଅଭିଯୋଗ କରିଛନ୍ତି। ଏଥିମଧ୍ୟରେ ସରପଗଡ଼ ଜଳସେଚନ ପ୍ରକଳ୍ପ ଗିରିଙ୍ଗକେଲା ପଞ୍ଚାୟତରେ ଜଳସେଚିତ ଭାବେ ରହିଥିବାବେଳେ ଜୁଲାଇ ଏବଂ ଅଗଷ୍ଟରେ ଡ୍ୟାମରେ ପାଣି ଅଭାବରୁ ଚାଷ କାର୍ଯ୍ୟ ସମ୍ପୂର୍ଣ୍ଣ ଭାବେ ବନ୍ଦ ହୋଇ ରହିଥିଲା। ଫଳରେ ଚାଷ କାର୍ଯ୍ୟର ଉପଯୁକ୍ତ ସମୟରେ ଚାଷ ହୋଇପାରି ନ ଥିବାରୁ ଚାଷୀଙ୍କ ଚାଷ ଅମଳ ହେବା ନେଇ ଆଶଙ୍କାରେ ଚାଷୀ ରହିଛନ୍ତି। ଅନେକ ଚାଷ ଜମିରେ ପାଣି ଅଭାବରୁ ଚାଷ ହୋଇନାହିଁ। ଅନ୍ୟ ପକ୍ଷରେ ଲେଫ୍ରିପଡ଼ା ବ୍ଲକର କୃଷିବିଭାଗର ସୂଚନା ଅନୁଯାୟୀ ଚଳିତ ଖରିଫ ଚାଷରେ ୧୬,୧୭୪ ହେକ୍ଟର ଜମିରେ ଚାଷ ହେବା ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିବା ବେଳେ ଏଥିରେ ୧୦,୨୬୩ହେକ୍ଟର ଜମିରେ ଧାନ ଏବଂ ୫୯୧୧ହେକ୍ଟର ଜମିରେ ଅଣଧାନ ଚାଷ ଏବଂ ଜଳସେଚିତ ଜମିରେ ୮୦୭୩ହେକ୍ଟର ଚାଷ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଅନେକ ଅଞ୍ଚଳରେ ପ୍ରାୟ କିଛି କିଛି ବର୍ଷା ଲାଗି ରହିଥିବାବେଳେ ପ୍ରାୟତଃ ଗିରିଙ୍ଗକେଲା, ଲେଫ୍ରିପଡା, କୁଲାବିରା, ରାଜବାହାଲ, ସରପଗଡ଼, ମଶାବିରା, ଗୁଣ୍ଡିଆଡ଼ିହି, ଅଲାପକା, ହୁର୍ମେଇ ଇତ୍ୟାଦି ପଞ୍ଚାୟତରେ ଚଳିତବର୍ଷ ବହୁ କମ ବର୍ଷା ହୋଇଛି। ବର୍ତ୍ତମାନ ମଧ୍ୟ ବର୍ଷା ନ ହେବାରୁ ଅନେକ ଧାନ ବିଲରେ ଜମି ଫାଟି ଯାଉଥିବାବେଳେ ଅନେକ ଧାନ ବିଲ ହଳଦିଆ ପଡ଼ିଲାଣି। ତେଣୁ ଆଗାମୀ ଦିନରେ ଚାଷୀମାନେ ଧାନ ଚାଷରେ ବ୍ୟାପକ ମାତ୍ରାରେ କ୍ଷତି ହେବା ନେଇ ଆଶଙ୍କା ପ୍ରକଟ କରିଛନ୍ତି।
