ବଲାଙ୍ଗୀର,୨୪ା୪(ସୁନିଲ କୁମାର ମହାନ୍ତି): ଶୁକ୍ରବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ବଲାଙ୍ଗୀର ଗସ୍ତ ପୂର୍ବରୁ ଜିଲାର ଏକାଧିକ ଚାଷୀନେତା ଓ ରାଜନେତାଙ୍କୁ ଆଗୁଆ ଗିରଫ କରାଯାଇଛି। ବଲାଙ୍ଗୀର ଜିଲା ମିଳିବ କୃଷକ ମଞ୍ଚ ଆବାହକ ଆକାଶ ମିଶ୍ରଙ୍କୁ ଗୁରୁବାର ବିଳମ୍ବିତ ରାତିରେ ତାଙ୍କ ଘରୁ ପୋଲିସ ଉଠାଇ ଆଣିଛି। ତାଙ୍କୁ ପୁଇଁନ୍ତଳା ଥାନାରେ ରଖାଯାଇଛି। ତେବେ ଏଭଳି ଗିରଫଦାରୀ ପ୍ରତିବାଦରେ ପୁଇଁନ୍ତଳା ଥାନା ଭିତରେ ଆକାଶ ମିଶ୍ର ଅନଶନରେ ବସିଥିଲେ। ଅନ୍ୟପଟେ ମିଳିତ କୃଷକ ମଞ୍ଚ ପକ୍ଷରୁ ସ୍ଥାନୀୟ ସାମ୍ବାଦିକ ଭବନଠାରେ ଜରୁରୀକାଳିନ ଖବରଦାତା ସମ୍ମିଳନୀ ଡକାଯାଇ ଆକାଶ ମିଶ୍ରଙ୍କ ଗିରଫଦାରୀକୁ ନିନ୍ଦା କରିବା ସହ ତାଙ୍କୁ ତୁରନ୍ତ ଖଲାସ କରିବାକୁ ଦାବି କରିଥିଲେ। ଚାଷୀନେତା ଚଗଲା ପରିଚ୍ଛା, ବିଭୂଦତ୍ତ ମିଶ୍ର, ମଧୁସୂଦନ କ୍ଷେତୀ ଖବରଦାତା ସମ୍ମିଳନୀରେ ପୋଲିସ ଓ ସରକାରକୁ କଡ଼ା ସମାଲୋଚନା କରିଥିଲେ। ମୁଖ୍ୟମନ୍ତ୍ରୀ ବଲାଙ୍ଗୀର ଆସିଲା ବେଳେ ଚାଷୀନେତାଙ୍କୁ ଗିରଫ କରିବା ହାସ୍ୟାସ୍ପଦ କଥା ବୋଲି କହିଛନ୍ତି।
ଏହି ଅବସରରେ ଜିଲାର ସମସ୍ତ ଚାଷୀଙ୍କ ରହିଥିବା ସମସ୍ତ ଧାନ କିଣିବା, ଚିନିକଳ କାର୍ଯ୍ୟକ୍ଷମ କରିବା, ଲୋୟର ସୁକତେଲ ପ୍ରକଳ୍ପ ଶୀଘ୍ର କାର୍ଯ୍ୟକ୍ଷମ କରିବାକୁ ଦାବି କରିଥିଲେ। ଆକାଶ ମିଶ୍ରଙ୍କୁ ତୁରନ୍ତ ଖଲାସ ନକଲେ ଆଗାମୀ ଦିନରେ ବଡ଼ଧରଣର ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ବଲାଙ୍ଗୀର ଗସ୍ତ ପୂର୍ବରୁ ୧୦ରୁ ଊର୍ଦ୍ଧ୍ୱ ଚାଷୀନେତା, ବିଜେଡି ଓ କଂଗ୍ରେସ ନେତାଙ୍କୁ ଗିରଫ କରାଯାଇଥିବା ଜଣାପଡ଼ିଛି। ଅନ୍ୟପଟେ ଆକାଶ ମିଶ୍ରଙ୍କ ଗିରଫ ପ୍ରତିବାଦରେ ଶତାଧିକ ଚାଷୀ ଥାନାରେ ପହଞ୍ଚିଥିଲେ। ପରେ ଆକାଶଙ୍କୁ ଲୋଇସିଂହା ଥାନାକୁ ଆଣି ପୋଲିସ ଛାଡ଼ିଥିଲା। ଶତାଧିକ ଚାଷୀ ଓ ଗ୍ରାମବାସୀ ଲୋଇସିଂହା ଥାନାରୁ ଏକ ଶୋଭାଯାତ୍ରା କରି ଆକାଶଙ୍କୁ ଘରକୁ ନେଇଥିବା ଜଣାପଡ଼ିଛି।