ବରଗଡ଼,୨୭ା୬(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ରବି ଧାନ ସଂଗ୍ରହ ପ୍ରକ୍ରିୟା ଶେଷ ପର୍ଯ୍ୟାୟରେ ପହଞ୍ଚିଛି। ହେଲେ ଜିଲାର ଅନେକ ଚାଷୀଙ୍କୁ ଏପର୍ଯ୍ୟନ୍ତ ଧାନବିକ୍ରି ଟୋକନ ମିଳିନାହିଁ। ଏହାକୁ ନେଇ ଜିଲାରେ ଚାଷୀ ଅସନ୍ତୋଷ ତୀବ୍ର ହେବାରେ ଲାଗିଛି।
ଶନିବାର ବରଗଡ଼ ଡିଆର୍ସିଏସଙ୍କ କାର୍ଯ୍ୟାଳୟରେ ଚାଲିଥିବା ଧାରଣାରେ ଜଣେ ଚାଷୀ ଭଟଲି ବ୍ଲକ ଅନ୍ତର୍ଗତ ବାଞ୍ଜିପାଲି ଗ୍ରାମର ଯୁବଚାଷୀ କନ୍ଦର୍ପ ବାରିକ ବିଷ ବୋତଲ ଦେଖାଇବା ଏବଂ ଟୋକନ ନ ମିଳିଲେ ତାହା ସେଠାରେ ପିଇଦେବା ପାଇଁ କହିବା ଘଟଣା ଚାଞ୍ଚଲ୍ୟ ଖେଳାଇ ଦେଇଛି। ତେବେ ସେ ଧାରଣାରେ ଉପସ୍ଥିତ ସଂଯୁକ୍ତ କୃଷକ ସଂଗଠନର ଉପଦେଷ୍ଟା ରମେଶ ମହାପାତ୍ର ସେହି ବିଷ ବୋତଲକୁ ଛଡ଼ାଇ ନେଇ ପୋଲିସକୁ ଦେଇଥିଲେ। ପାକ୍ସ ସମ୍ପାଦକ, ଡିଆରସିଏସ୍ଙ୍କଠାରୁ ଆରମ୍ଭ କରି ଜିଲାପାଳ ଏବଂ ଭଟଲି ବିଧାୟକଙ୍କୁ ବାରମ୍ବାର ଜଣାଇବା ସତ୍ତ୍ୱେ ସେ ଚାଷ କରିଥିବା ଜମି ଅନୁଯାୟୀ ତାଙ୍କୁ ଧାନ ବିକ୍ରି ଟୋକନ ମିଳିପାରିନାହିଁ ଏବଂ ସେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି ବୋଲି କନ୍ଦର୍ପ କହିଛନ୍ତି।