ହରିୟାଣାରେ ଏକ ଅଜବ ଘଟଣା ଘଟିଛି। ପୋଲିସ ଏକ ଏମିତି ଚୋରକୁ ଧରିଛି ଯେ କି ନିଜ ୧୬ ଜଣ ଗର୍ଲଫ୍ରେଣ୍ଡଙ୍କ ପାଇଁ ମହଙ୍ଗା ଗାଡି ଚୋରି କରୁଥିଲେ। ରବିନ ନାମକ ଏହି ଚୋର ହିସାରର ବାସିନ୍ଦା ବୋଲି ଜଣାପଡିଛି। ଦେଶର ବିଭିନ୍ନ ରାଜ୍ୟରୁ ୫୦ରୁ ଅଧିକ ଦାମୀ କାର ଚୋରି କରିଥିଲେ। ତାଙ୍କୁ ଫରିଦାବାଦରେ କ୍ରାଇମବ୍ରାଞ୍ଚ ଗିରଫ କରିଥିଲା। ସୂଚନାନୁସାରେ, ଅଭିଯୁକ୍ତ ରବିନ ମଧ୍ୟ ତାଙ୍କ ଚୋରି କରିବା ଶୈଳୀ ପରିବର୍ତ୍ତନ କରି ପୋଲିସକୁ ଅନେକ ଥର ହରଡହଣାରେ ପକାଇଥିଲା। ଧରାପଡ଼ିବା ପରେ ସେ ନିଜ ଠିକଣାକୁ ମଧ୍ୟ ଅଲଗା ଭାବରେ କହିଥିଲେ। ପୋଲିସର ସୂଚନାନୁସାରେ, ସେ ହିସାରରେ ଅନେକ ଦାମୀ କାର ମଧ୍ୟ ଚୋରି କରିଥିଲେ। ହିସାରରେ ତାଙ୍କର ପ୍ରାୟ ୧୫ରୁ ୨୦ଟି ଭିନ୍ନ ଠିକଣା ପୋଲିସ ପାଖରେ ହସ୍ତଗତ ହୋଇଛି। ରବିନ ଆଉ ହିସାରରେ ରହୁ ନାହାନ୍ତି। ସେ ବାହାର ରାଜ୍ୟରେ ରହୁଛନ୍ତି। ସେ ହିସାର ବ୍ୟତୀତ ଏନସିଆର ସମେତ ଦେଶର ଅନ୍ୟ ରାଜ୍ୟରୁ ବିଳାସପୂର୍ଣ୍ଣ ଗାଡି ଚୋରି କରୁଥିଲେ। ପୋଲିସ ଦାବି କରିଛି ଯେ ଅଭିଯୁକ୍ତର ୧୬ ଜଣ ଗର୍ଲଫ୍ରେଣ୍ଡ ଅଛନ୍ତି। ସେ ନିଜର ଏବଂ ଗର୍ଲଫ୍ରେଣ୍ଡଙ୍କ ଇଚ୍ଛା ପୂରଣ କରିବା ପାଇଁ କାର ଚୋରି କରୁଥିଲେ। ଅଭିଯୁକ୍ତଙ୍କୁ ପ୍ରାୟ ଏକ ବର୍ଷ ପୂର୍ବେ ଦିଲ୍ଲୀ ପୋଲିସ ଗିରଫ କରିଥିଲା। ନିକଟରେ ସେ ଜେଲରୁ ବାହାରି ପୁଣି କାର ଚୋରି କରିବା ଆରମ୍ଭ କରିଥିଲେ। ଅଗଷ୍ଟ ୩୧ରେ ସେକ୍ଟର-୨୮ ଫରିଦାବାଦରେ ଘର ବାହାରେ ପାର୍କିଂ ହୋଇଥିବା ଏକ ଫର୍ଚୁନର କାର ଚୋରି କରିଥିଲେ।
