ଫୁଲବାଣୀ ଅଫିସ, ୨୭।୧୧: କନ୍ଧମାଳ ଜିଲା ଫିରିଙ୍ଗିଆ ବ୍ଲକ ମିଲୁପଡ଼ା ଗ୍ରାମର ଯୋଡ଼ାମୁଣ୍ଡ ଶିଶୁ ଜଗା, କାଳିଆଙ୍କ ମଧ୍ୟରୁ କାଳିଆ ବୁଧବାର କଟକ ଶ୍ରୀରାମ ଚନ୍ଦ୍ର ଭଞ୍ଜ (ଏସ୍ସିବି) ମେଡିକାଲ ଓ କଲେଜରେ ଚିକିତ୍ସାଧୀନ ଅବସ୍ଥାରେ ଆଖି ବୁଜିଥିଲା। ଗୁରୁବାର ମୃତଦେହ ଆସି ପହଞ୍ଚିବା ପରେ ଗାଁ ଶ୍ମଶାନରେ ଅନ୍ତିମ ସଂସ୍କାର କରାଯାଇଛି। ଅନ୍ୟପକ୍ଷରେ କଟକରେ ଏକାକୀ ରହିଥିବା ଜଗା କାହାକୁ କିଛି କହି ନ ପାରି ଭାଇକୁ ଝୁରି ହେଉଛି । ଏହି ଘଟଣାକୁ ନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
ଗୁରୁବାର ସକାଳେ ମିଲୁପଡ଼ାରେ କାଳିଆର ମୃତଦେହ ପହଞ୍ଚିଥିଲା । ଗ୍ରାମବାସୀ ଏକାଠି ହୋଇ ତା’ର ଅନ୍ତିମ ସଂସ୍କାର ପାଇଁ ଯୋଗାଡ଼ କରିଥିଲେ ା ଫିରିଙ୍ଗିିଆ ବିଡିଓଙ୍କ ଦାୟିତ୍ୱରେ ଥିବା ଶାନ୍ତନୁ ନାୟକ ପହଞ୍ଚି କାଳିଆଙ୍କ ପରିବାରକୁ ରେଡକ୍ରସ ତରଫରୁ ୧୦ ହଜାର ଟଙ୍କା ଓ ହରିଶ୍ଚନ୍ଦ୍ର ଯୋଜନାରେ ୨ ହଜାର ଟଙ୍କା ପ୍ରଦାନ କରିଥିଲେ। ପରେ ପରମ୍ପରା ଅନୁସାରେ ଗାଁ ଶ୍ମଶାନରେ ମୃତଦେହ ସତ୍କାର କରାଯାଇଥିଲା । କାଳିଆଙ୍କ ମା’ ପୁଷ୍ପାଞ୍ଜଳି କହଁର ଓ ବାପା ଭୂୟାଁ କହଁରଙ୍କ ଆଖିରୁ ଲୁହ ଶୁଖୁ ନ ଥିଲା। ସେପଟେ ଜଗା ଏକୁଟିଆ ଥିବାରୁ ତାକୁ ମଧ୍ୟ ଝୁରି ହେଉଥିଲେ। ରୀତି ଅନୁସାରେ କାଳିଆର ସମସ୍ତ କର୍ମ ସରିବା ପରେ ସେମାନେ ଜଗା ପାଖକୁ ଯିବେ। ଏଥିପାଇଁ କିଛିଦିନ ସେମାନଙ୍କୁ ଗାଁରେ ରହିବାକୁ ହେବ। କାଳିଆଙ୍କ ମୃତ୍ୟୁକୁ ନେଇ ତାଙ୍କ ମା’ ଭାଙ୍ଗି ପଡିଥିଲେ ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାଧୁବାଦ ଜଣାଇଛନ୍ତି। ନିଜ ଯୋଡ଼ାମୁଣ୍ଡ ପିଲାଙ୍କୁ ଅଲଗା କରିବା ପାଇଁ ସେ ନେଇଥିବା ପଦକ୍ଷେପକୁ ପ୍ରଶଂସା କରିଛନ୍ତି। ଜଗା କିପରି ସମ୍ପୂର୍ଣ୍ଣ ଭଲ ହୋଇ ଫେରିବ ସେ ନେଇ ଚିନ୍ତିତ ଥିବା କହିଛନ୍ତି।
ସୂଚନାଯୋଗ୍ୟ, ଯୋଡ଼ାମୁଣ୍ଡ ଶିଶୁ ଜଗା, କାଳିଆଙ୍କୁ ୩ ବର୍ଷ ପୂର୍ବେ ଦିଲ୍ଲୀ ଏମ୍ସରେ ଅସ୍ତ୍ରୋପଚାର କରାଯାଇ ଅଲଗା କରାଯାଇଥିଲା। ଗତବର୍ଷ ସେମାନେ ଏମ୍ସରୁ ଡିସଚାର୍ଜ ହୋଇଥିଲେ। ଓଡ଼ିଶା ଫେରିବା ପରେ ଉଭୟଙ୍କୁ କଟକ ଏସ୍ସିବି ମେଡିକାଲ ଓ କଲେଜରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଜଗା ସ୍ବାସ୍ଥ୍ୟରେ ସୁଧାର ଆସିଥିବା ବେଳେ କାଳିଆ ସ୍ବାସ୍ଥ୍ୟାବସ୍ଥା ଠିକ୍ ରହୁ ନ ଥିଲା । ତେଣୁ ତାକୁ ଅନେକ ସମୟରେ ଭେଣ୍ଟିଲେଟରରେ ରଖାଯାଇ ଚିକିତ୍ସା କରାଯାଉଥିଲା । ଗତ ଦୁଇ ଦିନ ହେବ ତାର ହାତ ଗୋଡ଼ ଫୁଲିଯିବା ସହ ନିଃଶ୍ୱାସ ନେବାରେ ଅସୁବିଧା ହେଉଥିଲା ।ବୁଧବାର ରାତିରେ ଚିକିତ୍ସିତ ଅବସ୍ଥାରେ କାଳିଆ ଆଖି ବୁଜିଥିଲା ।
