ଥୁଆମୁଳ ରାମପୁର,୪।୪(ଦୁର୍ଗା କୀର୍ତ୍ତି): ଦୁର୍ଘଟଣାରେ ମୃତ୍ୟୁ ଘଟିବା ପରେ କ୍ଷତିପୂରଣ ଦାବିରେ ଥୁଆମୂଳ ରାମପୁର ଥାନା ଘେରିବା ସହ ରାସ୍ତା ଅବରୋଧ କରିଛନ୍ତି ପରିବାରଲୋକେ। ଶୁକ୍ରବାର ଅପରାହ୍ନ ୧ଟାରୁ ସା ୮ଟା ଯାଏ ଦୀର୍ଘ ୭ ରୁ ୮ ଘଣ୍ଟା ପର୍ଯ୍ୟନ୍ତ ଥାନା ଘେରାଉ କରାଯାଇଛି । ଫଳରେ ଥୁଆ ମୂଳ ରାମପୁର – ଭବାନିପାଟଣା – କଲମପୁର – କାଶିପୁରକୁ ଗାଡିମୋଟର ଯାତାୟାତ ଠପ୍ ସହ ଅନେକ ପଥଚାରୀ ନାହିଁ ନ ଥିବା ଅସୁବିଧାର ସମ୍ମୁଖିନ ହେଉଥିବା ଜଣାପଡିଛି ।
ସୂଚନାନୁଯାୟୀ, କଳାହାଣ୍ଡି ଜିଲା ଥୁଆମୁଳ ରାମପୁର ଥାନା ଅନ୍ତର୍ଗତ ଦାବିରିଗୁଡା ଗ୍ରାମର ମଣ୍ଟୁ ନାଏକ (୨୩) ଏବଂ ଉମାଶଙ୍କର ନାଏକ (୨୫) ଦୁହେଁ ହିରୋ ଏଚ୍ଏଫ୍ ଡିଲକ୍ସ ଓଡି୦୮କେ ୬୧୮୦ ଓ ଡୁମେରପଦର ଗ୍ରାମର ଫିରୋଜ ନାଏକ ଏବଂ ଦୀପେନ୍ଦ୍ର ନାଏକ ଦୁହେଁ କେଟିଏମ ଗାଡି ନମ୍ବର ଓଡି୦୮ଏମ୧୩୯୭ ବିଶିଷ୍ଟ ବାଇକ ଚାଳକ ନିଜ ନିଜ ଘରକୁ ଯାଉଥିବା ବେଳେ ଗତ ରବିବାର ଦିନ ଲାଠିଆଗୁଡ଼ା ଛକ ନିକଟରେ ଦୁର୍ଘଟଣା ହୋଇଥିଲା। ଏଥିରେ ଡୁମେରପଦର ଗ୍ରାମ ଫିରୋଜ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିବା ବେଳେ ଦୀପେନ୍ଦ୍ର ଗୁରୁତର ଆହତ ହୋଇ ବୁର୍ଲା ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ସେମାନଙ୍କ କ୍ଷତିପୂରଣ ଦାବିନେଇ ପରିବାର ଲୋକେ ଏବଂ ଡୁମେର ପଦର ଗ୍ରାମର ଶହ ଶହ ଲୋକ ଥୁଆମୁଳ ରାମପୁର ଥାନା ଘେରାଓକରି ରାସ୍ତା ଅବରୋଧ କରିଥିଲେ।ଘଟଣାର କୌଣସି ସମାଧାନ ନ ହେବାରୁ ଧାରଣା ଉଗ୍ରରୂପ ଧାରଣ କରିଥିଲା । ଏହାକୁ ନେଇ ଥୁଆମୂଳ ରାମପୁର ଥାନା ଅଧିକାରୀ କୈବଲ୍ୟ ସେଠ ଜିଲ୍ଲା ସ୍ତରୀୟ ଅଧିକାରୀଙ୍କୁ ଅବଗତ କରାଇବା ପରେ ଜିଲା ପ୍ରଶାସନର ନିର୍ଦ୍ଦେଶ କ୍ରମେ ସ୍ଥାନୀୟ ଅତିରିକ୍ତ ମଜିଷ୍ଟେଟ (ତହସିଲଦାର) ନିଜୋର୍ କୁମାର ଭତ୍ରା ଏବଂ ବିଡ଼ିଓ ଧ୍ରୁବ ଚରଣ ମୁଦୁଲି ଥାନାରେ ପହଞ୍ଚି ପରିବାରଲୋକଙ୍କୁ ବୁଝାସୁଝା କରୁଥିଲେ। ଠିକ ସେତିକି ସମୟରେ କୌଣସି ସମାଧାନ ନ ହୋଇ ଘଟଣାଟି ଉଗ୍ରରୂପ ନେଇଥିଲା ଏବଂ ପ୍ରତିବାଦକାରୀମାନେ ଥାନା ଉପରକୁ ପଥର ମାଡ଼ କରିଥିଲେ। ଫଳରେ ଜଣେ ଏସ୍ଆଇ ଏବଂ ଜଣେ କନେଷ୍ଟବଳଙ୍କ ଦେହରେ ପଥର ବାଜିଥିବାବେଳେ ଥାନା ମୁଖ୍ୟ ଫାଟକ ଏବଂ ଥାନାର ଝରକାରେ ପଥର ବାଜିଥିବା ଦେଖାଯାଇଛି। ଏଥିରୁ ଅନ୍ୟାନ୍ୟ ପୋଲିସ ଅଧିକାରୀ ଅଳ୍ପକେ ବର୍ତ୍ତିଯାଇଛନ୍ତି । ଅନ୍ୟପଟେ ପଥର ମାଡ଼କାରୀମାନଙ୍କୁ ପୋଲିସ ଘଉଡ଼ାଇ ଥିବା ସୂଚନା ମିଳିଛି ।
