ବାଲେଶ୍ୱର,୨୩|୯(ମାନସ ବିଶ୍ୱାଳ): ବାଲେଶ୍ୱର ଫକୀରମୋହନ ବିଶ୍ୱବିଦ୍ୟାଳୟକୁ ଜାତୀୟ ମୂଲ୍ୟାୟନ ଓ ଅଧିସ୍ୱୀକୃତି ପରିଷଦ (ନାକ୍) ‘ଏ’ ଗ୍ରେଡ ମାନ୍ୟତା ମିଳିଛି। ସିଜିପିଏରେ ଫକୀରମୋହନ ଓଡ଼ିଶାର ଅନ୍ୟ ସମସ୍ତ ସରକାରୀ ବିଶ୍ୱବିଦ୍ୟାଳୟକୁ ପଛରେ ପକାଇଛି। ଫକୀରମୋହନ ବିଶ୍ୱବିଦ୍ୟାଳୟକୁ ୩.୧୮ ସିଜିପିଏ ମିଳିଥିବା ବେଳେ ଉତ୍କଳ ବିଶ୍ୱବିଦ୍ୟାଳୟକୁ ୩.୧୬ ଓ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟକୁ ୩.୧ ସିଜିପିଏ ମିଳିଛି। ପୂର୍ବରୁ ବ୍ରହ୍ମପୁର ବିଶ୍ୱବିଦ୍ୟାଳୟକୁ ‘ବି’ ଗ୍ରେଡ ନାକ ମାନ୍ୟତା ମିଳିଛି।
ଗତ ୧୨ ତାରିଖରେ ନାକ ଟିମ ଫକୀରମୋହନ ବିଶ୍ୱବିଦ୍ୟାଳୟକୁ ଆସିଥିଲେ। ଗସ୍ତ ପରେ ଟିମ ଗୁଣାତ୍ମକ ଶିକ୍ଷାଦାନ ପ୍ରଣାଳୀ ଓ ବିଶ୍ୱବିଦ୍ୟାଳୟରେ ଶୈକ୍ଷିକ ପରିବେଶରେ ଉନ୍ନତି ଆଣିପାରିଥିବାରୁ ବାଲେଶ୍ୱର ଫକୀରମୋହନ ବିଶ୍ୱବିଦ୍ୟାଳୟକୁ ନାକ ‘ଏ’ ଗ୍ରେଡ ମାନ୍ୟତା ପ୍ରଦାନ କରିଛି।
ତେବେ ତିନିଦିନ ଧରି ହୋଇଥିବା ମୂଲ୍ୟାୟନ ଓ ଅଧିସ୍ୱୀକୃତି ପ୍ରକ୍ରିୟାରେ ଭାରତର ବିଭିନ୍ନ ବିଶ୍ୱବିଦ୍ୟାଳୟରୁ ୬ ଜଣ ପ୍ରାଧ୍ୟାପକ ଯୋଗ ଦେଇଥିଲେ। ପ୍ରଫେସର ବି.ପି ସଞ୍ଜୟଙ୍କ ଅଧ୍ୟକ୍ଷତାରେ ପ୍ରଫେସର ମହମ୍ମଦ ତାରିକ, ପ୍ରଫେସର କୃଷ୍ଣକୁମାର ରଙ୍ଗାରଜୁଲୁ, ପ୍ରଫେସର ଅର୍ଦ୍ଧେନ୍ଦୁ ଶେଖର ପାତ୍ର, ପ୍ରଫେସର ଭବେଶ ଚନ୍ଦ୍ର ଗୋସ୍ୱାମୀ, ପ୍ରଫେସର ରେଣୁ ଯାଟନା ପ୍ରମୁଖ ତଦାରଖ କରିଥଲେ।
