ପୁରୀ,୬ା୮(ଅଜିତ କୁମାର ମହାନ୍ତି): ଶ୍ରୀମନ୍ଦିର ପ୍ରଶାସନ ନାଁରେ ଏକ ନକଲି ନିଯୁକ୍ତିପତ୍ର ସୋସିଆଲ ମିଡିଆରେ ଭାଇରାଲ ହେଉଛି। ଉକ୍ତ ଚିଠିରେ ଉଲ୍ଲେଖ ରହିଛି ଯେ, ପୁରୀ ଜିଲାର ବ୍ୟକ୍ତିଙ୍କୁ ‘ଜଗନ୍ନାଥ ମନ୍ଦିର ସ୍କ୍ବାଡ୍୍’ରେ ନିଯୁକ୍ତି ଦିଆଯିବ। ଏହି ପତ୍ରରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀଙ୍କ ନାଁ ଏବଂ ଦସ୍ତଖତ ମଧ୍ୟ ଦିଆଯାଇଛି। କିନ୍ତୁ ତାରିଖ ଓ ଭାଷାରେ ବହୁ ତ୍ରୁଟି ରହିଛି, ଯାହାକୁ ନେଇ ସନ୍ଦେହ ସୃଷ୍ଟି ହୋଇଛି। ଘଟଣାର ତଦନ୍ତ ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୁରକ୍ଷା ଅଧିକାରୀଙ୍କୁ ଦାୟିତ୍ୱ ଦିଆଯାଇଛି। ବୁଧବାର ସୁରକ୍ଷା ଅଧିକାରୀ ଏ ସଂକ୍ରାନ୍ତରେ ଥାନାରେ ଏତଲା ଦେଇଛନ୍ତି। ତେବେ ଲେଟର ଭାଇରାଲ ହେବା ପରେ ନିଯୁକ୍ତି ସମ୍ପର୍କିତ କେଳେଙ୍କାରୀ ସାମ୍ନାକୁ ଆସିଛି। ଟଙ୍କା ନେଇ ନିରୀହ ଯୁବତୀଯୁବକଙ୍କୁ ଏଭଳି ଠକେଇ କରାଯାଉଥିବା ଅଭିଯୋଗ ହୋଇଛି। ଏହା ପଛର ମାଷ୍ଟରମାଇଣ୍ଡଙ୍କୁ ଧରିବା ପାଇଁ ଖୋଳତାଡ଼ ଆରମ୍ଭ ହୋଇଛି।
ସୂଚନା ଅନୁଯାୟୀ, ଉକ୍ତ ଚିଠି ୩୧.୭.୨୦୨୬ରେ ଜାରି ହୋଇଛି। ପୁରୀର ସ୍ବସ୍ତି ପ୍ରୀତମ ପାଇକରାୟଙ୍କୁ ଶ୍ରୀମନ୍ଦିର ସ୍କ୍ବାଡ୍ରେ ନିଯୁକ୍ତି ନେଇ ଚିଠି କରାଯାଇଛି, ଯାହାକି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ତେବେ ଏହି ଖବର ଜାଣିବା ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ଏକ ପ୍ରେସ୍ ବିଜ୍ଞପ୍ତିରେ କହିଛନ୍ତି, ଘଟଣାର ତଦନ୍ତ ପାଇଁ ଶ୍ରୀମନ୍ଦିର ସୁରକ୍ଷା ପ୍ରଶାସକଙ୍କୁ ନିର୍ଦ୍ଦେଶ
ଶ୍ରୀମନ୍ଦିର ପ୍ରଶାସନ…
ଦିଆଯାଇଛି। ଏଥିସହ ଥାନାରେ ଏତଲା ଦେବାକୁ କୁହାଯାଇଛି। ସେହିପରି ଶ୍ରୀମନ୍ଦିର ସୁରକ୍ଷା ପ୍ରଶାସକ ହେମନ୍ତ କୁମାର ପାଢ଼ୀ କହିଛନ୍ତି, ଜଗନ୍ନାଥ ମନ୍ଦିର ସ୍କ୍ବାଡ୍ ନାମରେ କେତେଜଣ ବ୍ୟକ୍ତିଙ୍କୁ ଶ୍ରୀମନ୍ଦିରରେ ନିଯୁକ୍ତି ଦିଆଯାଇଥିବା ସୋସିଆଲ ମିଡିଆରୁ ଜାଣିବାକୁ ମିଳିଥିଲା। ଏପରିକି ନିଯୁକ୍ତିପତ୍ରରେ ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀଙ୍କ ଦସ୍ତଖତ ରହିଛି, ଯାହାକୁ ଜାଲିଆତି କରାଯାଇଛି। ପ୍ରାୟ ୧୫ଜଣଙ୍କ ନାମରେ ଏଭଳି ଜାଲ୍ ନିଯୁକ୍ତିପତ୍ର କରାଯାଇଥିବା ଜଣାପଡ଼ିଛି। ଶ୍ରୀମନ୍ଦିର ପ୍ରଶାସନ ପକ୍ଷରୁ କୌଣସି ନିଯୁକ୍ତିପାଇଁ ଆବେଦନ ଦିଆଯାଇନାହିଁ। ଏହି ମିଥ୍ୟା ନିଯୁକ୍ତିପତ୍ର ପଛରେ ଅସାମାଜିକ ବ୍ୟକ୍ତିଙ୍କ ହାତ ରହିଥିବା ଅନୁମାନ କରାଯାଉଛି। ଟଙ୍କା ଲୁଟିବା ପାଇଁ ଏପରି କରାଯାଇଥାଇପାରେ। ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଯଦି ଶ୍ରୀମନ୍ଦିର ପ୍ରଶାସନରେ ନିଯୁକ୍ତି ନେଇ କୌଣସି ସାଇଟ୍ରେ ଖବର ପ୍ରକାଶ ପାଉଛି, ତେବେ ସେମାନେ ବିଶ୍ୱାସ ନ କରି ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟକୁ ଆସି ଅଧିକାରୀ ଓ କର୍ମଚାରୀଙ୍କଠାରୁ ବୁଝି ନିଶ୍ଚିନ୍ତ ହୁଅନ୍ତୁ। ବର୍ତ୍ତମାନ ଯେଉଁ ନିଯୁକ୍ତିପତ୍ର ଭାଇରାଲ ହେଉଛି ତାହା ସମ୍ପୂର୍ଣ୍ଣ ନକଲି। ଏ ନେଇ ଶ୍ରୀମନ୍ଦିର ପ୍ରଶାସନ ତରଫରୁ ଅଭିଯୋଗ ପରେ ପୋଲିସ ଘଟଣାର ତଦନ୍ତ କରୁଛି।
