ଆଖିକୁ ସୁନ୍ଦର କରିବା ପାଇଁ କେହି କାଜଲ ତ କିଏ ଆଇଲାଇନର, ମସ୍କରା ଆଉ ଆଇଶ୍ୟାଡୋ ଭଳି ବ୍ୟୁଟି ପ୍ରଡକ୍ଟ ବ୍ୟବହାର କରନ୍ତି । ଏମିତିକି କେହି କେହି ଆଖିକୁ ଆଟ୍ରାକ୍ଟିଭ୍ କରିବା ଲାଗି ଆର୍ଟିଫିସିଆଲ୍ ଆଇଲ୍ୟାସ୍ ଲଗାଇବାକୁ ବି ପଛାଉ ନାହାନ୍ତି। ହେଲେ ଏହି ୟୁଜ୍ ଆଣ୍ଡ୍ ଥ୍ରୋ ଆଇଲ୍ୟାସେସ୍ ଆଖିକୁ ସୁନ୍ଦର ତ କରୁଛି, ହେଲେ ଏହାର ଅଧିକ ବ୍ୟବହାର ଆଖି ପାଇଁ କ୍ଷତିକାରକ ସାଜୁଛି…
ଆଇଲ୍ୟାସେସ୍ ଆଖିକୁ ସୁନ୍ଦର ଏବଂ ଆକର୍ଷଣୀୟ କରିଥାଏ। ହେଲେ ଆପଣଙ୍କ ଆଖିପତା ବହୁତ ସୂକ୍ଷ୍ମ ଏବଂ କୋମଳ ହୋଇଥାଏ। ତେଣୁ ବାରମ୍ବାର ଏଭଳି ଆଇଲ୍ୟାସେସ୍ ଲଗାଇବା କ୍ଷତିକାରକ ହୋଇପାରେ। ଏହି ଆର୍ଟିଫିସିଆଲ୍ ପ୍ରଡକ୍ଟ କାହା କାହାଠାରେ ସଂକ୍ରମଣ ଭଳି ସମସ୍ୟା ଉପୁଜାଇଥାଏ, ଏମିତିକି ଏଥିପାଇଁ ଆଖିପତାର ବାଳ ମଧ୍ୟ ଝଡ଼ିଥାଏ।
ବଡ଼ ଆଇଲ୍ୟାସେସ୍ ବ୍ୟବହାର କରିବା ଯୋଗୁ ଆଖି ଚାରିପାଖେ ଇରିଟେଶନ୍ ଏବଂ ଇଚିଂ ପରି ସମସ୍ୟା ହୋଇଥାଏ। ଏଥିସହ ଆଇଲ୍ୟାସେସ୍ ଲଗେଇବା ସମୟରେ ବ୍ୟବହୃତ ହେଉଥିବା ଅଠାରେ କେତେକଙ୍କର ଆଲର୍ଜି ହୋଇ ଆଖିପତା କୁଣ୍ଡେଇ ହୋଇ ଲାଲ୍ ପଡ଼ିଯାଏ।
କେହି କେହି ଖର୍ଚ୍ଚ କମିବା ଉଦ୍ଦେଶ୍ୟରେ ଅନ୍ୟର ବ୍ୟବହୃତ ଆଇଲ୍ୟାସେସ୍କୁ ପୁଣି ବ୍ୟବହାର କରିଥା’ନ୍ତି। ହେଲେ ଏହାଦ୍ୱାରା ଇନ୍ଫେକ୍ସନ୍ର ଆଶଙ୍କା ବୃଦ୍ଧି ପାଇଥାଏ। ତେଣୁ କାହାର ଆଇଲ୍ୟାସେସ୍ ବ୍ୟବହାର କରନ୍ତୁ ନାହିଁ କିମ୍ବା ନିଜର ଆଉ କାହାକୁ ଦିଅନ୍ତୁ ନାହିଁ।
ଏହାକୁ ଲଗାଇବା ପାଇଁ ଗ୍ଲୁ ଆବଶ୍ୟକ ହୋଇଥାଏ। ହେଲେ ବାରମ୍ବାର ଏହି ଗ୍ଲୁ ଲାଗି ଆପଣଙ୍କ ପ୍ରାକୃତିକ ଆଖିବାଳ ବଢ଼ିବା ବନ୍ଦ ହୋଇଯାଏ ଏବଂ କୃତ୍ରିମ ଆଇଲ୍ୟାସ୍ସେର ଭାରରେ ସେଗୁଡ଼ିକ ଛିଡ଼ିଥାଏ ଏବଂ ଫଲିକଲ୍କୁ୍ କ୍ଷତି ପହଞ୍ଚାଇଥାଏ।
ଆଇଲ୍ୟାସେସ୍ଗୁଡ଼ିକୁ ସୁନ୍ଦର ଏବଂ ଆଖିପତାରେ ଦୀର୍ଘ ସମୟ ପାଇଁ ରହିବା ଲାଗି ଫାର୍ମଲଡିହାଇଡ୍ ଏବଂ ଲ୍ୟାଟେକ୍ସ ଭଳି ରାସାୟନିକ ମିଶାଯାଇଥାଏ, ଯଦ୍ଦ୍ବାରା ଆଖିଫୁଲିବା ସହ ଦୃଷ୍ଟିଶକ୍ତି ହ୍ରାସ ପାଏ।
ଏହାର ଅଧିକ ବ୍ୟବହାର ଯୋଗୁ ଆଖିରେ ଲୁବ୍ରିକେଶନ୍ର ମାତ୍ରା କମିଯାଏ ଏବଂ ଡ୍ରାଏ ଆଇଜ୍ ସମସ୍ୟା ଉପୁଜେ। ଶସ୍ତା ଏବଂ ଏକ୍ସପାୟର ହୋଇଥିବା ଆଇ କସ୍ମେଟିକ୍ ପ୍ରଡକ୍ଟ ଯୋଗୁ ଆଖି କୁଣ୍ଡେଇହେବା ସହ ଅସ୍ପଷ୍ଟ ଦେଖାଯିବା, ଡର୍ମାଟାଇଟିସ୍ ଏବଂ ଲାଇଟ୍ ସେନ୍ସିଟିଭିଟି ପରି ସମସ୍ୟା ଦେଖାଦିଏ।
