ନୟାଗଡ ଅଫିସ/ ରଣପୁର,୧।୫(ସ୍ବ.ପ୍ର.): ଋଣପୁର ଥାନା ଦର୍ପନାରାୟଣପୁର ଫାଣ୍ଡି ଅନ୍ତର୍ଗତ ଗୋଡ଼ିମଡ଼ାର କରୋନା ଆକ୍ରାନ୍ତ ଦମ୍ପତି ଭିକାରୀ ପାତ୍ର(୫୭) ଓ ଜ୍ୟୋତ୍ସ୍ନାରାଣୀ(୫୨) ଗୁରୁବାର ଆତ୍ମହତ୍ୟା କରିଛନ୍ତି। ସେମାନେ ଏଭଳି ଚରମ ନିଷ୍ପତ୍ତି ନେବା ପଛରେ ଚିଟ୍ଫଣ୍ଡ ଟଙ୍କା ପରିଶୋଧ ଚାପ ବୋଲି କୁହାଯାଉଛି।
ସୂଚନା ଅନୁସାରେ ଭିକାରୀ (ଗଗନ)ଙ୍କ ଗୋଟିଏ ପୁଅ ଏବଂ ଗୋଟିଏ ଝିଅକୁ ନେଇ ପରିବାର ହସଖୁସିରେ ଚାଲିଥିଲା। ଝିଅ, ପୁଅଙ୍କ ବିବାହ ମଧ୍ୟ ସରିଥିଲା। ପୁଅ ଏକ ଘରୋଇ ଅର୍ଥ ଲଗାଣକାରୀ ସଂସ୍ଥାରେ ଚାକିରି କରିଥିଲେ। ସଂସ୍ଥା ଦେବାଳିଆ ହେବା ପରେ ଭିକାରୀଙ୍କ ପରିବାର ପାଇଁ ଦୁଃଖର ଦିନ ଆସିଯାଇଥିଲା। କାରଣ ଭିକାରୀଙ୍କ ପୁଅ ପ୍ରାୟ ୧ କୋଟି ଟଙ୍କା ସ୍ଥାନୀୟ ଅଞ୍ଚଳରୁ ସଂଗ୍ରହ କରି ଘରୋଇ ଅର୍ଥ ଲଗାଣକାରୀ ସଂସ୍ଥାରେ ଜମା କରିଥିଲେ। ସଂସ୍ଥା ଉଭାନ ହୋଇଯାଇଥିବାବେଳେ ଜମାକାରୀ ଟଙ୍କା ଫେରାଇବା ପାଇଁ ଚାପ ପ୍ରୟୋଗ କରୁଥିଲେ। ଏଣୁ ଭିକାରୀଙ୍କ ପୁଅ, ବୋହୂ ଓ ନାତି ପୁରୀ ଚାଲି ଯାଇଥିଲେ। ସେଠାରେ ବ୍ୟବସାୟ କରି କିଛି କିଛି ଟଙ୍କା ପରିଶୋଧ କରୁଥିଲେ। କିନ୍ତୁ ଭିକାରୀଙ୍କ ପରିବାରକୁ ଗଁାରେ ବାସନ୍ଦ କରାଯାଇଥିଲା। କିଛିଦିନ ତଳେ ପୁଅର ଦେହ ଖରାପ ହେବାରୁ ତାଙ୍କୁ ଦେଖିବା ପାଇଁ ଭିକାରୀ ଓ ଜ୍ୟୋତ୍ସ୍ନାରାଣୀ ପୁରୀ ଯାଇଥିଲେ। ଟେଷ୍ଟିଂ ପରେ ପୁଅ କରୋନାରେ ଆକ୍ରାନ୍ତ ଥିବା ଜଣାପଡ଼ିଥିଲା। ଏହାପରେ ଭିକାରୀ ଓ ଜ୍ୟୋତ୍ସ୍ନାରାଣୀ ଗଁାକୁ ଫେରି ଆସିଥିଲେ ମଧ୍ୟ ଅସୁସ୍ଥ ହୋଇପଡ଼ିଥିଲେ। ଗତ ୨୭ ତାରିଖରେ ଶରଣକୁଳରେ ଟେଷ୍ଟ କରିବା ପରେ ସେମାନେ ମଧ୍ୟ କରୋନା ଆକ୍ରାନ୍ତ ଥିବା ଜଣାପଡିଥିଲା। ଅନ୍ୟପକ୍ଷେ ଚିଟ୍ଫଣ୍ଡ ଟଙ୍କା ପରିଶୋଧ ନେଇ ଗୁରୁବାର ରାତିରେ ଗଁାରେ ସଭା ହେବାର ଥିଲା। ଏଥିପାଇଁ ଭିକାରୀଙ୍କୁ ଡକାଯାଇଥିଲା। ଏପଟେ କରୋନା ଚିନ୍ତା ସେପଟେ ଚିଟ୍ଫଣ୍ଡ ଟଙ୍କା ପରିଶୋଧ ନେଇ ଭିକାରୀ ଓ ତାଙ୍କ ସ୍ତ୍ରୀ ଚିନ୍ତିତ ଥିଲେ। ଫଳରେ ସେମାନେ ଆତ୍ମହତ୍ୟା କରିଥିବା କେତେଜଣ ଲୋକ କହୁଛନ୍ତି। ଅନ୍ୟପକ୍ଷରେ ଭିକାରୀଙ୍କ ବଳଦ ଦିନ ସମୟରୁ ବାହାରେ ବୁଲୁଥିଲା। ଗୁରୁବାର ଦିନତମାମ ଘର ବନ୍ଦ ଥିବା ଜାଣି ଗ୍ରାମର କେତେଜଣ ଦାଣ୍ଡପଟେ ଦେଖିଥିଲେ ମଧ୍ୟ କିଛି ଜାଣିପାରି ନ ଥିଲେ। ରାତି ସାଢ଼େ ୯ଟାରେ କେତେଜଣ ବ୍ୟକ୍ତି ବାରିପଟେ ଯାଇ ଦେଖିବା ବେଳକୁ କବାଟ ଖୋଲା ରହିବା ସହ ଭିକାରୀ ଓ ଜ୍ୟୋତ୍ସ୍ନାରାଣୀଙ୍କ ମୃତଦେହ ଘର ଛାତରେ ଦଉଡ଼ିରେ ଝୁଲୁଥିଲା। ଏନେଇ ରଣପୁର ଥାନାରେ ଏକ ଅପମୃତ୍ୟୁ ମାମଲା (୭/୨୧) ରୁଜୁ ହୋଇଛି। ଶୁକ୍ରବାର ଦର୍ପନାରାୟଣପୁର ଫାଣ୍ଡି ପୋଲିସ ମୃତଦେହକୁ ଜବତ କରି ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଥିଲା। ହେଲେ ସେମାନେ କରୋନା ସଂକ୍ରମିତ ହୋଇଥିବାରୁ ମୃତଦେହ ସଂସ୍କାର ପାଇଁ ନୟାଗଡ଼ ମ୍ୟୁନିସିପାଲିଟିକୁ ହସ୍ତାନ୍ତର କରାଯାଇଥିଲା। ପରେ ମ୍ୟୁନିସିପାଲିଟି ପକ୍ଷରୁ ନୟାଗଡ଼ ଶ୍ମଶାନରେ ମୃତଦେହ ସତ୍କାର କରାଯାଇଥିବା ନିର୍ବାହୀ ଅଧିକାରୀ ସନ୍ତୋଷ ଜେନା କହିଛନ୍ତି। ଅନ୍ୟପକ୍ଷରେ ଦମ୍ପତିଙ୍କ ମୃତଦେହକୁ ଘରୁ ବାହାର କରିବା ପାଇଁ ଭିକାରୀଙ୍କ ଜ୍ୱାଇଁ ବ୍ୟତୀତ ପୋଲିସକୁ ଗଁା ଲୋକଙ୍କ ସହଯୋଗ ମିଳି ନ ଥିଲା।
ରଣପୁର ଥାନା ଆଇଆଇସି ଜ୍ୟୋତି ପ୍ରକାଶ ପଣ୍ଡା କୁହନ୍ତି, କରୋନା ଆକ୍ରାନ୍ତ ଦମ୍ପତି ଆତ୍ମହତ୍ୟା କରିଛନ୍ତି। ଟଙ୍କା ପରିଶୋଧ ଚିନ୍ତା ଓ ବାସନ୍ଦ ନେଇ ଅଭିଯୋଗ ମିଳିନାହିଁ। ଏନେଇ ତଦନ୍ତ ଜାରି ରହିଛି।
