କଟକ ସଦର,୧ା୫(ଡି.ଏନ୍.ଏ.): କିଶନନଗର ତହସିଲ ଅନ୍ତର୍ଗତ କେଶନଗର ମୌଜାରେ ଷ୍ଟାଡିୟମ ନିର୍ମାଣ ପାଇଁ କଟକ ଜିଲାପାଳ ୨୫ ଡିସିମିଲ ଜାଗା ଲିଜ୍ ଆକାରରେ ପ୍ରଦାନ କରିଛନ୍ତି। ମାତ୍ର ଏହି ଜାଗା ପାର୍ଶ୍ୱରେ ଥିବା ୨ ଏକରରୁ ଊର୍ଦ୍ଧ୍ୱ ଜମିକୁ ଖେଳିବା ପାଇଁ ଜବରଦଖଲ କରାଯାଇଥିବା ସ୍ଥାନୀୟ ତହସିଲଦାରଙ୍କ ନିକଟରେ ଶନିବାର ଅଭିଯୋଗ ହୋଇଛି। ଫଳରେ ଗୋରୁମାନେ ଚରିବା ପାଇଁ ସୁଯୋଗ ପାଉନାହାନ୍ତି। ଏହାକୁ ନେଇ ଗୋପାଳନକାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଅଭିଯୋଗ ଅନୁଯାୟୀ, କେଶନଗର ମୌଜାର ଚିନ୍ତାମଣି ବିଦ୍ୟାପୀଠ ସମ୍ମୁଖରେ ଖାତା ନଂ. ୪୦୨, ପ୍ଲଟ୍ ନଂ. ୩୯ରେ ୨ ଏକର ୨୩ ଡିସିମିଲ ଜାଗା ଥିଲା। ଷ୍ଟାଡିୟମ ନିର୍ମାଣ ପାଇଁ କଟକ ସଦର ବିଡିଓ ରାଜୀବ ଲୋଚନ ପରିଡ଼ା ୧୭ା୧୧ା୨୦୨୧ରେ ୨୫ ଡିସିମିଲ ଗୋଚର ଜମିର କିସମ ବଦଳାଇବା ନିମନ୍ତେ ସ୍ଥାନୀୟ ତହସିଲଦାରଙ୍କ ଜରିଆରେ କଟକ ଜିଲାପାଳ ଭବାନୀ ଶଙ୍କର ଚୟନୀଙ୍କ ନିକଟରେ ଆବେଦନ କରିଥିଲେ। ଇତିମଧ୍ୟରେ ଜିଲାପାଳ ଆବେଦନକୁ ବିଚାର କରି ଏତିକି ଜମିର କିସମ ବଦଳାଇ ଷ୍ଟାଡିୟମ ନିର୍ମାଣ ପାଇଁ ଅନୁମତି ଦେଇଛନ୍ତି। ଏହାପରେ ଉକ୍ତ ଜମିର ପାର୍ଶ୍ୱରେ ଥିବା ବାକି ୧ ଏକର ୯୮ ଡିସିମିଲ ଜମି ସହ ଅନ୍ୟ ପ୍ଲଟ୍ର ଜମିକୁ ସମ୍ପୂର୍ଣ୍ଣ ଆବଦ୍ଧ କରି ଦିଆଯାଇଛି। ସ୍ଥାନୀୟ ତହସିଲଦାର ମାପଚୁପ କରି ନିର୍ମାଣ ପାଇଁ ଅନୁମତି ଦେଇଛନ୍ତି। ମାତ୍ର ବାକି ଗୋଚର ଜମିକୁ କିଏ ଆବଦ୍ଧ କରିଛି, ତାହାର ତଦନ୍ତ ପାଇଁ ସ୍ଥାନୀୟ ଗୋପାଳନକାରୀମାନେ ତହସିଲଦାରଙ୍କୁ ଅନୁରୋଧ କରିଛନ୍ତି। ଏ ସମ୍ପର୍କରେ ତହସିଲଦାର ମଧୁସୂଦନ ନାୟକଙ୍କୁ ପଚାରିବାରୁ ସେ କିଛି ଜାଣିନାହାନ୍ତି ବୋଲି କହିଥିଲେ।
